Alkitab Mobile SABDA
[VER] : [MADURA]     [PL]  [PB] 
 <<  Yesaya 42 >> 

1Dhabuna PANGERAN, "Areya’ Tang abdi se bi’ Sengko’ etolonge, Tang peleyan se masenneng Tang ate. Bi’ Sengko’ la eberri’i Tang kakobasa’an kaangguy ngeba kaadilan ka saneyap bangsa.

2Tang abdi jareya ta’ bakal aera’a eparanyeng, sowarana ta’ kera ekaedhing e rong-lorong.

3Perreng se ondhung ta’ kera epotel, conglet se lek-mellek ta’ kera epate’e. Kalaban estona tang abdi jareya bakal anyata’agiya sabarang se teppa’,

4ta’ kalaban potos pangarep otaba mangmang, sampe’ kaadilan manjeng e attas bume. Ra-nagara se jau rep-ngarep pangajaranna."

5GUSTE Allah nyepta’agi ban ngampar langnge’; abadhi bangonna bume ban sabarang se tombu e attasanna. Manossa eparenge nyaba se maodhi’ manossa jareya. Guste Allah adhabu kantha reya,

6"Sengko’, PANGERAN, ngolok ban ngotos ba’na kaangguy ajalannagi kaadilan. Bi’ Sengko’ ba’na etonton ban epeyara epadaddiya parjanjiyan ka ommat manossa, sarta caja ka sakabbinna bangsa.

7Kaangguy mokka’ matana oreng buta, ban makalowar oreng dhari pettengnga penjara.

8Sengko’ PANGERAN, jareya Tang nyama; Sengko’ ta’ magi Tang kaagungan ka sapa’a bai; kakalonta’anna Sengko’ ta’ epassra’agi ka arca.

9Sateya se eramallagi Sengko’ la daddi kanyata’an; Sengko’ notorragiya ra-parkara se anyar; sabellunna jareya kadaddiyan bi’ Sengko’ la ekabala ka ba’na."

10Mara anyanye lagu anyar kaagem PANGERAN, molja’agi Salerana, saantero bume! Mara agarudhu’, tase’ ban saessena, ra-nagara se jau ban sakabbinna pandhudhu’na!

11Ra-ara ban tha-kotthana kodu amolja’agi PANGERAN, pandhudhu’ Kedar kodu ngagungngagi Salerana! Pandhudhu’ kottha Sela kodu rak-soragan, ban ra’-era’an dhari konco’na gunong!

12Dina reng-oreng jareya me’ olle ngagungngagi PANGERAN, makalonta Salerana e ra-nagara se jau.

13PANGERAN maju aperrang padha ban pahlawan, padha ban parjurit se ce’ samangadda se aperranga. Salerana ngorakkagi soragga paperrangan, ban noduwagi kalebbiyanna ka so-mosona.

14Dhabuna Allah, "La abit Sengko’ ta’ ca’-ngoca’; neng-enneng ta’ acaca pa-apa. Sateya la napa’ baktona Sengko’ ngokoma, Sengko’ acerrenga akantha babine’ se rembi’a.

15Gunong ban gumo’ bi’ Sengko’ epakajala, bu-tombuwanna epaeloba. Ra-corana ban songayya epadaddiya sagara beddhi, ga-talagana epakerrenga.

16Tang bangsa se buta bi’ Sengko’ etontona lebat rong-lorong se ta’ ekataowe reng-oreng jareya; reng-oreng jareya bi’ Sengko’ eaterra e lan-jalan se ta’ ekataowe sabellunna. Se petteng bi’ Sengko’ epatera’a kaangguy bangsa jareya, jalan se gem-celgem eparata’a. Jareya se elakonana Sengko’ kaangguy reng-oreng jareya, ban tanto ejalannagi kabbi bi’ Sengko’ reya.

17Oreng se parcaja ka arca brahala ban nganggep ca-arca jareya menangka dibana, bakal eya’-seya’a ban epamalowa."

18Dhabuna PANGERAN, "Edhingngagi reng-oreng se kopok kopengnga! Abassagi, reng-oreng se buta matana!

19Sapa se abuta’an dhari Isra’il Tang abdi reya? Sapa se akopogan dhari Tang otosan?

20Isra’il, bannya’ se etangale’e ba’na, tape ta’ eparduli, kopengnga ba’na abukka’, tape ta’ ngedhingngagi."

21PANGERAN kasokan apareng salamet, Salerana terro sopaja hokomma ehormat ban eagungngagi.

22Tape bangsa jareya la erampok tadha’ karena; reng-oreng jareya etahan e mar-kamar e dhalem tana, ekorong e dhalem ra-penjara. Reng-oreng jareya kurbanna parampogan, ban tadha’ se nyander aberri’ partolongan.

23Sapa e antarana ba’na se ngedhingngagiya parkara reya, ban agateyagiya kaangguy saterrossa?

24Sapa se magi Isra’il me’ olle erampas? Gu ta’ PANGERAN dibi’, ta’ iya? Sengko’ ban ba’na dusa ka Salerana, polana odhi’ ta’ atoro’ ka papakonna, ban ta’ atoro’ ka pangajaranna.

25Daddi sengko’ ban ba’na padha eparassae dadukanna se talebat rajana, epananggung sangsara polana perrang se nako’e parana. Dukana ngello’ Isra’il akantha apoy, tape sengko’ ban ba’na ta’ apangrasa, ban ta’ ajar dhari pangalaman.


  Share Facebook  |  Share Twitter

 <<  Yesaya 42 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel