Alkitab Mobile SABDA
[VER] : [MADURA]     [PL]  [PB] 
 <<  Yehezkiel 38 >> 

1PANGERAN adhabu ka sengko’,

2"He, manossa se ta’ langgeng, mara basto Gog rato agung dhari ra-nagara Mesekh ban Tubae e tana Magog rowa.

3Kabala ka rato jareya ja’ Sengko’, GUSTE Allah Se Mahatenggi reya, mosona.

4Bi’ Sengko’ rato jareya epabiluga, gusena epobuwana ke’-cangke’, sarta pas etaja’a epakalowara ban sakabbinna pasukanna. Pasukan jaranna se asaragam talebat bannya’na. Saneyap parjurit ngeba tameng ban peddhang.

5Rato jareya eerengngagi rit-parjurit dhari Persiya, Sudan ban Libiya, se padha ngeba peddhang ban songko’ baja bang-sebang.

6Reng-oreng se padha noro’ aperrang dhari ra-nagara Gomer ban Bet-Togarma e dhaja, maju abareng rato jareya, ban gi’ bannya’ pole bangsa laen se noro’ keya.

7Balai rato jareya soro aya-sadhiya ban parenta’agi tantarana kabbi se agabung bi’ aba’na sopaja padha’a asadhiya noro’a parentana.

8Pan-barampan taon aggi’ rato jareya bi’ Sengko’ esorowa nyerrang settong nagara se pandhudhu’na epakompol pole dhari antarana sa-bangsa sabannya’na ban pas enneng e nagara jareya kalaban taremtem. Gog bakal ngobasa’ana nong-gunong Isra’il se la abit daddi kennengngan se seppe sarta possa’ ban jur-gujuran, tape se sateya ekennengnge ra’yat se taremtem odhi’na.

9Rato jareya ban tantarana sarta sa-bangsa sabannya’na se ngerengngagi bakal dhatengnga nyerrang akantha kaleng busbus ban notobi saantero nagara jareya akantha ondhem."

10GUSTE Allah Se Mahatenggi adhabu ka Gog, "E bakto jareya ba’na bakal andhi’a sajja se jahat.

11Ba’na motossagi nyerbuwa nagara se tadha’ bintengnga, se pandhudhu’na odhi’ aman ban taremtem e tha-kottha se tadha’ geddhungnga ban se ta’ andhi’ parabut partahanan pa-apa.

12Ba’na bakal arampoga ban arampasa rang-barangnga pandhudhu’ e kottha se lamba’na aropa jur-gujuran jarowa. Pandhudhu’na se epakompol dhari pan-barampan bangsa jareya sateya la andhi’ dunnya ban ebin sabannya’na ban sateya ngennengnge pusadda dunnya.

13Pandhudhu’ Syeba ban Dedan sarta gar-sodagar e tha-kottha nagara Spanyol bakal atanya’a kantha reya ka ba’na, ‘Sampeyan makalowar tantarana ponapa pera’ parlo eparampasa sareng eparampoga emmas, salaka, ebin, sareng dunnyana oreng, sarta pas ngangko’a sadajana gapaneka?’"

14Daddi PANGERAN Se Mahatenggi laju ngotos sengko’ manapa’a pessen reya ka Gog, "Me’ teppa’na Tang ommat Isra’il odhi’ aman ban taremtem, ba’na dhateng nyerrang.

15Ba’na mangkat dhari bengkona se jau e bagiyan dhaja, eerengngagi tantara se raja ban kowat, kabbi padha pasukan jaran dhari samacemma bangsa.

16Ba’na laju nyerrang Isra’il Tang ommat, akantha kaleng busbus se dhateng ka bume. Mon la napa’ baktona, bi’ Sengko’ ba’na epamangkada epangobasa’ana Tang tana, sopaja polana sabarang se elakone Sengko’ kalaban parantara’anna Gog jareya sa-bangsa padha’a tao sapa Sengko’ reya, iya reya Allah se socce.

17Lamba’ Sengko’ gu ta’ la acaca parkara ba’na kalaban parantara’anna para nabbi Isra’il, Tang abdi? Bi-nabbi jareya la aramallagi ja’ pagi’ Sengko’ nyorowa oreng epanyerranga Isra’il. Sengko’ GUSTE Allah Se Mahatenggi, la ngoca’."

18GUSTE Allah Se Mahatenggi adhabu, "Tape saellana Gog nyerrang Isra’il, Sengko’ pas duliya ngamok.

19Kalaban ate se ce’ peggella Sengko’ ngoca’a ja’ e are jareya Sengko’ madhatengnga lendhu se talebat nako’e e nagara Isra’il.

20Sakabbinna juko’ ban mano’, sakabbinna keban raja ban kene’, ban sakabbinna oreng e bume bakal ngetterra katako’an ngadhebbi Sengko’. Nong-gunong bakal gujura, bung-lambungnga gunong bakal rendhessa ban dhung-geddhung bakal robbuwa.

21Saellana jareya bi’ Sengko’ Gog epangejjida, epadhatengngana balai se acem-macem, Sengko’, GUSTE Allah Se Mahatenggi la ngoca’. Reng-orengnga bakal salenga serrang dibi’ ban peddhang.

22Bi’ Sengko’ Gog eokoma ban panyaket sarta bannya’na oreng se saleng pate’e. Ojan derres ban ojan es, apoy ban balirang ban Sengko’ etotta’a ka Gog ban tantarana ban ka sa-bangsa sabannya’na se la asakongkel ban Gog jareya.

23Kalaban cara se kantha jareya Sengko’ noduwagiya ka sa-bangsa kabbi ja’ Sengko’ reya agung ban socce. Daddi reng-oreng jareya tao ja’ Sengko’ PANGERAN."


  Share Facebook  |  Share Twitter

 <<  Yehezkiel 38 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel