Dual Panel1Areya’ dhabu se epessennagi PANGERAN parkara Mo’ab. Kottha Ar ban Kir epamosna e dhalem bakto samalem, ban nagara Mo’ab daddi seppe.
2Pandhudhu’ Dibon ongga ka gumo’ nangesa e kennengnganna pamojja’anna ba-dibana. Pandhudhu’ Mo’ab ngennes nangese kottha Nebo ban Medeba. Cethak ban janggu’na ecokor menangka tandha sossa.
3Reng-oreng akalambi kaen karong menangka tandha sossa; oreng nanges e ata’na bengko ban e lon-alon.
4Oreng Hesybon ban Eleyale rung-dharungan, sowarana ekaedhing sampe’ ka Yahas. La’-mala’ para parjurit padha ngetter, elang kabangalanna atena.
5Sengko’ neser ka Mo’ab! Pandhudhu’na ngongse ka kottha Zowar ban ka Eglat-Selisia. Badha se ngongga’agi lorong ka Luhit sambi nanges; badha se berka’ ka Horona’im sambi reng-cerrengan polana nemmo balai.
6Aengnga Songay Nimrim asat, rebba e penggirra la elop ban kerreng, tadha’ bu-tombuwan se biru pole.
7Reng-oreng alengka Songay Kene’ Ha’arabim ban aehteyar masalamedda artana.
8E man-dhimman e batessa Mo’ab badha sowara reng-cerrengan. Tangessa reng-oreng jareya ekaedhing ka Eglaim ban Be’er-Elim.
9E Dibon aengnga songay daddi mera polana acampor ban dhara. Ban Allah bakal madhatengnga sabarang se lebbi nako’e dhari jareya ka reng-oreng e jadhiya. Kang-tokang jagal se ekerem ka jadhiya bakal mateyana reng-oreng Mo’ab se gi’ odhi’.