1Mara akompol, sa-bangsa, pas edhingngagi. Dina saantero bume ban sakabbinna se odhi’ e jadhiya me’ olle padha nyander ban ngedhingngagi.
2PANGERAN duka ka sakabbinna bangsa ban sakabbinna pasukanna. Salerana bakal ngokoma ban matompessa reng-oreng jareya kabbi.
3Yit-mayyidda ta’ kera ebendhem, tape bakal epannengnga sampe’ bucco’ ban baceng. Nong-gunong bakal mera’a polana dharana reng-oreng jareya.
4Are, bulan ban tang-bintang bakal ancora. Langnge’ bakal epagulunga epakantha gulunganna dalubang. Tang-bintang bakal gaggara, ngalotor akantha un-dhaunan se ronto dhari bungkana anggur ban bungkana ara.
5PANGERAN la nyadhiya’agi peddhangnga e sowarga, ban sateya peddhang jareya bakal ngennenga ka bangsa Edom, bangsa se la eteptebbagi kaangguy narema okoman ban epamateya.
6Peddhangnga PANGERAN bakal buddhaga dhara ban gajina reng-oreng jareya, akantha se buddhak dhara ban gajina keban kurban. Sabab PANGERAN nyadhiya’agi kurban e Bozra, bakal ajagala oreng se ta’ sakera-kera bannya’na e tana Edom.
7Reng-oreng bakal tebasa akantha bantheng ban sape ngodha. Nagarana bakal mera’a bi’ dhara ban possa’ ban gaji.
8Jareya sa’adda PANGERAN abillai Siyon ban males sake’na ate ka so-mosona.
9Ngay-songay Edom bakal aoba’a daddi etter, ban tanana daddiya balirang. Dhi-budhina saantero nagara bakal rabbanga akantha etter.
10Seyang malem rabbangnga ta’ mate, okossa bul-ngebbul dhari jadhiya salanjangnga. Tana jareya bakal eondurana sampe’ kosong ban kajal ron-temoron, ban ta’ elebadi oreng settonga.
11Mano’ wek-kowek ban dhangdhang bakal ngennengngana tana jareya, mano’ belluk ban landha’ bakal ngobasa’ana e jadhiya. Tana jareya bi’ PANGERAN bakal epasalbuda pole ban kosong akantha sabellunna pancepta’an.
12Tadha’ rato se marenta nagara jareya, ban sakabbinna pamimpinna la mosna.
13Ton-karatonna ban tha-kotthana se abinteng bakal etombuwana ombut ban dhuri, sarta ekennengnge pate’ alas ban mano’ onta.
14Burun alas bakal jar-galajarana e jadhiya; tan-setan bakal salenga sambit, ban din-dadin malem bakal nyareya kennengnganna paistirahadan.
15E jadhiya olar se mandi opassa agabay rongkangnga, ngerremme ban meyara budhu’na. Mano’ lap-alap akompol e jadhiya keya sang-sapasang.
16Sare, pas baca e dhalem ketabba PANGERAN: Dhari sakabbinna mahlok tadha’ settonga se bakal elanga otaba se ta’ andhi’a pasanganna. Sabab kantha jareya papakonna PANGERAN, ban Salerana dibi’ se makompol lok-mahlok jareya.
17PANGERAN se magi nagara jareya e antarana lok-mahlok jareya, ban kabbi padha narema bagiyanna bang-sebang. Lok-mahlok jareya bakal ennengnga e jadhiya salanjangnga, ban tana jareya bakal ekaandhi’a aba’na ron-temoron.