Dual Panel1PANGERAN adhabu ka sengko’, "Sengko’ ta’ neserra ka bangsa reya, maske Mosa ban Samuwel manjeng e dhinna’ sakale kaangguy menta’agi ka Sengko’ sopaja Sengko’ bellasa ka reng-oreng jareya. Soro ondur bangsa jareya, Sengko’ ta’ terro nangaleyana pole!
2Mon reng-oreng jareya atanya ka ba’na kodu ondur dha’ emma, saodi kantha reya, ‘PANGERAN adhabu, se la eteptebbagi mateya polana sake’ dina me’ olle mate polana panyaket. Se etantowagi mateya e dhalem paperrangan dina me’ olle mate e dhalem perrang. Se etantowagi mateya polana lapar dina me’ olle mate polana kalaparan! Se eteptebbagi etawana mosona dina me’ olle etawan!’
3Sengko’, PANGERAN, la nantowagi okoman se nako’e pa’ macem kodu teba ka reng-oreng jareya: reng-oreng jareya bakal mateya e dhalem paperrangan, mayyidda bakal eereda pate’, ekakana mano’, ban epatadha’a bi’ burun alas.
4Sa-bangsa e dunnya bi’ Sengko’ epamarengesa atena nangale’e reng-oreng jareya. Sengko’ neba’agi jareya kabbi polana tengkana Manasye ana’na Hizkiya e Yerusalim e bakto daddi rato Yehuda."
5PANGERAN adhabu, "He pandhudhu’ Yerusalim, sapa se neserra ka ba’na? Sapa se noro’a sossa polana ba’na se sossa? Sapa se nyepperra pera’ parlo atanya’a kabadha’anna ba’na?
6Ba’na nolak ban ondur dhari Sengko’, daddi Sengko’ ngangka’ Tang tanang ngancora ba’na, sabab Sengko’ la busen ngampet peggella ate reya.
7E saneyap kottha e nagara reya bi’ Sengko’ ba’na ebuwanga epakantha’a darameyan. Sanajjan ba’na Tang ommat, bi’ Sengko’ ba’na epateyana ban na’-ana’na sabab ba’na ta’ endha’ ngoba tengka polana.
8Nagarana ba’na bakal possa’a ban randha, abannya’an dhari beddhi e penggir sereng bannya’na. Reng-oreng bi’ Sengko’ epamateya gi’ ngodhana sampe’ ebuna padha sossa. E baja seyang Sengko’ madhatengnga oreng se mateyana sampe’ Tang ommat kabbi padha posang.
9Ebu se kaelangan ana’ kapetto bannya’na kalengnger polana seksek nyabana. Are e dhalem odhi’na la orem, aba’na arassa epatodhus ban eya-seya. Se gi’ odhi’ e antarana ba’na bi’ Sengko’ esoro pate’e ka so-mosona. Sengko’, PANGERAN, la ngoca’."
10Palang onggu sengko’ reya! Apa gunana sengko’ elahirragi bi’ ebu? Sengko’ kodu atokar ban aguggak bi’ sakabbinna oreng e nagara reya. Maske sengko’ ta’ tao jam-maenjam otaba jam-ngenjam, sengko’ ebasto sakabbinna oreng.
11GUSTE, manabi abdidalem pajat ta’ sae ajalannagi kawajiban abdidalem, sareng ta’ abillai so-moso e ajunannepon Junandalem e bakto reng-oreng gapaneka manggi balai sareng kasossa’an, diggal babastonnepon reng-oreng gapaneka me’ olle kalakon ongguwan.
12(Tadha’ oreng se bisa motel besse, bi-lebbi besse dharidhaja se la ecampor bi’ dimbaga.)
13PANGERAN adhabu ka sengko’, "Sengko’ madhatengnga moso me’ olle ngangko’ dhi’-andhi’na Tang ommat menangka okomanna sa-dusana reng-oreng saantero nagara reya.
14E nagara manca se gi’ ta’ ekataowe Tang ommat jareya, bi’ Sengko’ Tang ommat epadaddiya dunorra so-mosona, sabab peggella Tang ate la ngalowa akantha apoy se rabbang ban ta’ endha’ terep."
15Sengko’ pas mator, "GUSTE, Junandalem ngarte. Kaemodi sareng tolong abdidalem ka’dhinto. Balessagi reng-oreng se nyerser sareng se nganeyaja abdidalem. Ja’ bar-sabbar parana ka reng-oreng gapaneka, dhaggi’ reng-oreng gapaneka ahasel mate’e abdidalem. Kaemodi, Guste, abdidalem ka’dhinto eya-seya oreng amarga Junandalem.
16Manabi Junandalem abu-dhabu, sabban keccap sareng abdidalem eperengngagi. Abdidalem ka’dhinto kaagungannepon Junandalem, PANGERAN, Allah Se Mahakobasa, daddi sadaja dhabuepon Junandalem masenneng sareng maperak abdidalem.
17Abdidalem ta’ noro’ neng-sennengngan sareng oreng se apol-kompol namong parlo agaja’a sareng agella’an. Lantaran ta’at ka Junandalem, abdidalem enneng kadibi’an kalaban ate peggel.
18Aponapa abdidalem me’ terros nanggung sossa? Aponapa loka abdidalem me’ bakbak sareng ta’ poron baras? Ponapa Junandalem amaksod maastaba’a abdidalem akadi songay se daddi kerreng e mosem nemor?"
19PANGERAN adhabu, "Mon ba’na abali, bi’ Sengko’ etarema’a. Ba’na bakal daddiya Tang abdi pole. Mon ba’na notorragi sabarang se aguna ban banne caca lecek, ba’na olle daddi Tang nabbi pole. Reng-oreng bakal nyanderra ka ba’na pole, ta’ parlo ba’na entar ka reng-oreng jareya.
20Bi’ Sengko’ ba’na epadaddiya binteng paronggu kaangguy nahan reng-oreng jareya. Reng-oreng jareya bakal merrangana ba’na, tape ta’ kera bisa makala ba’na. Sengko’ abarengngana ba’na kaangguy ngaobi ban masalamet ba’na.
21Sengko’ malopoda ba’na dhari kakobasa’anna reng-oreng jahat se kejjem. Sengko’, PANGERAN, la ngoca’."