Alkitab Mobile SABDA
[VER] : [MAKASAR]     [PL]  [PB] 
 <<  Amos 3 >> 

1Pilangngeri anne pasanNa Batara, he Bansa Israel le’baka nierang assulu’ battu ri Mesir ri Batara! Nakana Batara,

2"Battu ri sikontu bansaya ri lino, ikaumi se’re-se’rea bansa Kuassenga siagang Kuparhatikanga. Iaminjo saba’na nalompo dosanu, siagang ma’nassa laKuhukkung ngasengko."

3Maka akkullei taua a’lampa sipa’rua punna tena nasipato la’bi riolo?

4Maka lammammuki singaya ri romanga, punna tena nanggappa kanre? Maka lammammuki ana’ singaya battu ri leanna punna tenapa apa-apa nagappa?

5Maka laniallei ri sikko’ jangang-janganga lalang sikkoka, punna tena nitannangi sikkoka? Maka latattongkoki sikkoka punna tenapa apa-apa najakkala’?

6Maka latena nannekkere’ tau ri kotaya punna nalangngere’ sa’ra tarompe’ tanra pa’bundukanga? Maka akkullei natuju bala se’rea kota, punna tena Napabattui Batara?

7Tena le’bakai Batara Kaminang Tinggia anggaukang apa-apa punna tena Napa’nyatai rancanaNa mae ri sikamma na’bia, ata-atanNa.

8Punna ammammu’ singaya, inaimo tena namalla’? Punna a’bicara Batara Kaminang Tinggia, inaimo akkulle ammakkang siagang taeroka ampa’la’bangi pasanNa?

9Pa’la’bangi pabattu mae ri tau ammantanga ri balla’ karaenga ri Mesir siagang Asdod angkana, "A’rappung ngasengko ri moncong-moncong tammulilina Samaria, siagang parhatikangi karicuang lompoa kammayatompa pammaccokang nigaukanga anjoreng."

10Nakana Batara, "Sikamma anjo taua nabonei balla’-balla’ karaenna ke’nanga siagang barang-barang nagappaya battu ri gau’ ammacco’ siagang gau’ palla’. Ba’lalo tena sikali nangngasseng ke’nanga anggaukangi gau’ lambusuka.

11Lanri kammana anjo lanikurungi pa’rasanganna ke’nanga ri musu, lania’moroki pattahanganna, siagang laniellaki sikamma balla’ karaenna ke’nanga.

12Rapang sitau pakalawaki anggappayai ammotere’ bangkenna mami yareka sipolong mami tolinna gimbala’na le’baka nikanre ri singa, kamma tomminjo sike’de’ dudu mami lammantang battu ri pandudu’na Samaria attinro baji’-bajika pakkasia’na ri katinroang ga’gana."

13Nakana Batara Kaminang Makoasaya siagang Kaminang Tinggia, "Parhatikangi kamma-kamma anne, siagang pakaingaki jari-jarina Yakub.

14Ri allo Kuhukkunna tu Israel lanri dosana, laKuputtai tampa’-tampa’ pakkoro’bangnganga ri Betel. Tunggala’ tampa’ pakkoro’bangnganga lanitepoki cappa’-cappa’na sa’genna tu’guru’ naung ri buttaya.

15Sikamma balla’ untu’ wattu dinginga siagang balla’ pammari-marianga ri wattu timoroka laniancuruki. Sikamma balla’ nibelo-beloa siagang gading gajaya lanirumbangi; sikontu balla’ karaenga laniancuruki.


  Share Facebook  |  Share Twitter

 <<  Amos 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran