Alkitab Mobile SABDA
[VER] : [MAKASAR]     [PL]  [PB] 
 <<  Amsal 18 >> 

1Tau ampakabellayai kalenna battu ri paranna tau kalennaji bawang naparhatikang; yangaseng panggappana taua nageakki.

2Tau toloa tanangaiyai nisare pammahang; poro bone atinna bawang ero’ nasungkea tojeng.

3Dosaya siagang tunaya sipa’jappangi; punna nicallamo, mattantu nipakatuna tommi.

4Kana-kananna taua akkullei nakabattui kacara’dekang lantang sanrapang tamparang lompo, ci’nong sanrapang je’ne’ assolong.

5Tabajikai angngalle mae ri tau dorakaya siagang anjallakkangi tau tenaya salanna.

6Punna a’bicara tau toloa, appaumbai pa’beserang siagang eroki niajara’.

7Bicaranna tau toloa napanraki kalenna; nisikkoki ri kana-kana kalenna.

8Anjo appitinaya bajiki kasia’na; nangai naa’lu’ taua.

9Tau tenaya najampangi tugasa’na sangkammai kodina siagang tau nangaia ammanraki.

10Anjo Batara sanrapangi menara kassaka; Iami namangei tau lambusuka nanggappa tampa’ amang.

11Mingka tau kalumanynyanga nakana barang-baranna lanjagai kalenna sanrapang tembo’ tinggi siagang kassa’ ri tammulilina kotaya.

12Tau tampoa latu’guruki, tau tuna pa’maika lanipakalompoi.

13Appiali ri tenanapa nimallangngere’ Iami panggaukang tolo siagang nicalla.

14Lanri ero’ attallasa’, akkullei natahang taua pa’risika; punna tappela’mo kaerokanga, tappela’ tommi sikontu panrannuanga.

15Tau bajika akkala’na, tuli turerei ri pangngassengang; tau cara’deka, tuli eroki anggappa pangngajarang.

16Hadiaya anynyungkei oloang siagang angngantaraki mange ri tau malompoa.

17Tau uru a’bicaraya lalang ri pangadelang tuli tojengi cinikanna, mingka akkullemi niuji kana-kananna punna battumo balinna.

18Lanri nigoccanna nomoroka, akkullei nipakabaji’ passisalanga, ba’lalo passisalanna tukoasaya akkulle tongi nipakabaji’.

19Sari’battang pa’risika pa’mai’na la’bi sukkaraki nireppesi kala kota kassaka; pa’beseranga sanrapangi panjoli pakke’bu’ lompona kota pattahangnganga.

20Sikamma kana-kana nipasuluka nia’ ngaseng kasia’na.

21Makoasai lilaya untu’ ampasalamaki yareka ampanraki tallasaka; musti natanggongi taua kale’bakkanna apa napaua.

22Tau anggappaya anrong ana’, anggappai passawallang; anrong anaka iami passareNa Batara.

23Tu kasi-asia appalaki siagang kana-kana baji’; appiali tau kalumanynyanga siagang pangga’gara’.

24Nia’ sahaba’ tamamminraya, nia’ todong la’bi jarre’ na sari’battanga.


  Share Facebook  |  Share Twitter

 <<  Amsal 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel