Dual Panel1Le’ba’mi natappuki Karaeng Salomo untu’ ambangungi Balla’Na Batara, kammayatompa se’re balla’ karaeng untu’ kalenna.
2Jari appasadiami tau 70.000 jaina untu’ allaling bahang bangunang, 80.000 tau untu’ ammaha’ batu ri monconga siagang 3.600 mandoro’ untu’ angngawasi anjo jama-jamanga.
3Akkiringi Salomo kabara’ kammaya anne mae ri Hiram karaeng Tirus, "Maeki’ nakiassambungang a’danggang sangkamma siagang manggeku Daud. Le’bakki’ a’balu’ ri ia kayu camara Libanon untu’ ambangungi balla’ kakaraenganna.
4Kamma-kamma anne erokka’ ambangung se’re balla’ sambayang untu’ ampakala’biriki Karaeng Allata’alaku. Anjo ballaka lakupakei siagang ra’yakku untu’ anynyomba ri Ia, attunu dupa bauka rasanna, kammayatompa assare roti nipatala mae ri Ia untu’ satunggu-tungguna. Lanjoreng tomma’ lassare koro’bang nitunu untu’ bari’basa’ karueng, punna allo Pammari-mariang, punna allo lompo Bulang Beru, siagang allo-allo maraengannaya nipakatangkasaka untu’ ampakala’biriki Karaeng Allata’alana ikambe. Nasaba’ le’ba’mi Naparentakang sollanna nagaukang tu Israel anjo kammaya sa’genna satunggu-tungguna.
5Erokku anjo Balla’Na Batara kubangunga a’jari balla’ mala’biriki, lanri anjo Allata’alana ikambe la’bi mala’birangngangi na rewata maraengannaya.
6Mingka sikontutojenna tena manna sitau nia’ pakkullena ambangung balla’ untu’ Allata’ala, lanri manna sikontu anne linoa takkulle angga’na lompona untu’ a’jari pammantanganNa. Jari, anjo Balla’Na Batara poro lasanrapanji bawang tampa’ pattunuang dupa mae ri Allata’ala!
7Lanri kammana anjo, kikiringang laloa’ se’re tucara’de’ appare’ ukirang siagang akkullea anjama bulaeng, pera’, tambaga, bassi, kammayatompa cara’deka anjama kaeng moncongbulo, lame butung siagang eja. Lasipanjamangi siagang sikamma pajamaya ri Yerusalem, iamintu pajama le’baka napile manggeku Daud.
8Kuassengi angkanaya sikamma pata’bang kayua ri pa’rasanganta cara’de’ kabusuki anna’bang kayu; lanri kammana anjo kikiringang laloa’ a’rupa-rupa kayu camara siagang kayu candana battu ri Libanon. Lakupagioki taungku untu’ ambantui taunta,
9sollanna jai kayu akkulle napasadia ke’nanga. Nasaba’ anjo Balla’Na Batara eroka kubangung musti lompoi siagang la’biriki.
10Untu’ bokonna ngaseng anjo taunta lakukiringanki’ ruang rupa gandung, massing-massing 2.000 tong sirupa, je’ne’ anggoro’ 400.000 litere’ siagang minynya’ zaitun 400.000 litere’."
11Salaku balasanna anjo sura’na Karaeng Salomo, akkirimmi sura’ Karaeng Hiram; na kammami anne bonena anjo suraka, "Lanri Nakamaseanna Batara umma’Na, na Naangka’maki’ a’jari karaeng mae ri ke’nanga.
12Poro nipuji arenNa Karaeng Allata’alana Israel, Papare’ langika siagang buttaya! Nasarei Daud sitau ana’ bura’ne sannaka cara’de’na ri kabajikang, siagang niaka pangngassenganna, niaka kamma-kamma anne angngusaha ambangung se’re balla’ untu’ Batara siagang sibatu balla’ karaeng untu’ kalenna.
13Anne nia’ kukiring mae ri katte se’re tau pore siagang tau cara’de’, niarenga Huram.
14Amma’na tubattu ri suku Dan, na manggena tu Tirus. Cara’deki appare’ apa-apa battu ri bulaeng, pera’, tambaga, bassi, batu siagang kayu. Akkullei anjama kaeng moncongbulo, lame butung, eja, siagang kaeng lenang. Sikontu rupanna jama-jamang niukirika akkulle najama situru’ modele’ apa-apa mamo kikaerokia. Baji’mi nisare tugasa’ sipanjamang siagang sikamma pajamata, kammayatompa siagang sikamma tau le’baka anjama untu’ Karaeng Daud manggeta.
15Kutayangi anjo ruang rupaya gandung lakikiringa, kammayatompa anggoro’ siagang minynya’ zaitun kipa’janjianga.
16Lanna’bangi ikambe kayu camara battu ri Libanon sangkamma jaina kiparalluanga, nampa nisikko’ a’jari raki’, siagang nipalo’lorang ri je’ne’ battu ri tamparang sa’genna mange ri Yope. Battu anjoreng akkullei kilaling mange ri Yerusalem."
17Nasuro rekengi Karaeng Salomo sikontu bansa maraeng niaka ammantang ri Israel, kamma le’baka nagaukang Karaeng Daud manggena. Singara’mi angkanaya nia’ 153.600 jaina tau bansa maraeng.
18Nia’ 70.000 battu ri ke’nanga nisare tugasa’ untu’ allalingi bahang-bahang bangunanga, 80.000 untu’ ammaha’ batu ri monconga, siagang 3.600 untu’ angngawasi siagang tanggong jawa’ mae ri anjo jama-jamanga.