Dual Panel1PANGERAN adhabu, "Mara aera’ saja-kajana! Balai Tang ommat parkara sa-dusana aba’na.
2Tang ommat jareya nyemba ka Sengko’ sabban are, ban terro taowa apa Tang karep, akantha aba’na se teppa’ kalakowanna ban akantha se esto ka Tang hokom. Reng-oreng jareya ngoca’ senneng abakte ka Sengko’ ban terro ka Tang hokom se adil."
3Bangsa jareya atanya, "Apa gunana apowasa mon PANGERAN ta’ ngoladi? Apa gunana ngasorragi aba’ mon Pangeran ta’ marduli?" PANGERAN adhabu, "Sanyatana, sabatara apowasa, ba’na nyare kaontongan dibi’ sambi merres oreng baba’anna.
4Sabatara apowasa, ba’na agaca ban atokar ban ngalakone kakerrasan. Pangrasana ba’na, Sengko’ esanggu ngedhingngagiya sakabbinna du’ana ba’na polana ba’na apowasa?
5Mon ba’na apowasa, ba’na nyeksa aba’na; ba’na nondhu’ akantha rebba; ngampar karong, etaburi abu, pas ekatedhunge e attasanna. Jareya se enyamae apowasa bi’ ba’na? Ca’na ba’na Sengko’ esanggu senneng polana se elakone ba’na jareya?
6Areya’ powasa se ekakarep Sengko’: Bukka’ kalenthongnga panendhessan ban kata’adilan se maberra’, ocol reng-oreng se etendhes.
7Berri’i reng-oreng se lapar sabagiyan dhari kakananna ba’na, tarema reng-oreng galandhangan e bengkona ba’na. Berri’i kalambi reng-oreng se abangkang, ban ja’ nolak taretanna se parlo partolongan.
8Mon kantha jareya sonar bakal dhatengnga nera’e ba’na akantha pajjar, ban ka-lokana ba’na bakal barasa. Sengko’ abarengngana ba’na kaangguy masalamet ba’na. Kahadiranna Sengko’ bakal ngaobana ba’na dhari apa’a bai.
9Mon ba’na adu’a, bi’ Sengko’ ekabbulana. Mon ba’na aera’ ka Sengko’, bi’ Sengko’ esaodana. Ja’ nendhes sasamana pole, ambu se aso-mosowan ban se dujan metenna.
10Berri’ ngakan oreng se lapar ban tolong reng-oreng se tatendhes. Mon ba’na ngalakone jareya, papetteng e sabingkerra ba’na bakal tera’a akantha seyang.
11Sengko’ terrosa nonton ba’na ban makennyanga ba’na e tana se kerreng; Sengko’ terrosa ajaga ba’na sopaja ba’na teptebba sehat ban kowat. Ba’na bakal padha’a ban bun-kebbunan se cokop aengnga, akantha somber se ta’ tao kerreng.
12Kottha se la abit gujur bi’ ba’na bakal epaddegga pole e attassa dhasar se laju. Ba’na bakal esebbuda ‘Bangsa se majaga dhung-geddhung se gujur ban mateppa’ ko-bengko se ancor.’"
13PANGERAN adhabu, "Hormadi are Sabat menangka are kaangguy PANGERAN. Ja’ ngoros kaparlowanna ba’na dibi’ e are jareya. Raya’agi are jareya menangka are se masenneng ate; hormadi arena Pangeran kalaban ta’ ajalanan; bariya keya ja’ alalakon otabana acaca se ta’ parlo.
14Ba’na tanto pas senneng polana ngabdi ka Sengko’. Bi’ Sengko’ reng-oreng sadunnya epahormada ka ba’na. Ba’na bakal sennengnga odhi’na dhari hasella tana sangkolla Yakub, bangatowana ba’na. Sengko’, PANGERAN, la ngoca’."