Alkitab Mobile SABDA
[VER] : [MAKASAR]     [PL]  [PB] 
 <<  1 Raja-raja 16 >> 

1Jari a’bicarami Batara mae ri Na’bi Yehu ana’na Hanani, angkana, "Pabattui mae ri Baesa anne pappasangKu, angkanaya,

2‘Riolo teaiko apa-apa, mingka Kuangkakko a’jari pamimping ri ummakKu Israel. Kamma-kamma anne doraka mako sangkamma Yerobeam siagang ikaumi passabakkang nadoraka ummakKu Israel, sa’genna nupakabattu larroKu.

3Lanri kammana anjo, laKupa’lanynyakko siagang kaluarganu sangkamma apa le’baka Kugaukang mae ri Yerobeam.

4Anggota kaluarganu ia matea ri kotaya lanakanrei kongkong, siagang ia matea ri pantarang kotaya lanakanrei jangang-jangang.’"

5Nipabattumi ri Na’bi Yehu anjo pasanNa Batara mae ri Baesa, lanri a’gau’ ja’dala’na Baesa ri dallekanNa Batara, napakabattui larroNa Batara, jari teai lanri nabunona ngaseng kaluargana Yerobeam bawang. Riwaya’ maraengannaya ri sesena Baesa, kammayatompa kabaranianna, le’ba’mi nicata’ lalang ri kitta’ Riwaya’na sikamma karaeng Israel. Matemi Baesa nampa nitarawang ri Tirza. Ela, ana’ bura’nena, ansambeangi a’jari karaeng.

6(16:5)

7(16:5)

8Ri taung makaruampulona angngannang pamarentahanna Karaeng Asa ri Yehuda, Ela ana’na Baesa a’jari karaeng ri Israel. Ammarentai ri Tirza ruan taung sallona.

9Zimri, sitau perwira a’jari komandanga ri bage ruana pasukang karetaya, assikongkoloki angngewai Ela. Ri se’reang allo ri Tirza, angnginung-nginungi Ela sa’genna nasa’ring ri balla’na Arza, kapala ruma tanggana balla’ kakaraenganga.

10Nampa antama’mo Zimri ambunoi Ela; nampa a’jari karaemmo ansambeangi Ela. Anjo kajariangi ri taung makaruampulona antuju wattu pamarentahanna Karaeng Asa ri Yehuda.

11Tasalloai a’jari karaennamo Zimri, nabuno ngasemmi sikontu kaluargana Baesa. Ba’lalo sikontu bija-bijanna Baesa bura’nea kammayatompa agang-aganna kaluargana tena todong ta’lappasa’.

12Situru’ apa le’baka Napau Batara mae ri Baesa tete ri Na’bi Yehu, sikontu kaluargana Baesa nibuno ngasengi.

13Baesa siagang Ela, ana’na, anynyombai rewata-rewata, siagang a’jari passabakkangi nadoraka tu Israel. Lanri kammana anjo, napakabattumi ke’nanga larroNa Batara, Allata’ala Ia mustia nasomba tu Israel.

14Riwaya’ maraenna Ela le’ba’mi nicata’ lalang ri kitta’ Riwaya’na sikamma karaeng Israel.

15Ri taung makaruampulona antuju pamarentahanna Karaeng Asa ri Yehuda, Zimri a’jari karaeng ri Israel naammarenta ri Tirza tuju allo sallona. Anjo wattua sitabangi tantara Israel nakurung Gibeton, kota tu Filistin.

16Nalangngere’na ke’nanga angkanaya sikongkolo’mi Zimri siagang le’ba’mi nabuno karaenga, ia memang anjo alloa ri kemana ke’nanga, naangka’mi ke’nanga Omri, iamintu panglimana ke’nanga, a’jari karaeng Israel.

17Nampa Omri siagang pasukanna nabokoimi Gibeton nampa a’lampa mange angkurungi Tirza.

18Ri wattu nacini’na Zimri angkanaya niempoimi ri musu anjo kotaya, antama’mi ri balla’ kakaraenganga nampa natunu anjo ballaka napasitunu kalenna, sa’genna matemo.

19Anjo kajariangi lanri nagaukanna apa-apa ja’dalaka ri dallekanNa Batara. Sangkamma Karaeng Yerobeam, Zimri doraka tongi ri Batara, siagang a’jari passabakkang nadoraka todong umma’ Israel.

20Riwaya’ maraengannaya ri sesena Zimri, kammayatompa passikongkolang nagaukanga, le’ba’mi nicata’ lalang ri kitta’ Riwaya’na sikamma karaeng Israel.

21Kajariammi passisala-salanga ri bansa Israel lanri nia’ ero’ sollanna Tibni, ana’na Ginat, a’jari karaeng, mingka nia’ todong ero’ sollanna Omri a’jari karaeng.

22Kale’bakkanna tau ammenteng mangea ri Omri ammeta. Matei Tibni siagang Omri a’jari karaeng.

23Anjo kajariangi ri taung makatallumpulona asse’re ri pamarentahanna Karaeng Asa ri Yehuda. Sampuloi anrua taung sallona ammarenta Omri salaku karaeng ri Israel. Uru-uruna annang taungi ammarenta ri Tirza.

24Mingka ribokoanganna ammallimi se’re moncong 6.000 doe’ pera’ ballinna battu ri sitau niarenga Semer. Nampa ambangung se’re kota ri anjo monconga siagang naareng Samaria, situru’ arenna Semer, areng patannaya riolo anjo monconga.

25Omri jai panggaukang dosa lompoangngang nanagaukanga karaeng-karaeng ammarentaya rioloanganna.

26Sangkamma Yerobeam, doraka tommi Omri siagang a’jari passabakkang nadoraka tommo tu Israel siagang anynyomba tommi ke’nanga ri rewataya. Lanri kammana anjo na napakabattumo ke’nanga larroNa Batara, Allata’ala Ia mustia nasomba tu Israel.

27Riwaya’ maraengannaya ri sesena Karaeng Omri, kammayatompa sikontu apa le’baka nagaukang, le’ba’mi nicata’ lalang ri kitta’ Riwaya’na sikamma karaeng Israel.

28Matenamo Omri siagang nitarawang ri Samaria, Ahab ana’na ansambeangi a’jari karaeng.

29Ri taung makatallumpulona assagantuju pamarentahanna Karaeng Asa ri Yehuda, Ahab ana’na Omri a’jari karaeng ri Israel na ammarenta ri Samaria ruampulo anrua taung sallona.

30Nagaukammi dosa-dosa lompoanganga ri dallekanna Batara nadosa nagaukanga karaeng-karaeng ammarentaya rioloangannaya.

31Tenapa nasukku’ nasa’ring doraka sangkammaya nagaukanga Yerobeam, ia ba’lalo nabuntingi Izebel ana’na Karaeng Etbaal battu ri Sidon, siagang assambayangi mae ri Baal.

32Ambangungi balla’ passambayangang ri Samaria untu’ Baal, nampa lalang ri anjo balla’ passambayanganga appareki tampa’ pakkoro’bangngang untu’ anjo rewataya.

33Appare’ tongi patung rewata baine niarenga Asyera. Jaiangngangi dosa nagaukanga na dosa le’baka nagaukang sikontu karaeng Israel ammarentaya rioloangannaya. Lanri kammana anjo napakabattumi larroNa Batara, Allata’ala Ia mustia nisomba ri tu Israel.

34Lalang ri wattu pamarentahanna Ahab, nibangummi ammotere’ kota Yerikho ri Hiel, iamintu tu battu ri Betel. Mingka sangkamma apa le’baka Napau la’bi riolo Batara tete ri Yosua ana’na Nun, taenami rua ana’na Hiel: Abiram ana’ toana matei ri wattu napadongko’na pundasina kotaya, siagang Segub ana’ bungkona matei ri wattu napasanna Hiel pakke’bu’-pakke’bu’ lompona anjo kotaya.


  Share Facebook  |  Share Twitter

 <<  1 Raja-raja 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel