Dual Panel1Pessenna PANGERAN, Allahna Isra’il, se kodu epanapa’ ka ra’yat, bi’ sengko’ la mare ekabala kabbi.
2Azariya ana’na Hosaya ban Yokanan ana’na Kareyah ban sakabbinna oreng se sombong jareya ngoca’ ka sengko’, "Sampeyan lecek. GUSTE Allah ta’ makon sampeyan alarang kaula ngalle ka Messer.
3Sampeyan enas-panase Barukh ana’na Neriya epamosowan ban kaula sadaja, sopaja kaula sadaja ekobasa’ana oreng Babil, pas epate’e otabana eangko’ ka Babil."
4Yokanan ban sakabbinna parwira sarta ra’yat padha ta’ endha’ atoro’ ka dhabuna PANGERAN sopaja pagguna enneng e Yehuda.
5Bi’ Yokanan ban sakabbinna parwira jareya saneyap oreng se gi’ badha e Yehuda, bariya keya sakabbinna oreng se abali dhari ra-nagara kennengnganna reng-oreng jareya abalessadan padha egiba ka Messer.
6Lake’, bine’, na’-kana’, ban tre-pottrena rato se bi’ Nebuzaradan epassra’agi ka dhalem pangawasanna Gedalya, tamaso’ sengko’ ban Barukh, padha egiba ka Messer.
7Kabbi padha ta’ atoro’ ka dhabuna PANGERAN, entar ka Messer sampe’ gan kottha Tahpanhes.
8E jadhiya PANGERAN adhabu ka sengko’,
9"Kassa’ ngala’ bato se ja-raja, bendhem e tana e adha’na labang palebadanna mon maso’a ka bangonan pamarentana kottha rowa. Ehteyarragi sopaja reng-oreng Yehuda padha nangale e bakto ba’na ngalakone jareya.
10Pas kabala ka reng-oreng jareya ja’ Sengko’, PANGERAN Se Mahakobasa, Allahna Isra’il, madhatengnga Tang abdi, Nebukadnezar rato Babil, ka kennengngan jareya. Nebukadnezar bakal nyaba’a korse karaja’anna sarta ngampara kemah karaja’anna e attasanna to-bato se ebendhem ba’na jareya.
11Nebukadnezar bakal dhatengnga ban makala’a Messer. Ban reng-oreng se la etantowagi mateya polana wabah panyaket bakal mateya polana wabah panyaket. Se etantowagi eangko’a epadaddi tawanan bakal eangko’a epadaddi tawanan, ban se etantowagi mateya e dhalem paperrangan bakal mateya e dhalem paperrangan.
12Wel-kowella ba-diba Messer bi’ Sengko’ eobbara, ban ca-arca brahala e wel-kowel jareya bi’ rato Babil bakal eobbara otabana eangko’a ka nagarana. Akantha oreng ngowan se aberse’e toma e kalambina, bariya keya rato Babil bakal maberseya Messer pas mangkat pole dhari jadhiya ta’ kalaban badha se aganggu.
13Gu-tuguna brahala e Heliopolis e Messer bakal epaancora, ban wel-kowella ba-diba Messer bakal eobbara sampe’ tadha’ karena."