Dual Panel1Wattunna a’jari Karaeng Hizkia, 25 taung umuru’na, siagang ammarentai 29 taung sallona ri Yerusalem. Amma’na niarengi Abia ana’na Zakharia.
2Nagaukangi Hizkia panggaukang Nangaia Batara sangkamma todong nagaukanga Daud boe-boena.
3Ri bulang se’re taung makase’re ammarentana Hizkia, nasungkei ammotere’ Hizkia sikontu pakke’bu’na Balla’Na Batara nampa nasuroi taua ampakabajiki.
4Nasuroi asse’re sikamma imanga siagang tu Lewia ri paranglakkeng bageang rayana Balla’Na Batara,
5nampa a’bicara mae ri ke’nanga anjoreng. Nakana ri ke’nanga, "Ikau ngaseng tu Lewia, musti nutangkasi kalennu untu’ Batara, siagang nutangkasi Balla’Na Batara, Allata’alana boe-boenu. Sikontu apa akkullea anra’massi anjo ballaka musti nupakabellai.
6Boe-boeta tena namajarre’ tappa’na mae ri Karaeng Allata’alata siagang nagaukangi ke’nanga apa tenaya Nangai Karaeng Allata’ala. Tena najampangi Karaeng Allata’ala siagang pammantanganNa.
7Natongkoki ke’nanga sikamma pakke’bu’na Balla’Na Batara nampa nabuno kanjoli-kanjolina. Tena nattunu dupa ke’nanga ri Balla’Na Batara, siagang tena nassare koro’bang nitunu mae ri Allata’ala nasombaya tu Israel.
8Nampa lanri larroNa Batara Nahukkummi tu Yehuda siagang Yerusalem. Na ikau nuasseng kabusu’mi antekamma ta’bangkana kabusu’ siagang malla’na kabusu’ ke’nanga.
9Matemi manggeta ngaseng lalang ri pa’bundukanga, siagang nilalimmi anatta siagang bainenta a’jari tunitahang.
10Kamma-kamma anne erokka’ appare’ parjanjiang siagang Batara, Allata’alana Israel, sollanna ammarimo larro mae ri katte.
11Ikau ana’-anakku, teako pammukoangi pole, nasaba’ ikau ngasemmi Napile Batara untu’ anynyomba siagang a’jari atanNa, kammayatompa attunu dupa siagang ampimpingi ra’yaka untu’ anynyomba."
12Sikamma tu Lewi hadereka anjo wattua iamintu: Battu ri pa’lokoang bijanna Kehat: Mahat ana’na Amasai, siagang Yoël ana’na Azarya; Battu ri passilokoang bijanna Merari: Kish ana’na Abdi, siagang Azarya ana’na Yehaleleel; Battu ri passilokoang bijanna Gerson: Yoah ana’na Zima, siagang Eden ana’na Yoah; Battu ri passilokoanna Elisafan: Simri siagang Yeiel; Battu ri passilokoang bijanna Asaf: Zakharia siagang Matanya; Battu ri passilokoang bijanna Heman: Yehiel siagang Simei; Battu ri passilokoang bijanna Yedutun: Semaya siagang Uziel.
13(29:12)
14(29:12)
15Nampa napasse’re ke’nanga tu Lewi maraengannaya, nampa natangkasi ngaseng kalenna ke’nanga. Le’baki anjo, situru’ parentana karaenga, antama’mi sikamma imanga ri Balla’Na Batara siagang appakkaramula natangkasi situru’ hukkung-hukkunNa Batara. Sikontu apa ra’masaka nierangi assulukang ri parang lakkenna Balla’Na Batara. Battu anjoreng naerangi tu Lewi mange ri Ka’bung Lappara’ Kidron ri pantaranna kotaya.
16(29:15)
17Anjo jama-jamanga appakkaramulai nigaukang ri tanggala’ se’re bulang se’re. Ri tanggala’ sagantuju le’ba’mi natangkasi ke’nanga sikontu paranglakkeng Balla’Na Batara sa’genna mae ri dallekang. Nampa natangkasi pole ke’nanga anjo bangunanga sagantuju allo sallona, sa’genna le’ba’ kabusu’mo ri tanggala’ 16 anjo bulanga.
18Nampa nalaporo’ anjo sikamma tu Lewia mae ri Karaeng Hizkia angkana, "Le’ba’mi natangkasi kabusu’ ikambe Balla’Na Batara, kammayatompa tampa’ pakkoro’bangngang nitunua, mejang untu’ roti nipatalaya, siagang sikontu pakkakasa’na.
19Le’ba’ tommi naalle ikambe ammotere’ pakkakasa’-pakkakasa’ napakabellaya Karaeng Ahas ri wattunna tanajampangia Batara lalang ammarentana. Le’ba’ ngasemmi natangkasi ikambe sikontu anjo pakkakasaka ammotere’ untu’ Batara, siagang kamma-kamma anne niaki ri dallekanna tampa’ pakkoro’bangnganga."
20Tenamo nammantang attayang sallo Karaeng Hizkia, napasse’remi pamimping-pamimpinna ra’yaka, nampa a’lampa siagang ke’nanga mange ri Balla’Na Batara.
21Angngerangi ke’nanga untu’ koro’bang pammopporang dosana kaluargana karaenga siagang ra’ya’ Yehuda siagang untu’ antangkasi Balla’Na Batara, iamintu 7 kayu sapi laki, 7 kayu gimbala’ laki, 7 kayu ana’ gimbala’, siagang 7 kayu bembe. Nasuroi karaenga sikamma imang-imang jari-jarina Harun ampassareangi anjo olo’-oloka irate ri tampa’ pakkoro’bangnganga untu’ a’jari koro’bang nitunu.
22Nisamballemi anjo sapi-sapia nampa nipatiri’ cera’na ri imang-imanga mae ri tampa’ pakkoro’bangnganga. Nampa napakamma todong anjo nagaukang ke’nanga mae ri anjo tujua gimbala’ siagang tujua ana’ gimbala’.
23Kala’busanna naallemi ke’nanga anjo sikamma bembea nampa naerang mae ri karaenga siagang ra’ya’ sitabanga assambayang anjoreng, nampa massing napadongko’ ngasemmi limanna ke’nanga ri tompo’ ulunna anjo bembea.
24Le’baki anjo, nisamballe ngasemmi anjo bembea ri imang-imanga, nampa napatiri’ cera’na mae ri tampa’ pakkoro’bangngang salaku koro’bang pammopporo’ dosana sikontu ra’yaka. Nagaukangi ke’nanga anjo gau’ kammaya lanri le’baki naparentakang karaenga sollanna assare taua koro’bang nitunu siagang koro’bang pammopporo’ dosa untu’ sikontu ra’ya’ Israel.
25Situru’ pitunju’-pitunju’ Napassareanga Batara mae ri Daud tete ri Na’bi Gad, anjamaya untu’ karaenga, siagang tete ri Na’bi Natan, nasaremi tugasa’ karaenga sikamma tu Lewia untu’ akkarena kacaping siagang gambusu’ lalang ri Balla’Na Batara,
26sangkamma napakea Daud. Kammayatompa nasare tongi tugasa’ imanga anjoreng untu’ appasa’ra tarompe’.
27Assaremi tanra Hizkia sollanna nipakaramulamo anjo upacara assarea koro’bang. Lalang nipassareanna anjo koro’banga, appakkaramulami taua akkelong kelong pammuji mae ri Batara, siagang sikamma pakarena musika napasa’rami tarompe’na siagang pakkakasa’ musi’ maraengannaya.
28Su’ju’mi Karaeng Hizkia siagang sikontu tau niaka anjoreng anynyomba ri Batara, nampa sikamma pakelonga akkelong tommi, kammayatompa sikamma pakarena musika napasa’ra ngaseng tommi musi’na, sa’genna la’busu’ ngaseng anjo koro’banga nakanre pepe’.
29(29:28)
30Karaenga siagang pamimping-pamimpinna ra’yaka nasuroi akkelong tu Lewia untu’ angkelongangi kelong-kelong le’baka napare’ Daud siagang Na’bi Asaf. Rannu kabusu’mi pa’mai’na sikontu taua nampa akkulantu’ siagang anynyomba ri Allata’ala.
31Le’baki anjo nakanamo Hizkia, "Lanri kamma-kamma anne le’ba’ kabusu’ mako nitangkasi untu’ Batara, jari salaku tanra sukkuru’nu, musti angngerangko koro’bang mae ri Balla’Na Batara." Nampa sikontu tau hadereka anjoreng massing naerammi anjo passarea, ba’lalo nia’ todong battu ri ero’ kalenna tonji nangngerang olo’-olo’ untu’ nipassareang salaku koro’bang nitunu.
32Angngerangi ke’nanga 70 sapi laki, 100 gimbala’, siagang 200 ana’ gimbala’, nampa napassareang untu’ a’jari koro’bang nitunu mae ri Batara.
33Angngerang tongi ke’nanga 600 sapi laki siagang 3.000 gimbala’ untu’ nipassareang siagang nikanre assama-sama siagang sikontu tau hadereka.
34Imang-imang le’baka nitangkasi sike’de’ji tau untu’ ampasuluki kukkulu’na sikontu anjo olo’-oloka. Lanri kammana anjo nibantumi ke’nanga ri tu Lewi, iamintu tu Lewi majarreka anna’gala’ ri paratorang katangkasanga. Ambantumi ke’nanga sa’genna angganna’ narapi’ paganna’na imang le’baka antangkasi kalenna.
35Pantaranganna koro’bang nitunua, assare tongi sikamma imanga iamintu janna battua ri olo’-olo’ koro’bang sukkuru’ nikanrea ri ra’yaka. Assare tongi ke’nanga anggoro’ na napatiri’ napasiagang anjo koro’bang nitunua. Kammami anjo, nanigaukammo ammotere’ panynyombanga ri Balla’Na Batara.
36Sannammi pa’mai’na Karaeng Hizkia siagang ra’yaka lanri lalang wattu sinampekang le’ba’mi nibantu ke’nanga ri Allata’ala untu’ anggaukang kabusuki anjo sikammaya.