Alkitab Mobile SABDA
[VER] : [MAKASAR]     [PL]  [PB] 
 <<  2 Samuel 19 >> 

1Nipauammi Yoab angkanaya angngarruki Daud siagang kasusangi lanri kamateanna Absalom.

2Jari anjo pammetanga anjo alloa tappinrami a’jari kasi’nang mae ri sikontu tantarana Daud lanri nalangngere’na ke’nanga angkanaya nakarruki karaenga ana’ bura’nena.

3A’mere’-merekimi ke’nanga ammotere’ mange ri kotaya, rapang tantara siri’-sirika lanri lari battu ri pa’bundukanga.

4Natongkoki karaenga rupanna siagang angngarru’ lompomi, angkana, "O, anakku! Anakku Absalom! Absalom anakku!"

5A’lampami Yoab mange andallekang ri karaenga na nakana, "Anne alloa kipakasiriki ana’ buata karaeng, nampa ke’nangami le’ba’ ampasalamaki nyawata, nyawana ana’-ana’ baineta siagang ana’-ana’ bura’neta, bainenta siagang sikamma baine piarata.

6Kikamaseangi tau angkabirisiaki’ mingka kikabirisi tau angkamaseangaki’! A’nassami kipappicinikang angkanaya sikamma perwirata siagang sikamma tantarata tena sikali anggaranna mae ri katte. Ba’lalo kammai nicini’ angkanaya sannangi nyawata ebara’ angkana anne alloa attallasa’ iji Absalom nampa mate ngaseng anne ikambe!

7Kupalaki nakiammenteng nai’ karaeng nampa assulukki’ ampakasannangi nyawana ana’ buata. Assumpai atanta lanri Batara, angkanaya punna tena kiassulu’ ambuntuli ke’nanga, anne memang bangngia tenamo manna sitau ero’ anrurungangki’. Anjo kammaya la’jari bala kaminang lompo lakikasiaka lalang sikontuna tallasatta."

8Nampa ammentemmo nai’ karaenga, siagang ammempomi ri ampi’na pakke’bu’ lompoa. Nalangngere’mi ana’ buana angkana niaki anjoreng. Jari battu kabusu’mi ke’nanga andallekang. Lalang anjo wattua sikontu pasukang Israel naerammi lari kalenna, siagang massing ammotere’mi mange ri balla’na.

9Nia’mo ammumba ri sikontu Israel passigeakkang. Nakana ke’nanga, "Karaeng Daud le’ba’ ampasalamakki’ battu ri tu Filistin siagang allappassangki’ battu ri musu-musunta maraenga, mingka kamma-kamma anne larimi battu ri Absalom siagang nabokoimi anne pa’rasanganga.

10Nilantiki Absalom a’jari karaeng, mingka kamma-kamma anne matemi lalang pa’bundukang. Angngapa natena manna sitau angngusahakangi angngerangi Karaeng Daud ammotere’?"

11Anjo kana-kana kammaya ta’rapi’ tommi mae ri Karaeng Daud. Lanri kammana anjo nasuromi Imang Zadok siagang Imang Abyatar mange ampakkuta’nangngangi mae ri sikamma pamimpinna Yehuda angkana, "Angngapa nu’jari kaminang kala’busang untu’ anruppai siagang anrurungangi ammotere’ karaenga mange ri balla’ kakaraenganna?

12Sai ikau ngaseng bija pammanakangku siagang kaluargaku? Angngapa naikau kaminang ri boko dudu ampalaki sollangku ammotere’."

13Nasuro tommi Daud ke’nanga ampaui mae ri Amasa kammaya anne, "Sai ikau sibijaki’? Appakkaramula kamma-kamma anne kuangkakko a’jari panglima tantaraku ansambeangi Yoab. Poro Nabuno laloa’ Allata’ala punna tena nakurupai anjo kanangku!"

14Kammaminjo nakkullemo Daud angngallei pa’mai’na sikontu tu Yehuda sa’genna akkirimmo ke’nanga pasang mae ri karaenga sollanna ammotere’ mange ri balla’ kakaraenganga siagang ngaseng sikontu pagawena.

15Nampa a’lampamo karaenga siagang battumi mange ri Binanga Yordan; na lalanna anjo wattua battumi tu Yehuda ri Gilgal untu’ ambuntuli karaenga siagang narurungammi a’limbang ri anjo binangaya.

16Anjo Simei ana’na Gera, tu Benyamin, angngerangi sisa’bu tau battu ri suku Benyamin siagang akakaro-karomi battu siagang anjo tu Yehuda untu’ anruppai karaenga. Kamma tomminjo Ziba atanna kaluargana Saul, siagang sampuloa allima ana’na bura’nea siagang ruampuloa atanna; le’ba’mi a’limbang ke’nanga ri Binanga Yordan ri tenanapa nabattu karaenga.

17(19:16)

18Nabantumi kaluargana karaenga a’limbang kammayatompa nagaukammi ke’nanga sikontu apa napassuroanga karaenga mae ri ke’nanga. Ri wattunna ero’ karaenga a’limbang ri binangaya, su’ju’mi Simei ri dallekanna siagang nakana,

19"Kupalaki ri katte karaeng sollanna tena nakicini’ tuli salana anne atanta. Poro kikaluppai lalomi apa le’baka nagaukang atanta ri allo kibokoina Yerusalem karaeng.

20Kamma-kamma anne sadara’mi atanta, angkanaya dorakai atanta, na lanri kammana anjo, ri alla’na suku-suku niaka ammantang ri daera bageang waraka, atantami anne kaminang riolo battu anruppaiki’ anne alloa."

21Nalangngere’na anjo kana kammaya nakanamo Abisai ana’na Zeruya, "Siratammi nihukkung mate Simei lanri le’baki natunrai karaeng le’baka Napilei Batara."

22Mingka nakanamo Daud mae ri Abisai siagang Yoab daenna, "Teako pantama’-tamakki. Angngapa nanususai ngasenga’? Anne alloa inakke a’jari karaeng ammotere’ mae ri Israel, siagang takkulleai nia’ tu Israel nihukkung mate."

23Nampa assumpamo karaenga mae ri Simei angkana, "Kutanggongi angkanaya tena nulanihukkung mate."

24Kammayatompa Mefiboset cucunna Saul, battu tongi untu’ anruppai karaenga. Tena nanabissai bangkenna, tena nanacukkuruki janggo’na, siagang tena nanasassai pakeanna baku’na nabokoi Karaeng Daud Yerusalem sa’genna ammotere’ siagang salama’.

25Ri wattunna battu Mefiboset battu ri Yerusalem untu’ anruppai karaenga, nakanamo karaenga ri ia, "O Mefiboset, angngapa natena numminawang ri nakke anjo wattua?"

26Appialimi angkana, "O karaeng mala’birikku, kiassengi angkanaya anne atanta tempangi. Nasuroi atanta palayanna atanta untu’ ampasadiangi atanta keledai akkullea nabae atanta untu’ amminawang ri karaengku. Mingka niballe-ballei atanta ri anjo palayanga.

27Ba’lalo nipitinai atanta mae ri karaengku. Mingka ikatte rapangki’ malaeka’Na Allata’ala. Lanri kammana anjo kigaukammi apa kikanaya baji’ ri pa’maitta karaeng.

28Sikontu kaluargana manggena atanta siratangi kihukkung mate, mingka anne inakke atanta ba’lalo kisarea’ pangngellai sipangnganreang ri balla’ kakaraenganga. Kamma-kamma anne tabaraniami atanta appala’ ija apa-apa battu ri katte karaeng."

29Appialimi karaenga angkana, "Tenamo nukkulle akkana-kana pole. Le’ba’mi kupattantu untu’ assare kabusukko siagang Ziba sikontu barang-baranna Saul."

30Nampa appialimo Mefiboset angkana, "Boli’mi kamma nanaalle kabusu’ Ziba. Sukku’mi rannuna pakkasia’na atanta lanri kisurona atanta ammotere’ siagang salama’ karaeng."

31Kammayatompa Barzilai anjo tu Gileadka, nia’ tongi battu ri Rogelim untu’ anrurungangi karaenga a’limbang ri Binanga Yordan.

32Anjo lapung Barzilai sanna’mi toana, umuru’na narapi’mi sagantujupulo taung. Teai sipato’ kalumanynyanna. Na ri wattunna ammantang karaenga pirangalloang ri Mahanaim, iaminjo Barzilai ampasadiangi apa lanakanrea karaenga.

33Nakana karaenga ri ia, "Maeko amminawang ri nakke a’lampa mange ri Yerusalem, nampa kupasadiangko sallang sikontu apa nuparalluanga anjoreng."

34Mingka appialimi Barzilai angkana, "Tenamo nakulasallo attallasa’. Jari apapi matu-matungku amminawang ri katte mange ri Yerusalem karaeng?

35Sagantujupulo taummi umuru’na atanta, siagang tena akkulle lanakasannangngang atanta. Tenamo nakkulle nakasia’ baji’ apa nakanrea siagang apa nainunga atanta, kammayatompa takkulleami nalangngere’ atanta sa’ranna tau akkelonga. Poro ikatteji bawang lakubattalli karaeng.

36Tena nasiratang atanta annarima passare lompo kammaya anjo. Poro ero’ mami atanta anrurungangki’ pirang dakka are battu ri ba’leanna Binanga Yordan.

37Le’baki anjo, boli’mi kamma nakilappassang atanta ammotere’ ri balla’ nampa mate atanta ri ampi’ jera’na tau toana atanta. Mingka anne ana’na atanta Kimham, kipa’biammi anrurungangki’ karaeng siagang kigaukammi apa kikanaya baji’ mae ri kalenna."

38Appialimi karaenga angkana, "Lakuerangi Kimham, siagang lakuparakai situru’ apa nukaerokia, kammayatompa sikontu apa nupalaka mae ri nakke lakuturukiangko."

39Nampa a’limbammo Daud siagang sikontu ana’ buana ri Binanga Yordan. Nampa nabau Daud anjo lapung Barzilai siagang appala’ kana mae ri ia. Le’baki anjo ammotere’mi Barzilai mange ri balla’na.

40Sikontu pasukang Yehuda siagang bageruanna pasukang Israel anrurungangi karaenga a’limbang ri binangaya. Le’baki anjo napatulusu’mi lampana karaenga mange ri Gilgal, siagang amminawang tommi Kimham ri ia.

41Nampa battumo sikontu tu Israelka andallekang ri karaenga angkana, "O, karaeng, angngapai naanjo sari’battanna ikambe tu Yehudaya nanakana kalenna la’bi lompoangngang ha’na untu’ anruppaiki’ siagang anrurungangki’ siagang sikontu kaluargata kammayatompa ana’ buata a’limbang ri Binanga Yordan?"

42Nampa appialimi tu Yehuda angkana, "Tantumi, nasaba’ anjo karaenga sibijai siagang ikambe. Angngapa nu’jari larro ngaseng? Apaka nukana natanggongi karaenga kaparalluanna ikambe, yareka nukana nisarei ikambe hadia?"

43Appialimi tu Israel angkana, "Ha’na ikambe mae ri karaenga a’lappi sampuloi lompona naha’nu ngaseng, manna pole nanusibija anjo karaenga. Angngapa nanucini’ rawa kamma anne ikambe? Teako kaluppai angkanaya ikambemi uru-uru angngussuluki sollanna ia a’jari karaeng ammotere’!" Mingka la’bi terassangngangi nyawana tu Yehuda na tu Israel siagang taerokai nibeta ke’nanga.


  Share Facebook  |  Share Twitter

 <<  2 Samuel 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel