Alkitab Mobile SABDA
[VER] : [MAKASAR]     [PL]  [PB] 
 <<  2 Raja-raja 10 >> 

1Nia’ tujupulo tau ana’ cucunna Ahab ammantang ri kota Samaria. Lanri kammana anjo akkirimmi sura’ Yehu mange ri Samaria, iamintu mae ri sikamma tau a’jari tutoaya mae ri ana’ cucunna Ahab, kammayatompa mae ri sikamma tau anna’galaka pamarentahang siagang tutoa-toana tau jaia ri anjo kotaya. Kammaminne bonena anjo suraka,

2"Sikamma ana’ cucunna Ahab niaki nujagai ngaseng; siagang nia’ ngaseng ri kau kareta bundu’, jarang, sanjata, kammayatompa kota niaka pattahanganna. Lanri kammana anjo, punna nutarima anne suraka,

3pilei memangi linta’ ia kaminang bajika battu ri ana’ cucunna Ahab, nampa nuangka’ a’jari karaeng, nampa barjuangko siagang angngagangngangi."

4Na’jari malla’ kabusu’mo sikamma tau anna’galaka pamarentahang ri Samaria. Nakanamo ke’nanga, "Manna Karaeng Yoram siagang Karaeng Ahab takkulle angngewai Yehu, la’biangampa ikatte!"

5Lanri kammana anjo akkirimmi kabara’ kapala balla’ karaenga siagang kabusu’ walikotaya, tau toa-toana tau jaia, kammayatompa pajagana ana’ cucunna Ahab, iamintu kabara’ mae ri Yehu angkana, "Ikambe ngaseng anne tunduki mae ri katte karaeng, siagang sadiai untu’ anggaukangi apa-apa mamo kiparentakanga mae ri kambe. Tena nalangngangka’ ikambe manna pole inai la’jari karaeng. Kigaukang mami apa kikanaya baji’ ri panggappata."

6Nampa akkiring pole sura’ Yehu mae ri ke’nanga. Kammaminne bonena anjo suraka, "Punna agang mae kabusukko ri nakke, siagang punna sadiako anturuki parenta-parentaku, buno kabusu’mi padeng anjo sikontu ana’ cucunna Ahab niaka antureng, nampa ammuko ri wattu kamma-kammaya anne, erang kabusuki ulunna ke’nanga mae ri nakke ri Yizreel." Anjo tujupuloa ana’ cucunna Karaeng Ahab niaki ammantang ri tau toa-toana tau jaia ri kota Samaria, siagang niparakai ri ke’nanga.

7Le’baki natarima ke’nanga anjo sura’na Yehu, nibunomi ri tutoa-toana tau jaia ri kota Samaria anjo tujupuloa ana’ cucunna Ahab, nampa nipantama’ ulunna ke’nanga ri karanjenga, nampa nikiring mange ri Yehu ri Yizreel.

8Le’ba’na nipauang Yehu anjo passalaka, naparentakammi sollanna nisusung anjo sikamma ulua a’jari ruang gompo ri pakke’bu’ lompona kotaya, siagang niboli’ anjoreng sa’genna bari’basa’.

9Bari’basaki assulu’mi Yehu mange ri pakke’bu’ lompoa, nampa nakana ri sikamma tau niaka a’rappung anjoreng, "Inakkemi le’baka assikongkolo’ angngewai siagang ambunoi Karaeng Yoram; ikau tena ngaseng nusala lalang ri anne passalaka. Mingka sikontu anne taua teai inakke ambunoi.

10Iaminne buttina angkanaya sikontu apa le’baka Napau Batara ri passala’na ana’ cucunna Ahab lakajariang kabusuki. Nagaukammi Batara apa le’baka Napau tete ri atanNa iamintu Elia."

11Nampa nabuno Yehu sikontu bija pammanakanna Ahab maraenga niaka ammantang ri Yizreel, kammayatompa sikontu pagawena, agang-agang baji’na, siagang imang-imanna; tena manna sitau nalappassang attallasa’.

12Nabokoi Yehu Yizreel nampa a’lampa mange ri Samaria. Ri tangngana aganga, iamintu ri tampa’ niarenga "Kampong Pakalawaki,"

13assibuntuluki siagang siapa are bija pammanakanna Ahazia karaeng Yehuda. Akkuta’nammi ri ke’nanga angkana, "Inai ngasengko antu?" Appialimi ke’nanga angkana, "Ikambe anne bija pammanakannaki’ Ahazia. Eroki kambe a’lampa mange ri Yizreel untu’ angkunjungi sikontu kaluargana karaenga kammayatompa ana’ cucunna karaeng baine Izebel."

14Naparentakammi Yehu angkana, "Jakkala’ attallasaki ke’nanga!" Jari nijakkala’ kabusu’ anjo ke’nanga, nampa nibuno ri ampi’na se’reang bungung kalotoro’; kabusu’na niaki patampulo anrua tau jaina. Tena manna sitau nilappassang attallasa’.

15Napannarrusu’mi lampana Yehu. Ri tangngana aganga niruppaimi ri Yonadab ana’na Rekhab. A’barisallammi Yehu ri ia siagang nakana, "Sai ikatte a’julu atiki’? Maka ero’jako agang mae ri nakke?" Appiali Yonadab angkana, "Iyo’." Angkanami Yehu, "Punna kamma, umba kisita’gala’ lima." Jari assita’gala’ limami ke’nanga, nampa nabantu Yonadab nai’ antama’ ri karetana,

16siagang nakana, "Maeko amminawang, siagang kalennu lansa’bi antekamma bateku usaha untu’ Nakaerokia Batara." Nampa assiagammo ke’nanga a’dongko’ kareta mange ri Samaria.

17Battuna ke’nanga mange anjoreng, nabunomi Yehu anjo sikontu bija pammanakanna Ahab, tena manna sitau nalappassang ammantang. Kajariang kabusu’mi anjo sikammaya situru’ apa le’baka Napau Batara mae ri Elia.

18Nasuroi Yehu a’rappung panduduka ri Samaria nampa nakana, "Karaeng Ahab kurang attojeng-tojengi anynyomba mae ri Baal; inakke lala’bi attojeng-tojenga’ naia.

19Lanri kammana anjo passe’re kabusuki sikontu na’bina Baal siagang tau anynyombaya ri ia kammayatompa imang-imanna; tena manna sitau nipassangaliang. Eroka’ assare koro’bang lompo untu’ Baal. Inai-nai tena nahadere’ lanihukkung matei." Mingka anjo kammaya poro akkala’ napare’ji bawang Yehu lanri ero’na nabuno kabusu’ sikontu tau anynyombaya ri Baal.

20Assarei parenta Yehu kamma anne: "Pattantui se’re allo untu’ anynyomba mae ri Baal!" Jari napattantumi taua anjo allo lanipanynyombanga

21nampa napa’la’bang Yehu mae ri sikontu Israel. Anjo alloa battu kabusu’mi sikontu tau anynyombaya ri Baal, tena manna sitau tabattu. Antama’mi ke’nanga ri balla’ panynyombanga ri Baal, siagang napirassi kabusu’mi anjo pammantangnganga battu ri dallekang sa’genna mae ri boko.

22Naparentakangi Yehu sollanna nisare kabusu’ pakeang sambayang ri pangurusu’ pakeang sambayanna anjo balla’ panynyombanga anjo sikontu tau battua ero’ anynyomba ri Baal. Le’ba’na nigaukang anjo apa naparentakanga Yehu,

23antama’mi Yehu ri anjo balla’ panynyombanga siagang Yonadab ana’na Rekhab, nampa nakana mae ri sikamma tau niaka anjoreng, "Paressa bajiki apaka anne sikontu tau niaka hadere’, sangnging tau anynyombaji ri Baal. Gassingka nia’ anrinni tau anynyomba ri Batara."

24Nampa assaremo koro’bang Yehu siagang Yonadab mae ri Baal. Ri pantaranna balla’ panynyombanga, nia’mo napasadia Yehu 80 tau pangawala’ siagang perwira. Le’ba’ tommi naparentakang mae ri ke’nanga parenta kammaya anne, "Musti nubuno kabusuki anjo taua. Inai-nai allappassangi kalase’renna battu ri ke’nanga lari lanibunoi!"

25Silalonna le’ba’na Yehu assare koro’bang, assulu’mi nampa nakana mae ri sikamma pangawalaka siagang perwiraya, "Antama’mako nampa nubuno kabusu’ ke’nanga. Teako lappassangi manna sitau ta’lappasa’!" Jari antama’mi ke’nanga siagang pa’dang ta’bi’bu’, nampa nabuno kabusu’ sikamma tau niaka anjoreng, nampa nare’resang maya’na ke’nanga assulu’. Nampa antama’ ke’nanga ri bageang lalanna balla’ panynyombanga,

26nampa napasulu’ patunna anjo Baalka nampa natunu.

27Niancuru’mi anjo patunga siagang balla’ panynyombanga, nampa nipare’ anjo tampaka a’jari pammelakkang je’ne’ sa’genna kamma-kamma anne.

28Kammami anjo batena Yehu ambarrasaki sa’genna tangkasa’ panynyombanga mae ri Baal ri Israel.

29Lanri kammana anjo Nakanamo Batara ri Yehu, "Sikontu apa Kuparentakanga mae ri kau sollanna nigaukang mae ri jari-jarina Ahab, le’ba’mi nugaukang. Lanri kammana anjo a’janjiA’ angkanaya ana’ cucunnu sa’genna lapisi’ makaappaka la’jari karaengi ri Israel." Mingka tena nattojeng-tojeng pa’mai’na Yehu anturuki hukkunNa Batara, Allata’alana Israel. Naturuki panggaukanna Yerobeam angngerangai tu Israel mae ri gau’ dosaya, iamintu anynyombai mae ri patung sapi bulaeng nipaentenga ri Betel siagang ri Dan.

30(10:29)

31(10:29)

32Anjo wattua appakkaramulami Napa’jari ca’di Batara daera kakoasanna Israel. Naallei Hazael iamintu karaeng Siria sikontu daerana Israel

33niaka ri bageang rayanganna Binanga Yordan sa’genna timboro’ ri kota Aroër ri ampi’na Binanga Arnon, antama’ tommi daera Gilead siagang Basan, tampa’ pammantanganna suku Gad, Ruben siagang Manasye bageang raya.

34Pau-pau maraengannaya ri passala’na Yehu, kammayatompa jasa-jasana ri kabaranianna, niaki nicata’ lalang ri kitta’"Riwaya’na sikamma karaeng Israel."

35Sallona ammarenta Yehu salaku karaeng Israel iamintu 28 taung, anjorengi ri Samaria mate siagang nitarawang. Nampa ana’na iamintu Yoahas ansambeangi a’jari karaeng.

36(10:35)


  Share Facebook  |  Share Twitter

 <<  2 Raja-raja 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel