Alkitab Mobile SABDA
[VER] : [MAKASAR]     [PL]  [PB] 
 <<  1 Samuel 10 >> 

1Nampa angngalle Samuel botolo’ minynya’ zaitun, na napatiri’ anjo minynyaka irate ri ulunna Saul, siagang nabaumi Saul, na nakana, "Naminyakiko siagang Naangkakko Batara a’jari karaeng mae ri Israel umma’Na. Lanuparentai umma’Na siagang lanukatutui ke’nanga battu ri musu-musunna ke’nanga. Iaminne pammatei mae ri kau angkanaya Napile mako Batara a’jari karaeng mae ri umma’Na:

2Punna nubokoima’ anne alloa, lasibuntulukko siagang rua tu bura’ne ri ampi’na jera’na Rahel ri Zelzah ri daera Benyamin. Lanakana ke’nanga ri kau: Anjo keledai-keledai nuboyaya nibuntulu’mi. Kamma-kamma anne tenamo nalussa’ manggenu ri passala’na anjo olo’-oloka, mingka tuli ia mami napakkuta’nangngang angkanaya apamo musti nagaukang untu’ amboyako."

3Nakana pole Samuel, "Battu anjoreng a’jappa tulusu’ mako sa’genna ri poko’ kayu tampa’ passambayanganga ri Tabor. Anjoreng lasibuntulu’ mako siagang tallu tu bura’ne sitabanga a’jappa mange ri Betel untu’ assare koro’bang mae ri Allata’ala. Sitau anrenreng tallung kayu ana’ bembe, sitau angngerang tallumbatu roti, na sitaua pole angngerang pammoneang rassi anggoro’.

4La’barisallangi ke’nanga mae ri kau, siagang lanasareko ruambatu roti, namusti nutarimai.

5Le’baki anjo musti a’lampamako mange ri bontoNa Allata’ala ri Gibea, tampa’ kemana tu Filistin. Ri pakke’bu’ antamaya ri kotaya, lasibuntulukko siagang sipa’rappungang na’bi sitabanga naung battu ri bonto pakkoro’bangnganga. A’joge’-jogeki siagang akkiok-kioki ke’nanga, akkarena gambusu’, rabana, suling siagang kacapi.

6Anjo memang wattua lanakoasaiko RohNa Batara siagang lamminawangko a’joge’ kammayatompa lakkiok-kio’ siagang ke’nanga, nampa laniberui sipa’nu a’jari tau maraeng.

7Punna kajariang ngaseng anjo sikammaya, gaukammi apa nukanaya baji’, nasaba’ niaki Allata’ala anrurungangko.

8Le’baki anjo musti a’lampako mange ri Gilgal nuttayang anjoreng tuju allo. Sallang labattua’ untu’ assare koro’bang nitunu siagang koro’bang pappasiama’, nampa kupauangko apa musti lanugaukang."

9Tena sallo nabokoina Saul anjo Samuel, annarimami Saul sipa’ beru battu ri Allata’ala. Na sikontu anjo apa napaua Samuel mae ri ia kajariang memammi anjo alloa.

10Ri wattunna battu Saul siagang palayanna mange ri Gibea, assibuntulu’mi ke’nanga siagang sipa’rappungang na’bi. Anjo memang wattua nikoasaimi Saul ri RohNa Allata’ala, namminawang tommo a’joge’ siagang akkiok-kio’ siagang ngaseng anjo na’bi-na’bia.

11Sikamma tau angngasseng memangai la’bi riolo anjo Saul, nacini’na ke’nanga anjo panggaukanna, massing sikuta’nammi angkana, "Apa le’ba’ kajariang mae ri anjo ana’na Kish? Apa a’jari na’bi tommi anjo Saul?"

12Jari nia’mo tau anjorenga ammantang akkuta’nang angkana, "Turu’ panggappanu, antekamma anjo na’bi-na’bi maraenga, inai manggena ke’nanga?" Iaminjo assala’na paruntu’ kana angkanaya, "Apa a’jari na’bi tommi anjo Saul?"

13Le’baki Saul a’joge’-joge’ siagang akkiok-kio’, a’lampami mange ri tampa’ pakkorobangnganga irate ri bontoa.

14Nicini’mi Saul siagang palayanna ri purinanna. Akkuta’nammi ri ke’nanga angkana, "Battu kemae ngasengko?" Appialimi Saul angkana, "Battua’ amboyai anjo keledai tappelaka. Mingka lanri tenana nabuntuluki ikambe, a’lampa maki’ mange ri Samuel."

15Akkuta’nammi purinanna angkana, "Jari apa nakana ri kau?"

16Appialimi Saul angkana, "Napauanga’ angkanaya nigappami anjo olo’-oloka." Mingka tena nacaritai Saul mae ri purinanna angkanaya le’ba’mi niminynyaki na niangka’ a’jari karaeng ri Samuel.

17Nakio’mi Samuel sikontu ra’ya’ Israel sollanna a’rappungang ri Mizpa.

18Nampa nakana ri ke’nanga, "Iaminne kananNa Batara, Allata’alana Israel, Nakana, ‘Le’ba’ mako Kuerang assulu’ battu ri butta Mesir siagang Kulappassang ngasengko battu ri kakoasanna tu Mesir kammayatompa kakoasanna sikamma bansa maraenga, anjallakkangako.

19Le’ba’ mako Kupassulu’ battu ri kapa’risanga siagang kasessanga, mingka kamma-kamma anne nusorongbokoMa’ salaku Allata’alanu, lanri nupala’na sollanna Kujo’jokangko sitau karaeng untu’ ikau ngaseng. Jari baji’mi, a’rappungang mako ri dallekangKu, anne Bataranu, massing-massing situru’ sukunu siagang bija-bijannu.’"

20Nampa nasuro Samuel sikontu sukua maju mae ri dallekang, na suku Benyamin nipile.

21Ri wattunna maju mae ri dallekang sikamma kaluargaya lalang ri suku Benyamin, kaluarga Matri nataba pile. Kale’bakkanna majumi sikamma tu bura’nea lalang ri kaluarga Matri, nampa Saul ana’na Kish nataba pile. Jari niboyami Saul, mingka tenai.

22Lanri kammana akkuta’nammi taua ri Batara angkana, "O Batara, apaka anjo taua nia’mi anrinni?" Appialimi Batara angkana, "Accokkoi Saul ri bokona barang-barang pakkakasaka."

23Jari akkaro-karomi ke’nanga mange ambuntuli Saul battu anjoreng, nampa naerang antama’ ri tangnga-tangngana ra’yaka. Ammentemmi Saul ri tangnga-tangngana ke’nanga, na iami kaminang tinggi; tu maraenga sa’ge salanggannaji.

24Nampa nakanamo Samuel mae ri ra’yaka, "Iaminne tau nipilea ri Batara, tena sangkammanna ri katte ngaseng." A’gora lompomi sikontu bansaya angkana, "Mattallasaki karaenga!"

25Nampa napakasingara’ Samuel mae ri anjo bansaya antekamma ha’na siagang kawajibanna karaenga, nampa natulisi’ lalang ri se’reang kitta’, nampa naboli’ ri tampa’ matangkasaka. Le’baki anjo nasuromi Samuel anjo sikontu bansaya massing ammotere’ mange ri balla’na.

26Saul ammotere’ tommi mae ri balla’na ri Gibea, nirurungang ri siapa are jaina tugammara’ na barani siagang le’bakamo nipagio’ atinna ri Batara.

27Mingka nia’mo siapa are tau ja’dala’ angkana, "Kemae lakkulle a’matu-matu anne taua mae ri katte?" Nacini’ rawami ke’nanga anjo Saul siagang taerokai ke’nanga assarei hadia. Mingka assara-sarai Saul tanaassenga anjo kammaya.


  Share Facebook  |  Share Twitter

 <<  1 Samuel 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran