1Bakal napa’a baktona ba’na anyanye kantha reya: "GUSTE, abdidalem asokkor ka Junandalem, lantaran Junandalem alepor abdidalem. Gi’ dhimen Junandalem duka ka abdidalem namong samangken dukana Junandalem ampon terep.
2Onggu, Allah reya panyalamedda sengko’, sengko’ parcaja ka Salerana. Sengko’ ta’ tako’, sabab Allah marenge sengko’ kakowadan, Allah reya panyalamedda sengko’; sengko’ anyanye kaagem ka Salerana.
3Akantha aeng se cellep maperak oreng se pelka’, bariya keya ba’na bakal gumbira’a lantaran epasalamet bi’ Allah."
4Bakal napa’a baktona ba’na padha’a ngoca’, "Mara asokkor ka PANGERAN, mara nyemba ka Salerana. Berta’agi ka sa-bangsa kaagunganna ban sabarang se elampa’agi Salerana.
5Mara anyanye kaator ka PANGERAN sabab Pangeran la mabadha kaajiban sabannya’na. Dina oreng sadunnya me’ padha ngedhing sabarang se elampa’agi Salerana.
6Mara asorak, reng-oreng Siyon, mara anyanye paperak. Allahna Isra’il se socce reya talebat moljana, Salerana alenggi apolong ban ba’na."