Dual Panel1PANGERAN adhabu, "Edhingngagi Sengko’, reng-oreng se terro salamedda ban se dhateng menta tolong ka Sengko’. Kaenga’e gunong bato se epa’a’ epadaddi ba’na, ban pangaleyanna bato se ekale sampe’ kalowar ba’na.
2Kaenga’e bangatowana ba’na Ibrahim ban Sara, e bakto Sengko’ ngolok Ibrahim, Ibrahim ta’ andhi’ ana’; bi’ Sengko’ eberkadi, eberri’i toronan sabannya’na.
3Yerusalim, Sengko’ alepora ba’na, ban kabbi se enneng e jur-gujuranna ba’na. Gal-teggalla ba’na se kajal bi’ Sengko’ egabaya bun-kebbunan, akantha Edom, Tang bun-kebbunan se ce’ landhuna. E jadhiya oreng bakal neng-sennengngana ban anga-bunga ban asokkor ngangguy nyanyeyan.
4Edhingngagi pateppa’ Tang sowara, he, Tang bangsa, edhingngagi Tang ca’-oca’, he, Tang ommat. Sengko’ aberri’ Tang pangajaran ka sa-bangsa, Tang kom-hokom bakal nerrangana reng-oreng jareya.
5Kasalameddan baberri’na Sengko’ la para’ dhatengnga; sa’adda Tang kamennangan la para’ napa’a. Sengko’ dibi’ marenta’a sa-bangsa. Ra-nagara se jau te’-nante’an Sengko’ ban te’-nante’an Tang lalakon se parjuga.
6Abassagi langnge’ ban congngo’ bume; langnge’ bakal mosna’a akantha okos ban bume bakal alpo’a akantha kalambi se laju, pandhudhu’na bakal mateya kabbi akantha rengnge’. Tape kasalameddan Tang baberri’ paggun salanjangnga, ban Tang kamennangan ta’ kera badha aherra.
7Mara edhingngagi Sengko’, Tang bangsa, ba’na tao apa se teppa’; Tang pangajaran esempen e dhalem atena ba’na. Ja’ tako’ mon ba’na eco-koco manossa, ja’ kene’ ate mon ba’na eya-seya.
8Reng-oreng jareya bakal tompessa ban mosna’a, akantha kalambi se ekakan ngetnget, akantha kaen buluna dumba se ekakan raprap. Tape kasalameddan Tang baberri’ paggun salanjangnga, Tang kamennangan terros ron-temoron."
9Ngereng ngadek GUSTE, tolong abdidalem sadaja, pasalamettagi abdidalem sadaja sareng kobasaepon Junandalem. Ngereng ngadek akadi gi’ jaman lamba’ e bakto Junandalem maremmok Rahab sareng nyoco naga tase’ kantos mate.
10Junandalem jugan se makerreng tase’, aengnga tase’ raja se ce’ dhalemma. Junandalem abadhi jalan lebat e aeng gapaneka, sopaja reng-oreng se epasalamet Junandalem bisa alengka tase’.
11Daddi reng-oreng se epabebas PANGERAN bakal moleya, maso’ ka Yerusalim sambi rak-soragan, mowana binar polana kasennengngan se langgeng. Reng-oreng jareya anga-bunga ban neng-sennengngan, sossa ban serrona la mosna.
12PANGERAN adhabu, "Sengko’ se alepor ba’na. Arapa ba’na me’ tako’ ka manossa se ta’ langgeng, manossa se ta’ lebbi dhari rebba se bakal ebuwanga?
13Masa’ ba’na loppa ka PANGERAN Panceptana, se ngampar langnge’ ban se masang dhasarra bume? Arapa ba’na saare benteng me’ tako’ ros-terrosan ka pangamogga reng-oreng se nendhes ba’na se la aya-sadhiya mamosna’a ba’na? Sanyatana pangamogga reng-oreng jareya ta’ kera meddhas ka ba’na.
14Reng-oreng se etawan bakal duli eocola; reng-oreng jareya ta’ kera kakorangan kakanan, ta’ kera mate ban ta’ kera maso’ ka koburan.
15Sabab Sengko’ PANGERAN, Allahna ba’na se agaluy tase’ sampe’ omba’na agarudhu’. PANGERAN Se Mahakobasa, jareya Tang nyama.
16Sengko’ se ngampar langnge’ ban masang sar-dhasarra bume. Sengko’ ngoca’ ka Siyon: Ba’na Tang ommat; Sengko’ aberri’ Tang pangajaran ka ba’na ban ngaobi ba’na kalaban Tang kakobasa’an."
17Mara jaga, Yerusalim, jaga! Okoman se epadhateng PANGERAN lantaran dukana la ejalane sampe’ mare bi’ ba’na.
18Dhari pandhudhu’na ba’na tadha’ settonga se noduwagi jalan ka ba’na; dhari se enneng e ba’na tadha’ settonga se nonton ba’na.
19Ba’na nemmo balai dhu kale; polana perrang nagarana ba’na ancor tadha’ kare, ra’yadda kalaparan, padha mate. Tadha’ oreng se neser ban alepor ate.
20E saneyap konco’na lorong reng-orengnga ba’na robbu ta’ andhi’ kakowadan akantha manjangan se ekenneng jira’. Reng-oreng jareya ekenneng babendunna Pangeran, ekenneng bentak Guste Allahna.
21Mara edhingngagi reng-oreng se etendhes, se dhing-tabarindhing akantha oreng mabu’!
22Kantha reya dhabuna PANGERANna ba’na, GUSTE Allahna se la abillai ba’na, "Kasossa’an se eteba’agi Sengko’ ka ba’na lantaran peggella Tang ate, bi’ Sengko’ sateya ecabuda pole. Peggella Tang ate la elang, daddi ba’na ta’ parlo pole nanggung okoman.
23Kasangsara’an jareya bi’ Sengko’ eteba’agiya ka reng-oreng se nendhes ba’na, se tao nyoro ba’na tedhung e tana, se nyek-ngenyek ba’na epakantha lorong se elebadi sokona."