Dual Panel1Teako lompo bicara ri passala’ allo ammukoa, lanri tanuassengai apa lakajarianga sinampe’.
2Teako palecei kalennu, boli’mi kamma tau maraenga anggaukangi anjo kammaya, ba’lalo tau tenaya nuassengi anggaukangi.
3Anjo batua siagang kassika ringang iji, punna nipasanrapang pa’risi’ pa’maika napakamma tau toloa.
4Anjo larroa pallaki siagang ammanraki, mingka inai akkulle attahang andallekangi akkimburua?
5Bajikangngangi pappasaile nilambusianga kala pangngamaseang tenaya nanipasuluki.
6Aganga natunrungki’ siagang pangngamaseang, mingka musua narakakki’ siagang racung.
7Punna bassoro’ taua, manna bania nitolla’ ngasengi; punna cipuruki taua, manna paika nyamang ngaseng kasia’na.
8Tau ambokoiyai balla’na, sanrapang jangang-jangang ambokoi ru’munna.
9Sanrapang minynya’-minynyaka siagang bau’-baukanga appakasannangi pa’mai’, kammaminjo kabajikanna aganga appakamalei nyawa.
10Teako kaluppai agannu yareka aganna manggenu. Teako appalakki bantuang ri sari’battannu lalang kasukkarang; a’matu-matuangngangi siampi’ balla’nu kala sari’battannu bellaya.
11Ana’, paralluko cara’de’, sollanna sannang nyawaku siagang akkulle appiali punna nicalla’.
12Tau cara’deka a’lili punna nia’ nacini’ bahaya; tau toloa a’jappa tulusuki nampa nituju ri bala.
13Inai ero’ antanggongi inranna tau maraenga, siratangi nialle baranna untu’ a’jari panynyikko’ janji.
14Inai a’bari sallang assa’ra lompo ri bari’basaka mae ri aganna, nikanai appasulu’ pattunra.
15Turiballa’ pa’beseranga sanrapangi sa’ra bosi turunga sila’busu’ allo.
16Tena olona nisuro ammakkang, sanrapang anging takkullea nitahang siagang minynya’ takkullea nikangkang.
17Sangkamma bassi baja ampakatarangi bassi bajaya, kamma tomminjo rupataua appilajaraki battu ri paranna tau.
18Inai ammarakai poko’ rappo-rappoang, lanakanrei rapponna. Laningai palayanga punna napakalompo karaenna.
19Sanrapang je’neka napaccarammengi tanja’nu, kamma tomminjo atinnu ampappicinikangi kalennu.
20Ri linona tau matea, tuli nia’ tampa’; kamma tomminjo kaerokanna rupa taua tena sanggana.
21Bulaeng siagang pera’ niuji lalang ri pepe’; taua niassengi battu ri sipa’na mae ri pappalecea.
22Manna pole nitunrung sarring tau toloa, talalanynyaki katoloanna.
23Parakai baji’-bajiki olo’-olo’ piaranu,
24lanri kakalumanynyangnganga poro sinampe’ji, ba’lalo koasa untu’ ammarenta tena natuli satunggu-tungguna.
25Rukuka ri paranga siagang ri monconga nibattasaki siagang nipasse’rei untu’ anjo olo’-olo’nu, mingka ilalang kamma-kammana anjo attimbomi pole ruku’-ruku’ berua.
26Battu ri bulunna sikamma gimbala’nu anggappako pakeang, siagang battu ri ballinna bembenu sipa’gang akkulleko anggappa pammali butta beru.
27Battu ri sikamma bembenu maraenganga akkulleko anggappa dadi’ untu’ kalennu siagang bone balla’nu kammayatompa palayang-palayannu.