Dual Panel1PANGERAN makon sengko’ entar melle sarong se pandha’ dhari linen, pas epakon angguy, tape sarong jareya ta’ eparengngagi cabbur ka aeng.
2Daddi sengko’ entar melle sarong jareya, laju eangguy.
3Saellana jareya PANGERAN adhabu pole ka sengko’, dhabuna,
4"Kassa’ ba’na entar ka Songay Efrat, errep sarong se pandha’ jareya e ke’-lekke’na bato."
5Daddi menorot papakonna PANGERAN jareya sengko’ pas mangkat; sarong jareya bi’ sengko’ laju eerrep e seddi’na Songay Efrat.
6Ta’ saapa abidda dhari jareya, bi’ PANGERAN sengko’ epakon entar pole ka Songay Efrat epakon ngala’ sarong se pandha’ rowa.
7Daddi sengko’ pas mangkat, pas makalowar sarong gella’ dhari pangerrebbanna. O-tao sarong jareya etemmo la alpo’, ta’ ekenneng angguy pole.
8PANGERAN laju adhabu pole ka sengko’ dhabuna,
9"Kantha jareya carana Sengko’ ngokoma oreng Yehuda ban Yerusalim. Bi’ Sengko’ kaangkowanna se lowar biyasa jareya epaancora.
10Bangsa se jahat jareya ce’ cengkalla ban ta’ endha’ atoro’ ka Sengko’. Padha nyemba ban abakte ka lah-illah laen. Lantaran jareya reng-oreng buru bakal daddiya akantha sarong se pandha’ se tadha’ gunana jareya.
11Akantha sarong pandha’ se etale’e epaserret ka tengngana oreng se ngangguy, bariya keya Sengko’ andhi’ maksod sopaja ommat Isra’il ban Yehuda cekka’ rapet ka Sengko’, sopaja reng-oreng jareya daddiya Tang ommat se andaddiyagi Tang nyama pas emolja’agi ban ehormadi oreng. Tape reng-oreng jareya ta’ endha’ atoro’ ka Sengko’."
12GUSTE Allah adhabu ka sengko’, "Yeremiya, kabala ka oreng Isra’il ja’ saneyap guce baddhana anggur kodu eesse’e anggur sampe’ possa’. Mon reng-oreng jareya nyaot, ‘Masa’ kaula ta’ oneng ja’ guce masthe eesse’e anggur epapossa’?’
13Ba’na ngoca’ ka reng-oreng jareya ja’ reng-oreng sanagara reya, to-rato toronanna Daud, para imam, para nabbi ban sakabbinna oreng Yerusalim bi’ Sengko’ eesseyana anggur epapossa’a sampe’ mabu’ kabbi.
14Saellana jareya reng-oreng jareya bi’ Sengko’ epasalenga bentor epakantha’a guce. Towa ngodha epapadha’a, ta’ ekaneserrana. Kabbi epamateya, bi’ Sengko’ tadha’ se ekaneserrana otaba ekabellasana. Sengko’, PANGERAN, la ngoca’."
15Ommat Isra’il, PANGERAN la adhabu! Ja’ ko-angko, edhingngagi dhabuna!
16GUSTE Allahna ba’na kodu eagungngagi sabellunna Salerana madhateng papetteng, ban sokona ba’na tatandhung e pagunongan, sabellunna tera’ se erep-arep ba’na eoba epadaddi petteng calemodan.
17Mon ba’na ta’ endha’ ngedhingngagi sengko’ nangesa ta’ asa’-kasa’a, nangesa epangennessa, polana kaangkowanna ba’na jareya. Tang aeng mata tanto ngemmeng sabab ommadda PANGERAN eangko’ egabay tawanan.
18PANGERAN adhabu ka sengko’, "Rato ban ebuna rowa soro toron dhari tahtana, sabab makothana se bagus rowa la gaggar dhari cethagga.
19Tha-kottha Yehuda e bagiyan lao’ parappa’na ekeppong, ban tadha’ oreng se bisa’a narabas keppongan jareya. Reng-oreng Yehuda kabbi la eangko’ ka pambuwangan."
20PANGERAN adhabu ka pandhudhu’ Yerusalim, "Yerusalim, abassagi! So-mosona ba’na teppa’na dhateng dhari dhaja! Kemma reng-oreng se kodu eaobi ba’na ban se talebat egul-agullagi ba’na?
21Ngoca’a apa ba’na mon reng-oreng se bi’ ba’na esanggu kanca o-tao makala sarta ngobasae ba’na? Tanto ba’na arassa sake’ akantha babine’ se rembi’a.
22Olle daddi ba’na atanya arapa jareya kabbi me’ teba ka ba’na, arapa angguyya ba’na me’ esebbit ban ba’na eparkosa. Jareya kabbi polana dusana ba’na talebat rajana.
23Ba’ bisa’a oreng se kole’na celleng ngoba barnana kole’na jareya, otabana macan maelang lang-bellingnga? Tanto enja’! Bariya keya ba’na se biyasa alako juba’ ta’ kera bisa alako bagus.
24Bi’ Sengko’ ba’na epacar-kalacera akantha sekkem se ekebbat angen dhari sagara beddhi.
25Jareya se bakal teba’a ka ba’na se la etantowagi bi’ Sengko’ polana ba’na la loppa ka Sengko’, ban parcaja ka lah-illah palsu.
26Sengko’ dibi’ se nyebbida angguyya ba’na, edhandhana sampe’ ba’na abangkang ban malo.
27Sengko’ la nangale’e ba’na ngalakone sabarang se ekabaji’i Sengko’. Sengko’ la nangale’e ba’na nyerser lah-illah laen e gumo’ ban e teggal, akantha lalake’ se gila ka binena oreng laen otabana akantha jaran lake’ se barai ka jaran babine’. Pandhudhu’ Yerusalim, palang ba’na! Bila ba’na se bebasa dhari sakabbinna kajahadan?"