Dual Panel1Anjo wattua napagio’ ngasemmi tu Filistin sikontu tantarana untu’ ambunduki Israel. Lanri kammana majumi tantara Israel ri pa’bundukanga. Appare’mi kema ke’nanga ri ampi’na Eben-Haezer. Na tantarana tu Filistin appareki kema ri Afek.
2Appakkaramulami tantara Filistin a’bakka. Na wattu sallonamo heba’ bunduka, kale’bakkanna nibetami tantarana tu Israel, nia’ kira-kira patassa’bu tau mate ri tampa’ pa’bundukanga.
3Ri wattu ammotere’na anjo tantara tassesaya mange ri tampa’ kemaya, nakanamo sikamma pamimpinna tu Israel, "Apa kutadeng saba’na naNalappassangki’ Batara nibeta ri tu Filistin anne alloa? Umba nanialle Patti ParjanjianNa Batara battu ri Silo, na nierang mae anrinni, sollanna ero’ Batara antulungki’ siagang Napasalamakki’ battu ri musua."
4Nampa nia’mo tau nasuro ke’nanga mange ri Silo untu’ angngallei Patti ParjanjianNa Batara, a’jaria empoang kala’biranNa Batara Kaminang Koasaya. Ruaya ana’na Eli, iamintu Hofni siagang Pinehas, anrurungangi anjo Patti Parjanjianga.
5Battunamo anjo Patti Parjanjianga mae ri kemaya, a’gora-gora lompomi tu Israel, sa’genna ta’ge’goso’ buttaya.
6Nalangngere’ tommi tu Filistin gora-gora lompona ke’nanga, sa’genna nakanamo ke’nanga, "Angngapai anjo tu Ibrania na’gora-gora lompo kamma?" Mingka ri wattunna naasseng ke’nanga angkanaya battumi Patti ParjanjianNa Batara mae ri kemana tu Ibrani,
7a’jari malla’mi ke’nanga. Nakanamo ke’nanga, "Nia’ rewata battu ri kemana ke’nanga! Cilaka maki’ anne. Tena le’bakapaki’ angngalami apa kammaya anne.
8Cilaka tojeng maki’. Inaimi akkulle ampasalamakki’ battu ri anjo rewata-rewata kassaka? Sai ia tomminjo rewata-rewataya le’ba’ ambunoi tu Mesirka ri parang lompoa riolo?
9Pa’baraniangi nyawanu, ikau tu Filistin! A’bundu’ mako sangkamma bura’ne. Punna tena, lanapa’jariko ata anjo tu Ibrania, sangkamma ke’nanga riolo a’jari atai mae ri kau ngaseng. Lanri kammana, a’bundu’ mako siagang barani!"
10Nampa a’bundu’ heba’mo tu Filistin sa’genna nabeta tantarana tu Israel. Larimi tu Israel mange ri massing kemana ke’nanga. Ma’nassa nibeta lompo tojengi tu Israel: Tallumpulomi sa’bu tantara tu Israel mate.
11Ia Patti ParjanjianNa Allata’ala nirampasa’mi ri musua, siagang anjo ruaya ana’na Eli, iamintu Hofni siagang Pinehas, mate tommi.
12Nia’ sitau battu ri suku Benyamin lari battu ri tampa’ pa’bundukanga mange ri Silo, na battu mange anjoreng ia memang anjo alloa. Untu’ a’jari pammatei ri susana, nakekke’-kekke’mi care-carena na naboli’ ri ulunna.
13Na Eli, sannaka lussa’na ampikkiriki kasalamakkanna Patti ParjanjianNa Batara, sitabangi ammempo ri kaderaya ri birinna aganga, nia’ nanawa-nawa. Ri wattu napabattuna anjo taua kabaraka angkanaya nibetai Israel, appiraung lompomi sikontu panduduka ri kotaya.
14Nalangngereki Eli anjo tau appiraunga, akkuta’nammi angkana, "Apa anjo gegere’ kamma?" Lalanna anjo wattua anjo taua sumpaeng larimi mae ri Eli. Anrapiki, napabattumi anjo kabara’ kodia.
15Na anjo Eli salapangpulomi assagantuju taung umuru’na, siagang a’birimmi buta.
16Nakana anjo taua ri Eli, "Laria’ anne alloa battu ri tampa’ pa’bundukanga siagang silalongku anne battu." Akkuta’nammi Eli angkana, "Antekamma kabara’na, ana’?"
17Appialimi anjo tungngeranga kabara’ angkana, "Larimi tu Israel ambokoi tu Filistin. Nibeta lompoki’. Jai tau mate. Anatta ruaya, iamintu Hofni siagang Pinehas, mate tommi. Nampa Patti ParjanjianNa Allata’ala nirampasa’mi ri musua!"
18Napabattuna anjo taua kabara’na anjo Patti Parjanjianga, tu’guru’mi Eli battu ri kaderana ri ba’leanna pakke’bu’ lompoa. Lanri toa dudunamo siagang lanri co’mo’na, sa’genna tepo’mo kallonna ri wattunna tu’guru’, na matemo. Patampulo taungi sallona napimping tu Israel.
19Anjo wattua, mintunna Eli, iamintu bainenna Pinehas, sitabangi attianang, Siagang la’birimmi ammana’. Nalangngere’na angkanaya nirampasa’mi Patti ParjanjianNa Allata’ala, siagang mate ngasemmi matoanna siagang bura’nenna, ti’ring ero’mi nasa’ring ammana’. Na tasalloa anjo ammana’mi.
20La’birinnamo mate, nakanamo sikamma bai’-baine niaka antulungi, "Sa’barakko! Bura’ne ana’nu!" Mingka tenamo nappiali, siagang tenamo najampangi ke’nanga.
21Niaremmi anjo anaka Ikabod, na nakana, "Kahaderang kala’biranNa Allata’ala tappela’mi battu ri Israel" — ia napakkanaia iamintu angkanaya Patti ParjanjianNa Karaeng Allata’ala nirampasa’mi siagang matoanna kammayatompa bura’nenna matemi. Lanri kammana nanakanamo, "Kahaderang kala’biranNa Allata’ala tappela’mi battu ri Israel, lanri nirampasa’mi Patti ParjanjianNa Allata’ala."
22(4:21)