Alkitab Mobile SABDA
[VER] : [MAKASAR]     [PL]  [PB] 
 <<  1 Raja-raja 1 >> 

1Kamma-kamma anne toa sikalimi Karaeng Daud. Manna pole nikalimbuki kalimbu’ kapala’, tuli dingingiji nasa’ring.

2Jari nakanamo sikamma pagawena, "O Karaeng, bajikangngang nipa’boyangki se’re tulolo untu’ angngagangki’ ammantang siagang amparakaiki’. Lanaagangki’ sikatinroang sollanna kammu’ kisa’ring."

3Jari nipa’boyammi ri sikontu Israel se’re tulolo ga’gaya. Ri Sunem nia’mo nigappa sitau tulolo sannaka ga’gana, niarenga Abisag. Nierammi mae ri karaenga, nampa najagai siagang naparakai karaenga. Mingka tena nasikatinroang karaenga siagang ia.

4(1:3)

5Nasaba’ matemi Absalom, jari Adonia, ana’ bura’nena Daud makaruaya a’jari kaminang toa. Amma’na niarengi Hagit. Adonia iamintu ana’ gammara’. Tale’bakai manggena angkalarroi punna ampanggaukang sala. Adonia ero’ dudui a’jari karaeng. Jari napasadiakammi untu’ kalenna siapa are jaina kareta pa’bundukang siagang tantara a’jarang kammayatompa limampulo tau untu’ pangawala’ ri kalenna.

6(1:5)

7A’lampami sipa’bicara siagang Yoab siagang Imang Abyatar. Amma’na Yoab niarengi Zeruya. Yoab siagang Imang Abyatar situjui untu’ ambantui usahana Adonia.

8Mingka Imang Zadok, Benaya ana’na Yoyada, Na’bi Natan, Simei, Rei siagang pangawala’ ri kalenna Karaeng Daud, tena nammenteng ri Adonia.

9Ri se’reang allo, ri tampa’ niarenga Batu Ulara’ ri ampi’na timbuseng je’ne’ En-Rogel, Adonia assaremi koro’bang gimbala’, sapi laki siagang ana’ sapi co’mo’-co’moka. Naundammi ana’-ana’ bura’nena Karaeng Daud maraenga, siagang pagawe-pagawena balla’ karaeng battua ri suku Yehuda mange ri anjo passua’-suarrang koro’banga.

10Mingka Salomo, andi’na, siagang Na’bi Natan kammayatompa Benaya siagang sikamma pangawala’ ri kalenna Karaeng Daud, tena naundangi.

11Jari a’lampami Na’bi Natan angngagangi sibuntulu’ Batsyeba, amma’na Salomo, nampa nakana ri ia, "Tena kilangngereki kabara’na angkanaya Adonia, ana’ bura’nena Hagit, le’ba’mi naangka’ kalenna a’jari karaeng, nampa tena sikali napangngassengi Daud anjo passalaka?

12Erokki’ sollanna salama’ Salomo siagang kalenta. Jari kupakaingakki’,

13linta’ maki’ andallekang ri Karaeng Daud, nampa kipauang angkana, ‘Sai ikatte tonji le’ba’ assumpa ri nakke karaeng angkanaya anakku Salomo la’jari karaeng untu’ ansambeangki’? Kamma-kamma anne, angngapa na Adonia a’jari karaeng?’"

14Nampa nakanamo pole Na’bi Natan, "Sallang, lalang a’bicarata siagang karaenga, lantama’ tonga’ untu’ lampakajarreki anjo kananta."

15Jari a’lampami Batsyeba mange andallekang ri karaenga ri kamara’na. Anjo wattua toa sikalimi karaenga. Abisag, anjo tulolo battua ri Sunem, sitabangi nalayani karaenga.

16Su’ju’mi Batsyeba ri dallekanna karaenga. Nampa akkuta’nammo karaenga angkana, "Apa nueroki?"

17Appialimi Batsyeba angkana, "O karaeng mala’biri’, le’ba’ maki’ assumpa ri nakke lanri arenNa Batara, Allata’alana karaengku, angkanaya anakku Salomo la’jari karaeng untu’ ansambeangki’.

18Mingka kamma-kamma anne tena nakiassengi angkanaya Adonia a’jari karaemmi.

19Le’ba’mi assare jai koro’bang gimbala’, sapi laki, siagang ana’ sapi co’mo’-co’moka. Le’ba’ tommi naundang mae ri passua’-suarranga ana’-ana’ bura’neta siagang Imang Abyatar, kammayatompa Yoab, panglima tantarata. Mingka, tena naundangi Salomo.

20Karaeng mala’biri’, sikontu ra’ya’ Israel kamma-kamma anne attayang-tayangi kaputusang battu ri katte angkanaya inai lansambeangki’ a’jari karaeng.

21Punna tena kissare kaputusang, ma’nassa punna mateki’, inakke siagang anakku lanipare’ kammama’ musu."

22Lalang a’bicarana ija Batsyeba, battumi Na’bi Natan ri balla’na karaenga.

23Nampa nipauammi karaenga angkanaya niaki Na’bi Natan. Assulu’mi Batsyeba, nampa antama’ Na’bi Natan, siagang su’ju’ ri dallekanna karaenga.

24Nakanamo Natan, "Karaeng mala’biri’, apaka le’ba’mi kipauang ra’yaka angkanaya Adonia lansambeangki’ a’jari karaeng?

25Annemi alloa nale’ba’ assare jai koro’bang gimbala’, sapi laki, siagang ana’ sapi co’mo’-co’moka. Yangaseng ana’-ana’ bura’neta naundangi. Kammayatompa sikamma panglima tantarata siagang Imang Abyatar. Kamma-kamma anne sitabangi ke’nanga assua’-suara’ siagang akkiok-kio’ rannu angkana, ‘Attalasaki Karaeng Adonia!’

26Mingka, tena nanaundanga’. Imang Zadok siagang Benaya, kammayatompa Salomo tena todong naundangi.

27Apaka ikatte ansuroi anggaukang ngasengi anjo sikammaya nampa tena nakipauangi sikamma pagaweta angkanaya inai lansambeangki’?"

28Nakanamo Daud, "Kioki Batsyeba." Jari assulu’mi Na’bi Natan siagang antama’ pole Batsyeba andallekang ri karaenga.

29Nampa nakanamo karaenga ri ia, "Memang le’ba’ma’ a’janji ri kau, lanri arenNa Batara, Allata’alana Israel, angkanaya Salomo ana’nu lansambeanga’ a’jari karaeng. Jari kamma-kamma anne a’janjia’ ri kau, lanri Batara mattallasaka, Ia le’baka allappassanga’ battu ri sikontu kasukkarrangku, angkanaya anne memang alloa nalakurupai janjingku mae ri kau."

30(1:29)

31Su’ju’mi Batsyeba siagang nakana, "Mattallasakki’ karaeng untu’ satunggu-tungguna!"

32Nampa nasuro kio’ karaenga Imang Zadok, Natan, siagang Benaya. Battunamo ke’nanga,

33nakanamo karaenga mae ri ke’nanga, "Kioki sikamma perwira tantaraku siagang a’lampako siagang ke’nanga mange ri anakku Salomo. Panaiki ri keledai kalengku, siagang erangi mange ri timbuseng je’neka ri Gihon.

34Anjoreng musti niangkaki ri Zadok siagang Natan a’jari karaeng Israel. Le’baki anjo musti nupasa’rai tarompeka nampa akkio’ rannuko angkana, ‘Mattallasaki Karaeng Salomo!’

35Nampa nururungang ammotere’ mae anrinni untu’ ammempo ri empoang kakaraengangku, lanri iami kupile a’jari karaeng untu’ ansambeanga, ammarenta Israel siagang Yehuda."

36Appialimi Benaya angkana, "Baji’mi karaeng mala’biri’, poro Batara, Allata’alana karaengku, ampakajarreki anjo parentana karaeng.

37Antekamma bateNa Batara le’ba’ anrurungangki’, poro Iatommi anrurungangi Salomo. Tapporo Batara ampa’jari la’bi poreangngangi pamarentahanna na pamarentahanta."

38Jari Zadok, Natan, Benaya, siagang pangawala’ ri kalenna karaenga nasuromi Salomo nai’ ri keledaina karaenga, nampa narurungang mange ri timbuseng je’neka ri Gihon.

39Nampa angngalle Zadok minynya’ zaitun le’baka naerang battu ri KemaNa Batara, nampa naminynyaki na naangka’ Salomo a’jari karaeng. Nipasa’rami tarompeka nampa sikontu tau hadereka anjoreng akkio’mi angkana, "Mattallasaki Karaeng Salomo!"

40Nampa a’lampa ngasemmo ke’nanga anrurungangi ammotere’ siagang akkio’ a’rannu-rannu, appasa’ra suling, sa’genna sanrapangi tappue buttaya napakamma anjo kasuarranga.

41Adonia siagang toananna silalonna le’ba’ assua’-suara’, ri wattunna nalangngere’ ke’nanga anjo kasuarranga. Ri wattunna nalangngere’ Yoab sa’ra tarompeka, akkuta’nammi angkana, "Apa kajariang ri kotaya sa’genna suara’ sikali?"

42Tenapa nale’ba’ a’bicara Yoab, ti’ring battumi Yonatan, ana’na Imang Abyatar. Nakanamo Adonia, "Antamakko mae. Ikau tau bajikko, tantu kabara’ baji’ todong nuerang."

43Appialimi Yonatan angkana, "Pammopporanga’. Karaeng Daud le’ba’mi naangka’ Salomo a’jari karaeng!

44Zadok, Natan, Benaya, siagang pangawala’ kalenna karaenga le’ba’mi nisuro anrurungangi Salomo. Nipanai’mi Salomo ri ke’nanga ri keledai kalenna karaenga,

45siagang le’ba’mi niminynyaki na niangka’ ri Zadok siagang Natan ri timbuseng je’neka ri Gihon. Kamma-kamma anne ammotere’mi ke’nanga mange ri kotaya a’rannu-rannu siagang assua’-suara’, siagang suara’ lompomi kotaya. Iaminjo kasuarrang kilangngereka sumpaeng.

46Salomo kamma-kamma anne a’jari karaemmi.

47Ba’lalo sikamma perwira tantarana karaenga a’lampa ngasemmi mange ampasalamaki Karaeng Daud. Nakana ke’nanga, ‘Tapporo Allata’alana karaeng ampa’jari Salomo la’bi masahoro’ na ikatte; tapporo poreangngangi pamarentahanna Salomo na pamarentahanta.’ Nampa ri katinroanna su’ju’mi Karaeng Daud anynyomba ri Allata’ala,

48appala’ doang angkana, ‘Nipujiki’, o Batara, Allata’ala nasombaya umma’ Israel. Anne alloa kalase’renna turungangku le’ba’mi Kiangka’ a’jari karaeng untu’ ansambeanga’. Siagang iKattemi ansarea’ kasampatang attallasa’ untu’ ansa’bi!’"

49Sikamma toananna Adonia a’jari malla’ ngasemmi, sa’genna ammenteng ngasemmo ke’nanga nampa a’lampa, massing a’boya oloang kalenna.

50Jari sanna’mi malla’na Adonia mae ri Salomo, sa’genna larimo mange ri KemaNa Batara anta’galaki sikamma cappa’na tampa’ pakkoro’bangnganga anjoreng.

51Napaumi taua anjo passalaka mae ri Karaeng Salomo. Napaumi ke’nanga angkanaya lanri malla’na Adonia mae ri Salomo, na’lampamo mange ri tampa’ pakkoro’bangnganga anta’galaki sikamma cappa’na tampa’ pakkoro’bangnganga siagang nakana, "Tena kula’lampa battu anrinni punna tenapa nassumpa Salomo mae ri nakke angkanaya tena nalanabunoa’."

52Appialimi Salomo angkana, "Punna bajiki panggaukanna, tena nalanihukkung manna sike’de’. Mingka punna appanggaukang ja’dalaki, musti nibunoi."

53Nampa nasuromo karaenga a’lampa taua mange angngallei Adonia battu anjoreng. Jari battumi Adonia andallekang ri karaenga, siagang su’ju’ ri dallekanna. Nakanamo karaenga, "Akkulle mako ammotere’!"


  Share Facebook  |  Share Twitter

 <<  1 Raja-raja 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran