Dual Panel1Ri se’reang allo nakanamo Samuel mae ri Saul, "Batara assuroa’ amminynyakiki’ siagang angngangkakki’ a’jari karaeng mae ri Israel umma’Na. Lanri kammana anjo, musti kipilangngeri parentaNa Batara Kaminang Koasaya.
2LaNahukkungi tu Amalek lanri boe-boena ke’nanga naewai tu Israel ri wattunna battu tu Israel ri Mesir.
3Jari a’lampako siagang bunduki tu Amalek na nuancuru’ sikamma apa-apanna ke’nanga. Teako niakki apa-apa nuboli’ tassesa. Bunoi sikontu tu bura’nea, bai’-bainea, ana’-anaka, siagang ana’ loloa. Kammayatompa sapia, gimbalaka, untaya siagang keledaia."
4Nampa napasadiamo Saul tantarana, na narekeng ri Telaim. Nia’ 200.000 tantara battu ri Israel siagang 10.000 tu battu ri Yehuda.
5Le’baki anjo a’lampami Saul siagang ana’ buana mange ri kota Amalek, nampa naruppai musua irawa ri binanga kalotoroka.
6Akkiring tommi pasang pappakainga’ mae ri tu Keni angkana, "A’lampako siagang bokoi tu Amalek, sollanna tena nutappinawang niancuru’ siagang ke’nanga. Nasaba’ riolo boe-boenu napare’ passari’battangangi tu Israel ri wattunna nia’ tu Israel battu ri Mesir." Jari a’lampami tu Keni battu anjoreng.
7Le’baki anjo a’bundu’mi Saul siagang tu Amalek, nampa nabeta ke’nanga ri sikamma aganga battu ri Hawila sa’genna ri Syur ri rayanganna Mesir.
8Sikontu ra’ya’na siagang tantarana tu Amalek nibuno ngasemmi ri Saul. Mingka Agag karaenna tu Amalek najakkala’ attallasaki nanaboli’ Saul siagang tantarana attallasa’. Kammayatompa sikamma gimbala’na siagang sapina kaminang bajika, ana’ sapina siagang ana’ gimbala’na kaminang co’moka, kammayatompa sikontu apa-apa lompoa anggaranna; iaji bawang olo’-olo’ tenaya matu-matunna siagang tenaya anggaranna naancuru’.
9(15:8)
10Nampa Nakanamo Batara mae ri Saul,
11"Assesse’lalangA’ angngangkakko a’jari karaeng, nasaba’ a’bokoko battu ri Nakke, siagang tena nugaukangi apa Kuparentakanga." Si’nami nyawana Samuel, siagang sila’busu’ bangngimi akkunrareng mae ri Batara.
12Ammukona bari’basa’, a’lampami Samuel ero’ mange angngagangi sibuntulu’ Saul. Nipauammi angkanaya a’lampami Saul mange ri kota Karmel untu’ ambangung batu pappakainga’ untu’ kalenna anjoreng, nampa tulusu’ mange ri Gilgal.
13Assibuntulu’na Samuel siagang Saul, nakanamo Saul ri ia, "Tapporo Nabarakkakiki’ Batara bapa’! Le’ba’mi kugaukang Naparentakanga Batara."
14Mingka akkuta’nammi Samuel angkana, "Punna kamma, angngapa nania’ sa’ra sapi siagang sa’ra gimbala’?"
15Appialimi Saul angkana, "Anjo olo’-oloka apa-apa nirampasa’ battu ri tu Amalek. Gimbala’ siagang sapi kaminang bajika naallei ra’yaka untu’ nipassareang a’jari koro’bang mae ri Karaeng Allata’ala, bapa’. Mingka la’binnaya, le’ba’mi nibuno taba sikali."
16Nalangngere’na anjo nakanamo Samuel, "Tayangi sinampe’, lakupauangki’ apa Napaua Allata’ala mae ri nakke ri bangngia." Nakanamo Saul, "Kipaumi."
17Nakanamo Samuel, "Sai ikattemi a’jari pamimping mae ri suku-suku Israel, manna nakikana kalenta tu tuna? Napile maki’ Batara a’jari karaeng mae ri tu Israel.
18Nampa pole Nasuro maki’ Batara angngancuruki anjo tu Amalek ja’dalaka. Nasuroki’ a’bundu’ angngewai ke’nanga sa’genna la’busu’ ngaseng ke’nanga.
19Angngapa natena kigaukangi parentaNa Batara? Angngapa ki’lumba-lumbaeng angngalle barang-barang nirampasa’, siagang lanri kammana anjo nakipakabirisi’ atinNa Batara?"
20Appialimi Saul angkana, "Kuturukimi parentaNa Batara, siagang a’bundu’ma’ situru’ passuroNa mae ri nakke. Agag karaeng Amalek kujakkala’mi nampa sikontu tu Amalek le’ba’mi kubuno.
21Mingka ana’ buaku tena nabuno ngasengi olo’-oloka. Napilei gimbala’ siagang sapi bajika battu ri anjo nirampasaka, untu’ nipassareang a’jari koro’bang mae ri Karaeng Allata’ala ri Gilgal, bapa’."
22Mingka nakanamo Samuel, "Kereanga la’bi Nangai Batara, mappilangngeria yareka koro’bang passarea? La’bi bajikangangi mappilangngeria mae ri Batara, naia assarea koro’bang. Mannurukia bajikangngi na jannana gimbalaka.
23Nasaba’ tamappilangngeria mae ri Batara sangkammai ja’dala’na anggaukanga bale’-bale’ mata, siagang nyawa tampoa sangkammai ja’dala’na anynyomabaya ri rewata. Nasaba’ kiewami parentaNa Batara, natena tommo Naakuiki’ Batara salaku karaeng."
24Nalangngere’na anjo, mangakumi Saul ri Samuel, angkana, "Memang dorakama’. Kudakkaimi parentaNa Batara siagang takujampangiami pitunjutta bapa’. Mallaka’ ri ana’ buaku nakuturukiang pappala’na ke’nanga.
25Mingka kamma-kamma anne, kupalaki ri katte bapa’, kipammopporangi dosaku siagang ammotere’ maki’ mange ri Gilgal siagang inakke, sollangku akkulle assambayang mae ri Batara."
26Mingka appialimi Samuel angkana, "Tena kuero’ ammotere’ siagang ikatte. Kiewami parentaNa Batara, na kamma-kamma anne tenamo Naakuiki’ salaku karaenna Israel."
27Nampa a’bokomo Samuel ero’ a’lampa. Mingka nitahangi ri Saul nanata’gala’ jubana, sa’genna kekke’mo jubana Samuel.
28Nakanamo Samuel ri ia, "Anne alloa Nakekke’mi Batara kakaraenganna Israel battu ri katte, nampa Napassareang mae ri tau maraenga, ia bajikangnganga naikatte.
29Allata’alana Israel Ia Mala’birika tena Na’balle-balle, siagang tena todong naNapinrai pikkiranNa, lanri Ia teai rupatau."
30Appialimi Saul angkana, "Dorakama’. Mingka kitulunga’ bapa’, ammotere’ maki’ siagang inakke sollangku akkulle assambayang ri Karaeng Allata’alata. Lalang kammana, kipakalompoma’ ri dallekanna sikamma pamimpinna bansaku siagang ri dallekanna sikontu tu Israel."
31Jari ammotere’mi Samuel siagang ia mange ri Gilgal, nampa assambayammo Saul mae ri Batara.
32Nampa naparentakammo Samuel angkana, "Erangi Karaeng Agag mae anrinni." Battumi Agag mae ri ia, lompo panrannuang, lanri napikkiriki angkanaya, "Bellami bahaya kamateanga."
33Nakanamo Samuel, "Sangkamma pa’dannu le’baki a’jari passabakkang najai amma’ tappela’ ana’na, kamma tomminjo amma’nu latappela’mi ana’na." Nampa naalle nacancang Samuel anjo Agag ri dallekanna tampa’ pakkoro’bangngang ri Gilgal.
34Le’baki anjo a’lampami Samuel mange ri Rama, nampa Saul ammotere’mi mange ri balla’na ri Gibea.
35Sa’genna kala’busang tallasa’na, tenamo nale’ba’ assibuntulu’ pole Samuel siagang Saul. Mingka si’nai pa’mai’na Samuel lanri assesse’ lalanNa Batara angngangkaki Saul a’jari karaeng mae ri Israel.