Dual Panel1E bakto jareya tanggal sapolo bulan settong, e dhalem taon se kapeng sagame’ e bakto sengko’ ban oreng Isra’il laenna badha e pambuwangan, iya reya pa’ bellas taon saellana Yerusalim kala, sengko’ arassa badhana kobasana Pangeran, ban sengko’ pas laju ebakta bi’ Salerana.
2E dhalem settong pangatonan, bi’ Allah sengko’ ebakta ka tana Isra’il pas esaba’ e gunong se tenggi. E adha’an tang mata sengko’ nangale’e bangonan sakalompo’ se katon akantha kottha.
3Sengko’ ebakta ka jadhiya; sengko’ nangale’e oreng lalake’ kasorang se ngareddhap akantha paronggu ngadek e seddi’na labang saketheng. Oreng jareya ngastane tale kor-okor dhari linen ban kaju okoran.
4Lalake’ jareya adhabu ka sengko’, "He, manossa se ta’ langgeng, mara edhingngagi pagu-onggu ban abassagi sabarang se eduduwagi sengko’ ka ba’na, sabab bi’ sengko’ ba’na egiba dha’ enna’ kaangguy kaparlowan jareya. Kabala ka bangsa Isra’il sabarang se etangaleyana ba’na."
5Sengko’ pas nangale’e Padalemman Socce se badha pagar geddhungnga e sakalenglengnga. Geddhung jareya molae eokor bi’ lalake’ gella’ ngangguy kaju okoranna se lanjangnga tello meter. Geddhung jareya tenggina etemmo tello meter ban kandella tello meter keya.
6Saellana jareya oreng buru meyos ka labang saketheng se addhep ka temor, pas nae’ ka dhak-ondhagga; sanapa’na ka attas, labang jareya pas eokor, lebarra badha tello meter.
7E budhina labang saketheng jareya badha lorong; He kangan kacerra lorong jareya badha kamar jagana tatello’ ebang. Mar-kamar jareya rajana padha. Padha masagi empa’, lanjangnga ban lebarra padha tello meterran. Dhung-geddhung se abatesse saneyap kamar kandella padha, iya reya dhu meter satengnga. Lorong jareya malanjang tello meter aggi’, nojju ka kamar se raja se ngadhep ka Padalemman Socce. Lalake’ jareya ngokor kamar se raja buru, ban etemmo lebarra pa’ meter; kamar jareya badha e konco’na labang saketheng, e bagiyan dhalemma, iya reya se paleng semma’ ban Padalemman Socce. Dhung-geddhung e bagiyan se ngadhep ka Padalemman Socce kandella sameter.
8(40:7)
9(40:7)
10(40:7)
11Saellana jareya lalake’ buru laju ngokor lebarra lorong e labang saketheng; badha nem meter satengnga, dineng lebarra labang sakethengnga badha lema meter.
12E adha’na mar-kamar panjaga’an se okoranna tello’ kale tello meter rowa, badha geddhung dhap-mandhap, se tenggina satengnga meter, kandella satengnga meter keya.
13Saellana jareya lalake’ buru laju ngokor ella’na dhari geddhung budhina kamar panjaga’an sampe’ ka geddhung budhina kamar panjaga’an se dhep-adhebban bi’ kamar jareya; lanjangnga badha dhubellas satengnga meter.
14Kennengngan se raja rowa eokor keya: lanjangnga sapolo meter. Labangnga nojju ka taneyan lowarra Padalemman Socce.
15Dhari labang saketheng bagiyan lowar sampe’ ka geddhungnga kennengngan se raja e bagiyanna se ngadhep ka Padalemman Socce badha sagame’ meter.
16E geddhung bagiyan budhi ban geddhung batessa mar-kamar jareya badha candhelana se padha ne’-kene’. Dhung-geddhung bagiyan dhalem se ngadhep ka lorong, erengga ban ker-okeran bungkana palma.
17Saellana jareya bi’ lalake’ gella’ sengko’ laju ebakta lebat e labang saketheng ka taneyan lowarra Padalemman Socce. E geddhung lowar e sakalenglengnga Padalemman Socce epobuwi kamar tello polo meggi’. E adha’na mar-kamar jareya badha palesteran batona
18se notobi sakalenglengnga taneyan jareya. Taneyan lowar jareya amandhaban dhari taneyan dhalem.
19E jadhiya badha labang saketheng laen se atenggiyan se ngadhep ka taneyan dhalem. Lalake’ jareya ngokor lanjangnga dhari labang saketheng se settong ka settonga, badha saeket meter.
20Saellana jareya lalake’ gella’ ngokor labang saketheng dhaja se nojju ka taneyan dhalem.
21E labang saketheng jareya, kamar panjaga’an se tatello’ e kangan kacerra lorongnga, dhung-geddhung se abatesse kamar se raja, okoranna padha kabbi ban se badha e labang saketheng temor. Lanjangnga lorongnga labang saketheng jareya kabbi badha sagame’ meter ban lebarra dhubellas satengnga meter.
22Bariya keya kamar se raja, la-candhelana ban ker-okeranna bungkana palemma padha ban se badha e labang saketheng temor. Badha dhak-ondhak papetto’ se nojju ka labang saketheng jareya, ban e konco’na badha kamarra se raja ngadhep ka taneyan lowarra Padalemman Socce.
23Pas badha labang saketheng laen se dhep-adhebban ban labang saketheng dhaja, se nojju ka taneyan dhalem, padha ban labang saketheng temor. Oreng jareya ngokor lanjangnga dhari labang saketheng se settong ka settonga, badha saeket meter.
24Saellana jareya bi’ oreng lalake’ buru sengko’ ebakta ka labang saketheng lao’; labang saketheng jareya laju eokor. Etemmo ja’ labang saketheng jareya padha ban bang-labang saketheng laenna.
25La-candhelana mar-kamarra padha ban se badha e bang-labang saketheng se laen. Lanjangnga lorongnga labang saketheng jareya sagame’ meter, lebarra dhubellas satengnga meter.
26Badha dhak-ondhak papetto’ se nojju ka labang saketheng jareya ban kamarra se raja badha e konco’na keya, ngadhep ka taneyan lowarra Padalemman Socce. Dhung-geddhung bagiyan dhalem se ngadhep ka lorong, erengga bi’ ker-okeranna bungkana palma.
27E jadhiya badha keya labang saketheng se nojju ka taneyan dhalem. Lalake’ jareya ngokor ella’na e antarana labang saketheng se dhadhuwa’ jareya, badha saeket meter.
28Saellana jareya bi’ lalake’ jareya sengko’ ebakta lebat labang saketheng lao’ maso’ ka taneyan dhalem. Labang saketheng lao’ jareya eokor, okoranna padha ban bang-labang saketheng se e lowar.
29Mar-kamar panjaga’anna, kamarra se raja, ban dhung-geddhung dhalemma padha ban se badha e bang-labang saketheng laenna. Mar-kamar e labang saketheng jareya badha la-candhelana keya. Lorongnga lanjangnga sagame’ meter ban lebarra dhubellas satengnga meter.
30(40:29)
31Tape kamarra se raja addhep ka taneyan lowar. Dhung-geddhung bagiyan dhalemma se addhep ka lorong, erengga keya ban ker-okeranna bungkana palma. Badha dhak-ondhak baballu’ se nojju ka labang saketheng jareya.
32Saellana jareya bi’ lalake’ gella’ sengko’ ebakta lebat labang saketheng temor maso’ ka taneyan dhalem. Labang saketheng jareya eokor; okoranna padha ban bang-labang saketheng laenna.
33Mar-kamar panjaga’anna, dhung-geddhung dhalemma ban kamarra se raja okoranna akantha se badha e bang-labang saketheng laenna. E mar-kamar jareya ban e kamarra se raja badha la-candhelana. Lanjangnga lorongnga badha sagame’ meter ban lebarra dhubellas meter satengnga.
34Kamarra se raja addhep ka taneyan lowar. Dhung-geddhungnga se bagiyan dhalem se addhep ka lorong erengga bi’ ker-okeranna bungkana palma. Badha dhak-ondhak ballung meggi’ ka labang saketheng jareya.
35Dhi-budhina bi’ lalake’ jareya sengko’ ebakta ka labang saketheng dhaja. Labang saketheng jareya eokor; okoranna padha ban bang-labang saketheng laenna.
36Bariya keya mar-kamar panjaga’anna, dhung-geddhung dhalemma ban kamarra se raja padha ban se badha e bang-labang saketheng laenna. E mar-kamarra ban e kamarra se raja badha la-candhelana. Lanjangnga lorongnga labang saketheng jareya sagame’ meter ban lebarra dhubellas meter satengnga.
37Adha’anna addhep ka taneyan lowar keya. Dhung-geddhung bagiyan dhalemma se addhep ka lorong, erengga ban ker-okeranna bungkana palma. Badha dhak-ondhak ballung meggi’ ka labang saketheng jareya.
38E taneyan lowar badha settong kamar tamba’an e labang saketheng dhalem bagiyan dhaja. Dhari kamar tamba’an jareya badha labangnga ka kamarra se raja. E jadhiya kennengnganna ban-keban ebacco kaangguy kurban obbaran.
39E kamarra se raja jareya badha mejana pa’-empa’, dhadhuwa’ salaja. E attassa meja jareya kennengnganna panyambelliyanna keban se ekagabaya kurban obbaran, otabana kurban palebbaranna dusa otabana kurban tebbusanna kasala’an.
40E lowaranna kamar se raja jareya badha meja pole pa’ meggi’, dhadhuwa’ e penggir kanganna ban dhadhuwa’ e penggir kacerra labang saketheng dhaja jareya.
41Daddi meja panyambelliyanna keban kurban jareya kabbi badha baballu’: pa’-empa’ e dhalem ban pa’-empa’ e lowaranna taneyan.
42Meja se pa’-empa’ e kamar tamba’an se eangguy nyadhiya’agi kurban obbaran jareya etata dhari bato. Tenggina satengnga meter, dineng bagiyan attassa masagi empa’, lanjang ban lebarra padha tello parapat meter. E attassa ja-meja jareya epanyaba’i pakakas se eangguy nyambelli keban kurban.
43Penggirra ja-meja jareya ngangguy palepet lebarra pettong polo lema’ milimeter. Daging se ekurbannagiya esaba’ e attassa ja-meja jareya.
44Saellana jareya bi’ lalake’ jareya sengko’ ebakta ka taneyan dhalem. E jadhiya badha mandhapana dhadhuwa’, se settong e erenganna labang saketheng dhaja, addhep ka lao’, ban settonganna e erenganna labang saketheng lao’, addhep ka dhaja.
45Lalake’ jareya adhabu ka sengko’ ja’ mandhapa se addhep ka lao’ jareya esadhiya’agi ka para imam se alako e Padalemman Socce,
46dineng mandhapa se addhep ka dhaja e sadhiya’agi ka para imam se alako e mezba. Mam-imam jareya kodu dhari toronanna Zadok kabbi. Sabab dhari suku Lewi coma toronanna Zadok se olle ngadhep Pangeran kaangguy aladine Salerana e dhalem kabakteyan.
47Lalake’ jareya ngokor taneyan dhalemma. Bangonna masagi empa’: lanjang ban lebarra padha saeket meter. Padalemman Socce jareya badha e bagiyan bara’, e adha’anna badha mezbana.
48Saellana jareya sengko’ pas ebakta ka amper adha’na Padalemman Socce, lebat e dhak-ondhak. Kamar se ekagabay jalan maso’ eokor; rajana badha pettong kale dhu meter satengnga, penggirra se dhu kalaja ngangguy geddhung se kandella sameter satengnga. E kangan kacerra badha pelarra. Amper adha’anna jareya lanjangnga sapolo meter ban lebarra nem meter.
49(40:48)