Alkitab Mobile SABDA
[VER] : [MAKASAR]     [PL]  [PB] 
 <<  1 Tawarikh 29 >> 

1Nampa nakana Karaeng Daud mae ri sikontu tau a’rappunganga anjoreng, "Battu ri sikontu ana’ bura’neku, Salomomi Napile Allata’ala. Mingka rungka dudu iji siagang kurang iji pangalamanna, naanne jama-jamanga sanna’ lompona. Nampa pole anjo lanibangunga teai balla’ karaeng rupatau, passangalinna balla’ untu’ Karaeng Allata’ala.

2Bahang-bahanna anjo ballaka siagang sikamma pakkakasa’na le’ba’mi kupasadia situru’ pakkulleku. Le’ba’ma’ appasadia bulaeng, pera’, parunggu, bassi, kayu, batu-batu ka’jalaka ballinna, batu-batu paramata, batu-batu sangka’ rupaya warnana untu’ pa’belo-belo, siagang sanna’ jaina batu accilaka.

3Ba’lalo lanri mangngaiku mae ri anjo Balla’Na Allata’alaku, kupassareang tommi perakku siagang bulaengku, iamintu barang-barang kalengku:

4bulaeng kaminang bajika la’bi 100 tong battala’na, siagang pera’ ti’no’ kira-kira 240 tong battala’na untu’ pa’lapisi’na rinring Balla’Na Batara, kammayatompa untu’ barang-barang ia musti najamaya sikamma tau cara’deka ri jama-jamanna. Jari, kamma-kamma anne inaipi pole ero’ assare passare mae ri Batara situlusu’ atinna?"

5(29:4)

6Jari sikamma kapala pa’rappungangang bija-bijaya, kapala sukua, sikamma komandanga siagang ia tanggong jawaka ri barang-baranna karaenga, massing napau tommi angkanaya massing ero’ tongi ke’nanga assare sumbangang.

7Nampa massing-massing assaremo ke’nanga sumbangang untu’ anjo pambangunanna Balla’Na Batara, iamintu: bulaeng la’bi 170 tong battala’na, pera’ la’bi 340 tong battala’na, parunggu a’biringi 620 tong battala’na, siagang bassi la’bi 3.400 tong battala’na.

8Sikamma tau niaka paramatana napassareammi mae ri Yehiel untu’ nipantama’ ri pammolikang barang-baranga untu’ Balla’Na Batara. (Yehiel iami sitau tu Lewi battu ri bijanna Gerson).

9Ra’yaka rella tommi atinna assare ri Batara siagang rannumi pa’mai’na ke’nanga lanri jaina apa akkulle napassareang ke’nanga. Sanna’ tommi rannuna pa’mai’na Karaeng Daud.

10Ri dallekanna anjo tujaia mammujimi Daud ri Batara. Nakana, "O Karaeng Allata’ala nasombaya Yakub boe-boena ikambe, nipujimaKi’ sa’genna satunggu-tungguna!

11Malompo tojengKi’ siagang makoasaKi’. Mala’birikKi’, kabarra-barraKi’, siagang ri Kattemi kalompoanga. Sikontu apa-apa niaka ri langi’ siagang ri buttaya iKatte ngaseng pata, iKatte Karaeng Lompo, makoasaya mae ri sikontu-kontuna.

12Sikontu kakalumanynyanganga siagang kasalewanganga iKatte ngaseng nakabattui; sikontu-kontuna iKatte ngaseng angkoasai lalang kagassinganTa siagang kakoasanTa; iKatte makoasa ampa’jari manna inai-nai a’jari tau lompo siagang magassing.

13Kamma-kamma anne, o Allata’alana ikambe, appala’ sukkuruki ikambe mae ri Katte, siagang mammuji ikambe ri areng mala’biritTa.

14Inakke siagang anne ra’yakku sikontutojenna tena pakkullena assare apa-apa mae ri Katte, lanri yangasenna passareTa tonji. Na anne apa napassareanga ikambe iKatte tonji pata.

15Kiassengi o Batara, angkanaya sangkamma boe-boena ikambe, ikambe anne pole nijappai anne katallassanga sanrapangki’ tubattu-battu bawang. Katallassanna ikambe sanrapanji bayang-bayang allaloa, siagang takkulleai ikambe alliliangi kamateanga.

16O Karaeng, Allata’alana ikambe, sikontu anne barang-barang tinggia anggaranna napa’rappungi ikambe anrinni untu’ ambangung se’re balla’ untu’ iKatte, sollanna akkulle ikambe ampakala’biriki arenTa matangkasaka. Mingka yangasenna anjo apa natarima tonji ikambe battu ri Katte, siagang iKatte tonji pata.

17Kuassengi angkanaya Kiso’ri massing-massing atinna taua, siagang Kingai tau tangkasaka atinna. Lalang ati matulusu’ siagang sannang nakupassareang yangasenna anne mae ri Katte. Kusa’bimi antekamma batena a’rappungang ummatTa anrinni angngerang passare mae ri Katte situlusu’ atinna.

18O Karaeng Allata’ala, Ia nasombaya Abraham, Ishak, siagang Yakub, boe-boena ikambe, poro Kijagai sollanna tuli mangngai ummatTa mae ri Katte sangkamma ri kamma-kammaya anne, siagang Kikutulungi sollanna tena le’bakai mamminra mae ri Katte.

19Kisarei Salomo, ana’ bura’neku, kaerokang attojeng-tojenga untu’ anturuki sikontu parentaTa, siagang untu’ ambangungi anjo balla’ sambayanga, ia le’bakamo kupa’nia’ parsadiaanna."

20Le’baki appala’ doang kamma, nakanamo Daud mae ri tau jai niaka a’rappungang anjoreng, "Mammujiko ri Karaeng Allata’alanu!" Jari yangasenna anjo taua mammuji-mujimi mae ri Batara, Allata’ala nasombaya boe-boena ke’nanga. Nampa su’ju’ ke’nanga untu’ ampakalompoi Batara siagang Karaeng Daud.

21Ammukona ammolommi ke’nanga olo’-olo’ untu’ a’jari koro’bang passare mae ri Batara, nampa nibage-bage mae ri sikontu ra’yaka. Pantaranganna anjo nia’ 1.000 sapi laki, 1.000 gimbala’ laki, 1.000 gimbala’ laki rungkaya nipolong siagang nitunu akkayu irate ri tampa’ pakkoro’bangnganga. Assare tommi ke’nanga anggoro’ ia nitantukanga untu’ massing-massing anjo sikamma koro’banga.

22Anjo alloa angnganre angnginummi ke’nanga siagang rannu pa’mai’ ri dallekanNa Batara. Nampa untu’ makapinruanna nipa’la’bammi nipappiassengang angkanaya Salomo a’jari karaeng. Lalang arenNa Batara, napattantumi ke’nanga angkana Salomo a’jari karaenna ke’nanga siagang Zadok a’jari imang.

23Jari salaku sambenna Daud manggena, nai’mi Salomo ri empoang kakaraengang, ia le’baka Napattantu Batara. Iami karaeng nikangalikang ri sikontu bansa Israel, siagang appakamajui ri jama-jamanna.

24Sikontu pajaba’ pamarentahanga siagang tantaraya sa’genna ana’-ana’ bura’nena Daud maraenganga para naakuimi kakoasanna Salomo salaku karaeng.

25Napa’jarimi Batara sikontu ra’yaka angngali’ mae ri Salomo, siagang Napa’jarimi Salomo karaeng poreanganga na karaeng maraengannaya, sikamma le’baka ammarenta ri Israel.

26Daud ana’na Isai ammarentai ri sikontu Israel

27patampulo taung sallona. Ri Hebron tuju taungi sallona ammarenta, na ri Yerusalem tallumpuloi antallu taung sallona.

28Kalumanynyangi na mala’biri’, siagang toa dudupi nampa mate. Ana’ bura’nena iamintu Salomo ansambeangi a’jari karaeng.

29Ia riwaya’na Karaeng Daud battu ri pakaramulanna sa’genna kala’busanna le’ba’mi nicata’ lalang ri kitta’ Na’bi Samuel, Na’bi Natan, siagang Na’bi Gad.

30Lalang ri anjo Kittaka nicaritai ri antekamma pamarentahanna, kakoasanna, siagang sikontu apa kajarianga mae ri kalenna, mae ri bansa Israel, siagang ri kakaraengang-kakaraengang niaka ri tammulilina Israel.


  Share Facebook  |  Share Twitter

 <<  1 Tawarikh 29 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran