Alkitab Mobile SABDA
[VER] : [MAKASAR]     [PL]  [PB] 
 <<  2 Tawarikh 23 >> 

1Ri taung makatuju napattantumi Imang Yoyada untu’ angngalle tindakang. Assitujumi siagang lima tau perwira, iamintu: Azarya ana’na Yehoram, Ismael ana’na Yohanan, Azarya ana’na Obed, Maaseya ana’na Adaya, siagang Elisafat ana’na Zikhri.

2A’lampai ke’nanga mange ri sikontu kotaya ri Yehuda, siagang napasse’rei tu Lewia na sikontu kapalaya, nampa naerang ke’nanga mange ri Yerusalem.

3A’rappummi ke’nanga ri Balla’Na Batara, siagang appare’mi parjanjiang siagang Yoas, anjo ana’ bura’nena karaenga. Nakana Yoyada ri ke’nanga, "Iaminne ana’ bura’nena tumate Karaenga Ahazia! Kamma-kamma anne musti naiki a’jari karaeng, nasaba’ le’ba’mi a’janji Batara angkanaya jari-jarina Karaeng Daud latulusu’ ammarenta.

4Kammami anne musti nigaukang: Punna le’ba’ tugasa’na sikamma imanga siagang tu Lewia ri allo Pammari-marianga, tena nakkulle ke’nanga ammotere’. Bage tallunna ke’nanga musti a’jagai ri pakke’bu’-pakke’bu’ lompona Balla’Na Batara,

5bage tallunna maraenga ri balla’ karaenga, siagang la’binnaya ri pakke’bu’ lompo Uru-urua. Sikontu ra’yaka musti a’rappungangi ri parang lakkenna Balla’Na Batara.

6Tena manna sitau akkulle antama’ ri Balla’Na Batara pantaranganna sikamma imang siagang tu Lewi tugasaka. Akkullei anjo ke’nanga antama, lanri le’ba’mi ke’nanga nitangkasi untu’ Batara. Sikamma tau maraenga musti tunduki ri paratoranNa Batara siagang ammantangi pantarang.

7Tu Lewia musti ammentengi ke’nanga ri tammulilina karaenga anna’gala’ pa’dang le’ba’ ta’bi’bu’, nampa nakawala’ manna pole kemae lampana karaenga. Inai-nai ero’ antama ri Balla’Na Batara, musti nibunoi."

8Anjo parentana Yoyada nigaukammi ri tu Lewi siagang ra’ya’ Yehuda. Sikamma tau lappasa’ tugasaka ri allo Pammari-marianga tena nanipa’biangi ammotere’. Jari sikamma perwiraya akkullei napagio’ ngaseng baji’ tau beru lappasa’ tugasaka kammayatompa tau beru battua untu’ anggaukangi tugasa’na.

9Nabage-bagemi Yoyada mae ri sikamma anjo perwiraya iamintu pokena siagang pannangkisi’na Karaeng Daud niaka niboli’ lalang ri Balla’Na Batara.

10Natampakkang tongi Yoyada tau anna’galaka pa’dang le’ba’ ta’bi’bu’ memang ri tammulilina bageang dallekanna Balla’Na Batara untu’ anjagai karaenga.

11Le’baki anjo nierammi Yoas ri Yoyada assulu’, nampa napadongko’ songko’ kakaraenganga ri ulunna, siagang napassareang Kitta’"HukkunNa Allata’ala" mae ri Yoas. Kammami anjo batena niangka’ Yoas a’jari karaeng. Nampa massing appatiri’ minynya’ Imang Yoyada siagang sikamma ana’na, iamintu minynya’ upacara palantikang mae ri Yoas; a’gora lompomi sikamma taua angkana, "La’bui umuru’na karaenga!"

12Nalangngereki Atalya sa’ranna ra’yaka a’gora ampakala’biriki karaenga. Akkaro-karomi a’lampa mange ri Balla’Na Batara ri tampa’ jaia tau a’lipung.

13Naciniki anjo karaeng berua ammenteng ri pakke’bu’ antamaya ri Balla’Na Batara, ri tampa’na nilanti’ a’jari karaeng, nitammulili ri perwira-perwiraya siagang tau appasa’raya tarompe’. Sikontu ra’yaka akkio’ rannu kabusuki nirurungang ri sa’ra tarompe’ siagang ri pakarena musi’ niaka ri Balla’Na Batara, untu’ ampakasuaraki anjo gau’ lompoa siagang pakkakasa’ musi’na ke’nanga. Lussa’mi Atalya siagang nakae-kaemi pakeanna, nampa ammarrang angkana, "Pasikongkolang! Pasikongkolang!"

14Tena nipa’biangi ri Yoyada nibuno Atalya ri ampi’na Balla’Na Batara; jari nakanamo ri sikamma perwiraya, "Erangi assulu’ battu ri barisanna pangawalaka, siagang bunoi punna nia’ tau ero’ ampasalamaki, manna pole inai."

15Nijakkala’mi Atalya ri ke’nanga, nampa nierang mange ri balla’ karaenga. Anjoremmi nibuno ri pakke’bu’ niarenga Pakke’bu’ Lompo Jarang.

16Napalaki Imang Yoyada ri Karaeng Yoas siagang ri ra’yaka sollanna assama-sama ke’nanga siagang ia appare’ parjanjiang angkanaya la’jari ke’nanga umma’Na Batara.

17Le’baki anjo a’bakka ngasemmi ke’nanga mange anruntungi balla’ panynyombanga ri Baal. Naancuruki ke’nanga tampa’ pakkoro’bangnganga siagang patung-patunna; nampa nabuno ke’nanga Imang Baalka niarenga Matan, ri dallekanna anjo sikamma tampa’-tampa’ pakkoro’bangnganga.

18Nampa nasare tugasa’ Yoyada sikamma imanga siagang tu Lewia untu’ angngurusuki jama-jamanga ri Balla’Na Batara situru’ pambageang jama-jamang le’baka natantukang Karaeng Daud. Musti assarei ke’nanga koro’bang nitunu mae ri Batara — situru’ hukkung-hukkung napassareanga Musa — siagang passua’-suarrang kammayatompa kelong-kelong sangkamma le’baka naatoro’ Daud.

19Ri sikamma pakke’bu’-pakke’bu’ lompona Balla’Na Batara, nia’ nasare tugasa’ Yoyada pangawala’ untu’ anjagai sollanna tena nantama tau tenaya nasiratang anynyomba ri Batara.

20Sikamma perwira-perwiraya, pamimping-pamimping tau jaia, kammayatompa sikontu ra’yaka amminawangi ri Yoyada anrurungangi Karaeng Yoas battu ri Balla’Na Batara mange ri balla’ karaenga. Antamaki ke’nanga battu ri pakke’bu’ lompo uru-urua nampa ammempo karaenga irate ri empoang kala’biranna.

21Rannu ngasengi nyawana ra’yaka; kotaya amang tommi siagang Atalya le’ba’mi nibuno.


  Share Facebook  |  Share Twitter

 <<  2 Tawarikh 23 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel