Dual Panel1Nampa nakio’ pole Daud surudadu-surudaduna kaminang bajika ri Israel sollanna a’rappung, nia’ 30.000 jaina tau.
2Napimpingi ke’nanga mange ri Baale-Yehuda, untu’ angngallei battu anjoreng Patti Parjanjiang niarenga siagang arenNa Batara Kaminang Koasaya niaka empoang kala’biranNa irate ri patung-patunna malaeka’ akka’nyika.
3Niallei anjo Patti Parjanjianga battu ri balla’na Abinadab irate ri bontoa nampa nipanai’ antama’ ri bendi berua. Nampa nirurungang anjo bendia ri ana’-ana’na Abinadab iamintu Uza siagang Ahio; Uza a’jappa ri sa’rinna,
4siagang Ahio a’jappa ri dallekanna.
5Daud siagang sikontu bansa Israel a’jappa ri dallekanna anjo Pattia a’joge’-joge’ sipagassing-gassinna tojeng siagang akkelong-kelong untu’ ampakala’biriki Batara. Akkarena kacaping, gambusu’, rabana, rincing-rincing siagang kasidai ke’nanga.
6Ri wattunna battu ke’nanga mange ri panggilingang gandunna Nakhon, tatto’roi anjo sapi-sapi ambesokai anjo bendia; na napajonjomo limanna Uza siagang nata’gala’ anjo Patti Parjanjianga sollanna tena natu’guru’.
7Anjo memang wattua Nalarromo Karaeng Allata’ala mae ri Uza, lanri nahinana Batara battu ri anjo panggaukanna. Nibunomi Uza ri anjo tampaka, ri ampi’na Patti Parjanjianga.
8Jari appakkaramula anjo wattua naniaremmo anjo tampaka Peres-Uza. Larroi Daud ri Batara lanri Napanrakinna Uza.
9Mingka malla’ tongi Daud ri Batara siagang nakanamo, "Kamma-kamma anne antekamma batena akkulle kuerang anjo Patti Parjanjianga?"
10Lanri kammana anjo taerokami pole angngerangi anjo Patti Parjanjianga mange ri Yerusalem, passangalinna naboli’mi ri balla’na Obed-Edom tu Gat.
11Tallum bulangi sallona ammantang anjoreng anjo Patti Parjanjianga, na nibarakkakimo Obed-Edom siagang kaluargana ri Batara.
12Nalangngereki Karaeng Daud angkanaya Nabarakkaki Batara kaluargana Obed-Edom siagang sikontu barang-baranna lanri anjo Patti Parjanjianga. Jari a’lampami mange ri balla’na Obed-Edom angngallei anjo Pattia untu’ napalette’ mange ri Yerusalem siagang nasuarri lompoi.
13Ri wattunna a’jappamo annang dakka sikamma tau angngangkakai anjo Patti Parjanjianga, nasuromi Daud ke’nanga ammantang. Nampa assare koro’bang mae ri Batara, iamintu sapi laki siagang ana’ sapi nipakaco’mo’.
14Nampa a’joge’-joge’ Daud sanna’ lompona sumanga’na untu’ ampakala’biriki Batara. Anjo wattua poro lipa’ lenang bodo bawang napake napasikko’ ri aya’na.
15Kammaminjo batena Daud siagang sikontu ra’ya’ Israel ampaletteki anjo Patti Parjanjianga mange ri Yerusalem, nirurungang siagang sa’ra rannu lompo siagang sa’ra tarompe’.
16Ri wattunna sitabang nierang anjo Patti Parjanjianga antama’ ri kotaya, attoaki Mikhal ana’ bainena Saul battu ri jandelaya na nacini’mo Karaeng Daud a’lumpa’-lumpa’ siagang a’joge’-joge’ untu’ ampakala’biriki Batara; na lanremo nasa’ring Mikhal anciniki Daud appakamma.
17Anjo Patti Parjanjianga nipadongkoki lalang ri kema le’baka natannang Daud untu’ anjo Pattia. Nampa assare Daud koro’bang nitunu siagang koro’bang passiamakkang mae ri Batara.
18Nampa Nabarakkaki sikontu ra’ya’ Israel lalang arenNa Batara Kaminang Koasaya.
19Nampa nabage-bagei ke’nanga kanre. Tunggala’ tau niaka anjoreng baji’ bura’ne kammayatompa bai’-bainea massing nasarei sikere’ dageng nilangga, roti siagang kanrejawa kismis. Le’baki anjo massing ammotere’ ngasemmi ke’nanga mange ri balla’na.
20Ri wattunna ammotere’ Daud mange ri balla’ kakaraenganga untu’ assarei sallang kaluargana, assuluki Mikhal anruppai Daud na nakana, "Anne alloa ma’nassa napakala’biri’ tojeng-tojengi kalenna karaenna tu Israel! Assolaraki sangkamma tau tolo tenaya nangngasseng siri’-siri’, ri dallekanna ngaseng ata-ata bainena sikamma pagawena balla’ kakaraenganga!"
21Appialimi Daud angkana, "A’jogeka’ untu’ ampakala’biriki Batara, le’baka antollaki manggenu siagang kaluargana, nampa Napileia’ a’jari pamimpinna Israel, umma’Na. Lanri kammana anjo tuli la’jogeka’ untu’ ampakala’biriki Batara.
22Ba’lalo kurellakangi kalengku nipakatuna la’biangngang naanjo sumpaenga. Akkulleko ampakatuna’, mingka anjo ata-ata nupaua sumpaeng, lanapakalompoa’!"
23Anjo Mikhal, ana’ bainena Saul tena ana’na lalang tallasa’na.