Dual Panel1Bit nyamana Yerusalim sengko’ acaca’a, bit nyamana Siyon sengko’ ta’ neng-ennengnga, sampe’ Yerusalim salamet, ban kamennanganna nyonar akantha obur e baja malem.
2He, Yerusalim, sa-bangsa bakal nangaleyana kamennanganna ba’na, to-rato bakal ngabasa kaagunganna ba’na. Ba’na bakal eberri’ana nyama anyar, nyama papareng dhari PANGERAN.
3Ba’na bakal daddiya akantha jamang se bagus e astana PANGERAN, jamang karaja’an e astana Allahna.
4Nyamana ba’na la banne ‘Se Edina’agi Lakena’, nagarana ba’na la banne ‘Se Kaseppeyan’. Ba’na bakal enyama’ana ‘Se Ekaase’e Allah’, nagarana ba’na enyama’ana ‘Se La Akabin’, sabab PANGERAN kasokan ka ba’na, Salerana menangka lake ka nagarana ba’na.
5Akantha paraban se ekabine lanceng ngodha, bariya keya ba’na bakal ekarajiya Panceptana. Akantha pangantan lake’ se perak nangale’e binena bariya keya Allah bakal lebura ka ba’na.
6E pagar geddhungnga Yerusalim sengko’ nyaba’ pangawal; se ta’ olle neng-enneng seyang ban malem, tape pangawal jareya kodu terros maemot Allah ka janji se la edhabuwagi Salerana.
7Para pangawal jareya ta’ olle neng-enneng sopaja Allah ta’ terrosa mendel, sabellunna Yerusalim epaddek pole bi’ Salerana, sarta epakasohor e sabingkerra dunnya.
8PANGERAN la ajanji kalaban asompa sompa se bakal elampa’agiya kalaban kobasana: "Sengko’ ta’ magiya gandumma ba’na ka moso pole; anggur se ehasellagi ba’na ollena pello koneng ta’ epaenoma ka oreng manca pole.
9Tape ba’na se makompol hasella tamennanna, bakal ngakana hasel jareya ban ngagungngagiya PANGERAN; ban ba’na se motthek buwana anggurra, bakal ngenoma aengnga e taneyanna Tang Padalemman."
10Pandhudhu’ Yerusalim, mara kalowar lebat labang saketheng, sadhiya’agi lorong kaangguy reng-oreng se moleya. Gabayyagi jalan raja, buwang batona, pamanjeng bul-ombul sopaja sa-bangsa padha tao.
11PANGERAN apessen kantha reya ka saneyap konco’na bume, "Kabala ka reng-oreng Siyon rowa, ‘Abas, PANGERAN Panyalamet la rabu sateya! Eerengngagi reng-oreng se epabebas Salerana.’"
12Reng-oreng jareya bakal enyama’ana: ‘Ommadda Allah se socce’; ‘Ommat se epasalamet PANGERAN’. Yerusalim bakal enyama’ana ‘Kottha se ekaase’e PANGERAN’, ‘Kottha se ta’ edinggallagi Pangeran pole’.