Dual Panel1Tapel batessa tana se etantowagi menangka andhi’na toronanna Yusup, molae dhari Songay Yordan e seddi’na Yerikho e temorra ber-somberra aeng Yerikho sampe’ ka sagara beddhi. Dhari Yerikho, tapel bates jareya ongga sampe’ ka Betel e bagiyan pagunongan.
2Dhari Betel, bates jareya nojju ka Lus, lebat Atarot, iya areya kennengnganna oreng Arki.
3Dhari jadhiya garis jareya nojju ka bara’ ka dhaerana kaom Yaflet, sampe’ ka Bet-Horon-Onjur, terros ka Gezer, sampe’ gan Tase’ Tengnga.
4Jareya bagiyan se ebagi ka suku Manasye ban Efraim, toronanna Yusup, epadaddi andhi’na dibi’.
5Areya’ tes-batessa tana se ebagi ka ga-kalowarga e dhalem suku Efraim. E bagiyan temor, tapel batessa tana jareya molae dhari Atarot-Adar sampe’ ka Bet-Horon-Olo,
6pas terros nojju ka Tase’ Tengnga. Mikmetat badha e dhaja’anna. E bagiyan temorra, tapel bates jareya abiluk nojju ka Ta’anat-Silo, ngalebadi bagiyan temorra nojju ka Yanowah.
7Dhari jadhiya tapel bates jareya toron ka Atarot ban Naharat, terros noro’ penggirra Yerikho sampe’ gan Songay Yordan.
8E bagiyan bara’, tapel bates jareya molae dhari Tapuwah sampe’ gan Songay Kana, ambu gan Tase’ Tengnga. Jareya tana se ebagi ka ga-kalowarga e dhalem suku Efraim, epadaddi andhi’na,
9tamaso’ tha-kottha kene’ ban disa se badha e dhaerana Manasye.
10Tape suku Efraim ta’ ngojuk oreng Kana’an dhari dhaera Gezer. Jareya sababba arapa me’ sampe’ sateya oreng Kana’an gi’ badha neng e Gezer apolong ban oreng Efraim, tape oreng Kana’an jareya epaksa alako daddi dunorra oreng Efraim.