Dual Panel1PANGERAN adhabu, "He, Babil, mara ba’na toron dhari korse karaja’anna, pas toju’ neng e tana. Sateya ba’na ta’ lowes ban ta’ raddin kantha lamba’na.
2Gilis teppong e pagilisan batona; bukka’ burgu’na ba’na jareya, sengkap errogga sampe’ etangale’e bettessa, pas lengkae ngay-songay.
3Oreng bakal nangaleyana ba’na abangkang, epamalo ban eya-seya. Sengko’ malessa sake’ ate ka ba’na, tadha’ se epalopoda maske settonga."
4Allah se socce se esemba Isra’il mabebas sengko’ ban ba’na, asmana PANGERAN Se Mahakobasa.
5PANGERAN adhabu ka Babil, "Neng-enneng ja’ acaca’an, maso’ ka pettengnga; ba’na ta’ esebbuda pole ‘Ratona sakabbinna karaja’an.’
6Lamba’ Sengko’ peggel ka Tang ommat, bi’ Sengko’ ta’ eanggep Tang andhi’ pole. Reng-oreng jareya bi’ Sengko’ pas ebagi ka ba’na, ban ba’na ta’ neser ka reng-oreng jareya, la’-mala’ se wa-towa bi’ ba’na etendhes ce’ kejjemma.
7Ba’na nyangka daddiya rato salanjangnga, ta’ apangrasa otaba mekkere dhi-budhina.
8Daddi mara edhingngagi Sengko’ reya, he, reng-oreng se nyerser kasennengngan! Ba’na apangrasa aman odhi’na, ban tadha’ se padha ban ba’na. Ca’na pangrasana ba’na, ba’na ta’ kera daddi randha, ban toronanna ba’na ta’ kera mate.
9Tape pera’ sakejja’, e dhalem bakto saare bai, parkara se dhadhuwa’ jareya kalakon kabbi. Maske ba’na ngangguy seher ban wa’-duwa’, lakena ban ana’na ba’na tanto padha erenggut keya.
10Ba’na apangrasa aman e dhalem kajahadanna, parsangka’anna ba’na bi’ Sengko’ ta’ eabassagi tengkana. Ba’na sala jalan polana kabicaksana’an ban pangataowanna dibi’, pangrasana ba’na tadha’ se akantha ba’na.
11Tape ba’na bakal nemmowa balai, elmo seherra ba’na ta’ bisa nolak balai jareya. Ba’na bakal kadhatengngana balai ban ba’na ta’ kera bisa nangkes. Pate bakal dhatengnga dadagan, ta’ eka-sangka sabellunna.
12Paterros ban wa’-duwa’ sarta seherra jareya, se marepot ba’na dhari gi’ kene’na. Sapa tao jareya badha gunana ka ba’na, ekenneng angguy ko’-nako’e so-mosona.
13Ba’na lesso polana kabannya’an babala’an. Soro kang-tokang tebbagga ba’na nyander masalamet ba’na; reng-oreng se la nalektegi saneyap padduna langnge’ ban ajar parkara tang-bintang, ban saneyap bulan ngodha aramallagi baramma papasthenna ba’na.
14Abas, reng-oreng jareya akantha darameyan se ekello’ apoy; masalamet aba’na dibi’ balakka’ ta’ bisa! Rabbangnga apoy ekarassa talebat panassa, banne akantha apoy e bakto kacellebben se maanga’ badanna.
15Jareya gunana tokang ramal monggu ka ba’na se marepot ba’na molae gi’ kene’na; ba’na edina’agi kabbi padha nyengla, tadha’ se aberri’ partolongan settonga."