Dual Panel1Ra-kera e bakto jareya, rato Babil, iya areya Merodakh Baladan pottrana Baladan, meyarsa ja’ Rato Hizkiya gi’ buru baras dhari songkanna. Daddi laju ngotos oreng ngeba serrat ban tor-ator ka Hizkiya.
2Hizkiya narema para otosan jareya kalaban panggaliyan se senneng sarta pas noduwagi ka reng-oreng jareya sakabbinna artana, iya areya emmas ban salaka, pa-lappa ban mennya’ ro’om, ban sakabbinna parlengkabanna tantarana. Tadha’ settonga e karaja’anna se ta’ epatao ka para otosan jareya.
3Nabbi Yesaya pas nyabis ka Rato Hizkiya, laju atanya, "Dhari ka’imma reng-oreng gapaneka? Mator ponapa reng-oreng gapaneka?" Saodda Hizkiya, "Dhari Babil, nagara se jau."
4"Reng-oreng gapaneka nengale ponapa e karaton?" ca’na Yesaya pole. "Sabadhana," dhabuna Hizkiya. "Tadha’ barang se esempen e karaton se bi’ kaula ta’ epatao ka reng-oreng ganeka."
5Yesaya laju mator ka rato, "PANGERAN Se Mahakobasa adhabu,
6‘Bakal napa’a baktona sabarang dhi’-andhi’na ba’na se badha e karaton, ban sakabbinna se la epakompol bi’ bangatowana ba’na sampe’ are teya, eangko’a oreng ka Babil. Tadha’ karena settonga se ceccer.
7Dhari na’ potona ba’na badha keya se egiba’a epadaddiya ponggaba karaton se kodu aladine rato Babil.’"
8Rato Hizkiya nyaot, "Bagus jugan dhabuna PANGERAN se epanapa’ sampeyan ka kaula paneka." Kan adhabu kantha jareya polana ca’na panggaliyanna, "Sokor tang karaja’an paggun aman ban taremtem saomorra sengko’."