Dual Panel1Nampai 7 taung umuru’na Yoas wattunna a’jari karaeng ri Yehuda, siagang 40 taungi sallona ammarenta ri Yerusalem. Amma’na niarengi Zibya battua ri kota Bersyeba.
2Lalang attallasa’na ija Imang Yoyada, nagaukangi Yoas apa Nangaia Batara.
3Ammileimi Yoyada rua baine untu’ a’jari bainenna Yoas, siagang battu ri anne ke’nanga anggappami Yoas ana’-ana’ bura’ne siagang ana’-ana’ baine.
4Wattunna siapa aremo sallona ammarenta, ero’mi Yoas appakkaramula ampakabajiki Balla’Na Batara.
5Naparentakammi sikamma imanga siagang tu Lewia untu’ a’lampa mange ri sikontu pandudu’ niaka ri kota-kota Yehuda siagang appasse’re doe’ battu ri sikontu ra’yaka untu’ ampakabajiki Balla’Na Batara taung-taung. Nasuroi ke’nanga akkaro-karo anggaukangi anjo tugasaka, mingka sallo-salloi batena tu Lewi.
6Lanri kammana anjo nakio’mi Imang Yoyada pamimpinna ke’nanga, nampa akkuta’nang Yoas angkana, "Sai anjo Musa atanNa Batara le’ba’ nasuroi ra’yaka a’bayara’ sima untu’ angngongkosi KemaNa Batara? Kamma-kamma anne apa saba’na natena kipakkaro-karoi tu Lewia untu’ ampasse’rei sima battua ri ra’ya’ Yehuda siagang Yerusalem?"
7(Sikamma tau amminawang turuka ri Atalya, anjo baineja’dalaka panggaukanna, le’baki napanraki Balla’Na Batara, siagang jai barang-barang matangkasa’Na Allata’ala le’ba’ napake ke’nanga untu’ anynyomba ri Baal.)
8Jari naparentakammi karaenga mae ri tu Lewi sollanna appare’ ke’nanga se’re patti-patti nampa napadongko’ ri dallekang pakke’bu’ lompona Balla’Na Batara.
9Nipa’la’bangi nipau ri sikontu Yerusalem siagang Yehuda angkanaya sikontu taua musti angngerangi pa’bayara’ sima untu’ Batara, sangkamma le’baka napassuroang Musa.
10Anjo kana nipa’la’banga nakarannuang pa’maiki ra’yaka siagang pamimping-pamimpinna ke’nanga. Assama-samami ke’nanga appantama doe’ sima ri anjo patti-pattia.
11Allo-allona nierang anjo patti-pattia ri tu Lewi mae ri pagawena karaenga untu’ niparessa. Punna rassimo anjo pattia nipasulu’mi bonena ri jurutulisi’na pa’rasanganga siagang wakkele’na Imang Lompoa nampa nipoterang pole anjo patti-pattia mange ri tampa’na. Kammami anjo nagaukang ke’nanga allo-allo, sa’genna jai sikalimi doe’ nipasse’re.
12Nampa napassareang karaenga siagang Yoyada anjo doeka mae ri sikamma mandoro’na anjo tau appakabajika Balla’Na Batara. Nampa anjo mandoroka napagajimi tukang batua, tukang kayua siagang tukang bassia untu’ anjamai anjo jama-jamanga.
13Appakkaramulami anjo tukang-tukanga ampakabajiki anjo Balla’Na Batara. Kammami anjo batena ke’nanga anjama sa’genna a’jari kassa’mo siagang baji’mo ammotere’ anjo Ballaka sangkamma riolo.
14Ri wattunna le’ba’mo anjo jama-jamanga, sikamma bulaenga siagang peraka niaka tassesa nipassareangi mae ri karaenga siagang Yoyada. Nampa nipake anjo bulaenga siagang peraka untu’ appare’ pakkakasa’-pakkakasa’ untu’ Balla’Na Batara, kammayami: pakkakasa’ untu’ upacara panynyombang, untu’ koro’bang nitunu, panne-panne untu’ dupa, siagang mangko’-mangko’. Lalang attallasa’na ija Imang Yoyada, tulusu’ nipassareangiji koro’bang nitunua ri Balla’Na Batara.
15Toa sikali umuru’na Yoyada, narapiki 130 taung umuru’na nampa mate.
16Nitarawangi ri pa’jerakkanna sikamma karaenga ri Kota Daud, untu’ ampakalompoi jasa-jasana mae ri Allata’ala, mae ri Balla’Na Batara siagang mae ri umma’ Israel.
17Ri wattunna matemo Yoyada, ninyonyo’mi siagang nipangaruimi Yoas ri pamimping-pamimpinna tu Yehuda sa’genna tenamo najampangi pole pangngajara’na Yoyada.
18Jari tenamo nanynyomba ra’yaka ri Balla’Na Batara, Allata’alana boe-boena ke’nanga, mingka anynyombami ke’nanga ri barhala siagang patung-patunna Dewi Asyera. Lanri anjo dosana ke’nanga nalarromo Batara mae ri tu Yehuda siagang Yerusalem.
19Assuromi Batara na’bi-na’bi untu’ ampakaingaki ke’nanga sollanna ammotere’ anynyomba mae ri Batara; mingka taerokai ra’yaka mappilangngeri.
20Nampa battumo RohNa Allata’ala angkoasai Zakharia ana’na Imang Yoyada. Majumi Zakharia ri dallekanna ra’yaka nampa akkio’ angkana, "Nakana Karaeng Allata’ala, ‘Angngapa natena numannuruki ri parenta-parentaKu siagang nucilakai kalennu. Tenamo nujampangiA’, jari tena tommo naKujampangiko!’"
21Mingka assikongkolo’mi ra’yaka untu’ angngewai Zakharia, siagang Karaeng Yoas amminawang tongi lalang ri anjo passikongkolanga. Tenamo nau’rangi jasa-jasana siagang pa’mai’ tamamminrana Yoyada, manggena Zakharia. Naparentakangi karaenga sollanna nisambilai batu Zakharia sa’genna mate ri paranglakkeng Balla’Na Batara. Ri wattunna lamatemo Zakharia, akkio’mi angkana, "Dasi-dasi naNacini’ Batara anne panggaukannu nampa Nabalasa’ mae ri kau!"
22(24:21)
23Ia todong anjo taunga, ri a’le’basa’na wattu baraka siagang wattu timoroka, battumi tantara Siria ambunduki Yehuda siagang Yerusalem. Nabunoi ke’nanga sikontu pamimpinga siagang nalalingi ke’nanga barang-barang narampasaka mange ri Damsyik.
24Tenaja najai anjo tantara Siria, mingka nilappassangi ke’nanga ri Batara ambetai tantara Yehuda bellaya jaina, lanri tenamo najampangi tu Yehuda Karaeng Allata’alana boe-boena ke’nanga. Kammami anjo bateNa Batara anghukkungi Yoas.
25Sannaki loko’na Yoas lalang ri anjo pa’bundukanga. A’lampanamo musua, nia’mo rua pagawena assikongkolo’. Nabunoi ke’nanga Karaeng Yoas ri tampa’ katinroanna, salaku pa’balasa’ mae ri nabunona ana’na Imang Yoyada. Nitarawangi Karaeng Yoas ri Kota Daud, mingka tena nanjoreng ri pa’jerakkanna sikamma karaenga.
26(Anjo tau sikongkoloka angngewai Yoas iamintu Zabad ana’naSimeat baine battu ri Amon, siagang Yozabad ana’na Simrit baine battu ri Moab.)
27Pau-pau ri passala’na ana’-ana’na Yoas, passala’na kana-kana tappu kodia mae ri batangkalenna, kammayatompa passala’ antekamma batena ampakabajiki Balla’Na Batara, yangasenna niaki nicata’ lalang ri kitta’"Kasingaranna Kitta’na Sikamma Karaenga." Amazia, ana’ bura’nena Yoas, a’jari karaeng ansambeangi manggena.