Dual Panel1Saellana bangsa jareya la entas kabbi, PANGERAN adhabu ka Yusak,
2"Pele oreng dhubellas, dhari saneyap suku kala’ kasorang.
3Reng-oreng jareya soro ngala’ bato dhubellas meggi’ dhari tengngana Songay Yordan, teppa’ e kennengnganna mam-imam gella’ manjeng. Bato jareya soro giba ka kennengnganna ba’na akemah dhaggi’ malem."
4Yusak adikane oreng dhubellas se kapele,
5pas adhabu, "Kassa’ entar ka tengngana Songay Yordan, e adha’anna Petthe Parjanjiyan. Ba’na ngala’ bato settong ebang e jadhiya, bannya’na bato jareya dhubellas meggi’, padha ban bannya’na suku bangsa Isra’il.
6Bato jareya bakal maenga’a bangsa Isra’il ka sabarang se elampa’agi Pangeran. E budhi are mon na’-ana’na ba’na atanya apa artena to-bato jareya,
7balai ja’ aengnga Songay Yordan ambu ta’ agili e bakto Petthe Parjanjiyanna PANGERAN eosong alengka songay jareya. To-bato jareya bakal maenga’a bangsa Isra’il ka kadaddiyan e kennengngan jareya."
8Oreng se dhubellas jareya ajalannagi papakonna Yusak. Menorot petoduna PANGERAN ka Yusak, reng-oreng jareya ngala’ bato dhari nga’-tengnga’anna Songay Yordan, bannya’na dhubellas meggi’, padha ban bannya’na suku bangsa Isra’il, bato jareya pas egiba settong ebang ka parkemahanna.
9E nga’-tengnga’anna songay jareya keya, Yusak mondhut bato dhubellas meggi’, laju esoson teppa’ e kennengnganna pamanjengnganna mam-imam se mekol Petthe Parjanjiyan. (To-bato jareya gi’ badha e jadhiya sampe’ sateya.)
10Mam-imam gella’ paggun manjeng e nga’-tengnga’anna Songay Yordan sampe’ reng-oreng jareya la mare ngalakone sabarang se edhabuwagi PANGERAN kalaban parantara’anna Yusak. Jareya cocok ban petoduna Mosa ka Yusak. Oreng Isra’il entas Songay Yordan epaceppet.
11Saellana oreng jareya la padha alengka songay kabbi, mam-imam se mekol Petthe Parjanjiyan rowa ajalan e bagiyan dha’-adha’ kadibi’, e adha’na reng-oreng Isra’il laenna.
12Akantha se edhabuwagi Mosa, reng-oreng se epaperranga dhari suku Ruben, Gad ban saparona suku Manasye la alengka songay kaadha’.
13Kabbi badha pa’ polo ebu lalake’an se ngeba gagaman ban asadhiya se aperranga. E ajunanna PANGERAN reng-oreng jareya alengka songay, terros ka tana maba e seddi’na Yerikho.
14E are jareya PANGERAN alampa’agi hal-hal se andaddiyagi ommat Isra’il ngargai Yusak menangka oreng raja. Saomorra reng-oreng jareya ngormadi Yusak akantha se ngormadi Mosa.
15Saellana jareya PANGERAN makon Yusak
16marenta’agi mam-imam se mekol Petthe Parjanjiyan rowa sopaja ongga dhari Songay Yordan.
17Yusak alampa’agi apa se edhabuwagi Pangeran jareya.
18Mam-imam jareya buru napa’ ka penggirra songay, aengnga songay gella’ agili pole wa-ngalowa akantha asalla.
19Ommat Isra’il napa’ ka bara’na Songay Yordan e tanggal sapolo bulan settong, pas akemah e Gilgal e temorra Yerikho.
20E jadhiya Yusak nyoson bato se dhubellas meggi’ se ekala’ dhari Songay Yordan gella’.
21Yusak pas adhabu ka reng-oreng Isra’il, "E budhi are mon na’-ana’na ba’na atanya apa artena bato se esoson reya,
22careta’agi kadaddiyan e bakto ommat Isra’il alengka Songay Yordan reya, lebat e tanana se kerreng.
23Careta’aja’ aengnga songay reya bi’ GUSTE Allahna ba’na epakerreng, sampe’ ba’na kabbi napa’ ka bara’ songay, padha ban e bakto Salerana makerreng dhasarra Tase’ Galagas e bakto sengko’ ban ba’na entasa tase’ jareya,
24sopaja oreng sadunnya padha’a tao saapa kakobasa’anna PANGERAN, ban ba’na kalaban cara se kantha jareya bakal amolja’agiya GUSTE Allahna salanjangnga."