Dual Panel1ALLAH makon sengko’ ngejungngagi tangesan reya kaangguy rato Isra’il se kadhuwa:
2Ebuna ba’na akantha macan bine’ se talebat lowar biyasa. Na’-ana’na eparaja e antarana can-macan lake’ se galak.
3Ana’na se settong eajari carana nyare kakan, sampe’ dhi-budhina dibasa, daddi tokang nyeppa’ ban nyargep manossa.
4Sa-bangsa se ngedhing parkara jareya, akompol mega’a ana’na macan jareya. Laju ejebbak e dhalem lobang sarta epega’ pas eeret bi’ e’-kae’, egiba ka Messer.
5Tadha’ gunana embu’na anante’ ana’na, dhi-budhina pas tao ja’ la tadha’ pangarebbanna. Budhu’na se laen laju eajari keya epadaddi macan galak parana.
6Budhu’na macan jareya daddi dibasa, pas apolong ban can-macan laenna. Ajar nyare kakanna ban daddi tokang kakanna manossa keya.
7Teng-binteng etarja sampe’ gujur, tha-kottha eparosak. Sakabbinna pandhudhu’ e nagara jareya ketter, ngedhing gaungnga se agaledder.
8Tape sa-bangsa dhari dhaera e sakalenglengnga nyargep budhu’na macan jareya dhari man-dhimman. Jira’ ebarbar epamega’a, dhi-budhina budhu’na macan jareya ekenneng jebbak e dhalem jira’na.
9Macan jareya epamaso’ ka korong pas egiba ka Babil epangadhep rato. Ejaga epakowat sopaja gaungnga ta’ ekaedhinga pole e mo’-gumo’ Isra’il se tenggi.
10Ebuna ba’na akantha bungkana anggur se bagus, se tombu e seddi’na songay e settong kebbun. Bungka jareya abuwa ban rampa’ tombuna, sabab aeng e jadhiya talebat bannya’na.
11Cangkana kowat ta’ gampang epapotong, patot ekagabay tongket karaja’anna rato. Konco’na tenggi napa’ ka langnge’. Reng-oreng padha lebur nangale’e polana tenggi bungkana ban rampa’ dhaunna.
12Tape bungkana anggur jareya edabu’ bi’ nang-tanang se peggel pas epelpallagi ka tana. Angen Temor dhateng, buwana se cengngar laju kerreng. Cangkana potong, daddi kerreng, laju eobbar.
13Sateya etamen e sagara beddhi, e tana kerreng se tadha’ aengnga.
14Bungkana anggur jareya ekello’ apoy; apoy alatlat sampe’ ka konco’, cangka ban buwana tadha’, padha katonon. Cangkana sateya ta’ andhi’ kakowadan; ta’ kera bisa ekagabay tongket karaja’an. Jareya tangesan se li-baliyan enyanyeyagi bi’ ommat.