Dual Panel1PANGERAN adhabu, "Langnge’ reya Tang korse keraja’an ban bume katongko’anna Tang soko. Daddi bengko kantha apa se epaddeggagiya ba’na kaangguy Sengko’ reya, ban kennengngan kantha apa se bi’ ba’na ekagabaya Tang kennengngan?
2Alam dunnya Sengko’ se agabay, daddi kabbi pas padha badha. Tape se ekasennengnge Sengko’ oreng se andhap asor, se atobat dhari sa-dusana, se tako’ ban ta’at ka Sengko’.
3Tape bangsa jareya ngala’ sakarebba dibi’; padha senneng ajalannagi kabakteyan kalaban cara se majitjit. Monggu ka reng-oreng jareya tadha’ bidana: ngurbannagi sape lake’ otabana ngurbannagi manossa, ngurbannagi budhu’na dumba ban motel le’erra pate’; ngatorragi gandum ban ngurbannagi dharana babi, ngobbar mennyan ban nyemba arca.
4Daddi Sengko’ ngala’a sakarebba Sengko’ dibi’ keya ban madhatengnga ka reng-oreng jareya balai se nako’e atena. Sabab e bakto Sengko’ lok-ologan, tadha’ oreng se ajawab; e bakto Sengko’ acaca tadha’ ngedhingngagi settonga. Reng-oreng jareya asoka’an alaban ka Sengko’ ban ngalakone kajahadan."
5Mara edhingngagi apa dhabuna PANGERAN, reng-oreng se tako’ ban ta’at ka Salerana, "Lantaran ba’na esto ka Sengko’, badha e antarana bangsana ba’na se baji’ ka ba’na, ban ta’ endha’ akanca’an ban ba’na. Bi’ reng-oreng jareya ba’na ebi-cebbi, oca’na, ‘Dina PANGERANna me’ olle noduwagi kaagunganna me’ olle sengko’ nangale’e ba’na se anga-bunga.’ Tape reng-oreng jareya dibi’ se epamalowa.
6Edhingngagi! Badha monye agarudhu’ e kottha; badha sowara e Tang Padalemman; jareya Tang sowara se males Tang moso!
7Tang kottha se socce akantha babine’ se rembi’ sabellunna ale’-pale’ polana sake’; se rembi’ lalake’ sabellunna arassa sake’.
8Sapa se tao ngedhing barang se kantha jareya? Sapa se tao nangale’e kadaddiyan kantha jareya? E dhimma badha bangsa lahir e dhalem tempo saare? Tape Isra’il la lahir e bakto Siyon buru arassa sake’ tabu’ rembi’a.
9Ba’na ja’ nyangka Sengko’ ngeba Tang ommat ka labangnga rahim, tape bi’ Sengko’ pas ta’ epalahir." Kantha jareya dhabuna PANGERAN.
10Mara padha anga-bunga ban Yerusalim, kabbi oreng se taresna ka kottha jareya! Reng-oreng se tao nyandhang sossa polana kottha jareya, sateya olle anga-bunga.
11Ba’na bakal ngarassa’agiya kobassana kama’moranna, akantha ana’ se nyoso ka ebuna.
12Sabab PANGERAN adhabu, "Bi’ Sengko’ ba’na eberri’ana kama’moran, akantha songay se agili tadha’ ambuna; arta ban dhi’-andhi’na sa-bangsa bakal egiba’a ka ba’na akantha songay se wa-ngalowa. Ba’na akantha ana’ se esosowe ban eemban ebuna, ban elos-ellos e reba’anna.
13E Yerusalim bi’ Sengko’ ba’na elepora akantha ebu se alepor ana’na.
14Mon nangale’e jareya ba’na tanto gumbira, ba’na tanto pas baras ban soga’ akantha rebba se ngodha. Tang abdi kabbi tanto pas ngalame Tang kakobasa’an, ban Tang so-moso bakal ngarassa’agiya peggella Tang ate."
15Ongguwan, PANGERAN bakal rabuwa ban apoy; netenana karetana se akantha kaleng busbus, ngokoma reng-oreng se mapeggel panggaliyanna, ban abentaga epakaja.
16Sabab sakabbinna oreng se etemmo andhi’ sala bakal eokoma ban apoy sarta peddhang, ban se eokoma mate talebat bannya’na.
17PANGERAN adhabu, "Reng-oreng se ababerse polana noro’a rak-aragan ka bun-kebbun kaangguy ba-diba ban abakte ka ba-diba jareya, bakal mosna’a kabbi abareng ban reng-oreng se ngakan dagingnga babi ban tekos ban kakanan laen se majitjit.
18Sengko’ tao ka pekkeranna ban lalakonna reng-oreng jareya. Sengko’ dhateng makompola reng-oreng dhari sakabbinna bangsa. E bakto padha akompol reng-oreng jareya bakal nangaleyana Tang kobasa.
19Sengko’ masanga tandha e nga’-tengnga’anna reng-oreng jareya. Badha sakone’ e antarana reng-oreng jareya se bi’ Sengko’ epasalamedda. Bi’ Sengko’ eotosa ka sa-bangsa e ra-nagara se jau se gi’ ta’ tao ngedhing parkara Sengko’ ban se ta’ tao nangale’e kaagungan ban kobasana Sengko’, iya areya ka Tarsis, Libiya, ban Lidiya ban kang-tokang panana se ter-penter, ka Tubal ban Yunani. Reng-oreng jareya bakal aberta’agiya kaagunganna Sengko’ e antarana sa-bangsa jareya.
20Dhari ra-nagara jareya reng-oreng buru bakal ngeba’a abali tan-taretan sabangsana menangka tor-ator ka Sengko’. Tan-taretan sabangsana jareya bi’ reng-oreng jareya bakal egiba’a ka Tang gumo’ se socce e Yerusalim epanompa’a jaran, hemar ban onta, ban kareta sarta jikar, akantha kapprana mon oreng Isra’il ngeba ka Padalemman Socce tor-ator se aropa gandum se ebaddhai baddha se berse.
21Sabagiyan e antarana reng-oreng jareya bi’ Sengko’ epadaddiya imam ban oreng Lewi.
22Akantha langnge’ se anyar ban bume se anyar pagguna tahan lantaran Tang kobasa, bariya keya toronanna ba’na ban nyamana bakal pagguna saterrossa.
23Sabban Bulan Ngodha ban sabban are Sabat ommat manossa bakal dhatengnga kabbi nyemba’a ka Sengko’ e Yerusalim.
24Pamangkadda, reng-oreng jareya bakal nangaleyana mayyidda reng-oreng se aberonta’ ka Sengko’. Ola’ se ngakan reng-oreng jareya ta’ kera mate, ban apoy se ngello’ reng-oreng jareya ta’ kera mate; paanaban jareya talebat nako’e monggu ka sakabbinna oreng."