Dual Panel1Dhaera e temorra Yordan, dhari Cora Songay Arnon terros ongga ka Cora Yordan sampe’ gan Gunong Hermon e bagiyan dhaja la erebbu’ ban ekobasae oreng Isra’il. Badha rato kadhuwa se epakala bangsa Isra’il jareya.
2Se settong anyama Sihon, rato Amori se alenggi e Hesybon. Saparona dhaera Gileyad tamaso’ baba kakobasa’anna: dhari Aroër (e penggirra Cora Arnon) ban kottha se badha e nga’-tengnga’anna cora jareya sampe’ gan Songay Yabok e batessa dhaerana bangsa Amon;
3bariya keya dhaera Cora Yordan se bagiyan temor, dhari Talaga Galilea ka lao’ sampe’ gan Bet-Yesimot (e temorra Tase’ Mate), terros ka babana Gunong Pisga.
4Rato laen se epakala bi’ oreng Isra’il iya areya Rato Og dhari nagara Basan, se alenggi e Asytarot ban Edrei. Rato jareya re-karena bangsa Refa’im se gi’ odhi’.
5Se maso’ baba kakobasa’anna iya areya Gunong Hermon, Salkha, ban Basan sampe’ gan dhaera Gesur ban Ma’akha; bariya keya saparona dhaera Gileyad sampe’ gan dhaerana Rato Sihon e kottha Hesybon.
6Jareya rato se kadhuwa se epakala Mosa ban reng-oreng Isra’il. Tanana to-rato jareya bi’ Mosa, abdina PANGERAN rowa, eparengngagi ka suku Ruben, Gad ban saparona suku Manasye epadaddi andhi’na.
7To-rato se epakala Yusak ban reng-oreng Isra’il iya areya to-rato e dhaera e bara’na Songay Yordan, dhari Ba’al-Gad e Cora Libanon terros sampe’ gan Pagunongan Gundhul e bagiyan lao’ e seddi’na Edom. Dhaera jareya bi’ Yusak egi-bagi ka ku-sukuna bangsa Isra’il epadaddi andhi’na.
8Se tamaso’ baba kakobasa’an jareya iya areya dhaera pagunongan, dhaera babana gumo’ e bagiyan bara’, Cora Yordan ban dhaera e babana gumo’na, dhaera e reng-erengnga gunong e bagiyan temor, ban dhaera ra-ara beddhi e bagiyan lao’. Jareya kabbi bekkas dhaera kennengnganna bangsa Het, Amori, Kana’an, Feris, Hewi ban Yebus.
9To-rato se epakala bannya’na kabbi tello polo settong oreng, iya areya to-rato dhari tha-kottha reya: Yerikho, Ai (e seddi’na Betel), Yerusalim, Hebron, Yarmut, Lakhis, Eglon, Gezer, Debir, Geder, Horma, Arad, Libna, Adulam, Makeda, Betel, Tapuwah, Hefer, Afek, Lasaron, Madon, Hazor, Simron-Meron, Akhsaf, Ta’anakh, Megido, Kedes, Yokneyam (e Karmel), Dor (e paseser), Goyim (e Galilea) ban Tirza.
10(12:9)
11(12:9)
12(12:9)
13(12:9)
14(12:9)
15(12:9)
16(12:9)
17(12:9)
18(12:9)
19(12:9)
20(12:9)
21(12:9)
22(12:9)
23(12:9)
24(12:9)