Dual Panel1Battu ri lassu’na anjo taua lamma memangi, tena kullena; sinampe’ji attallasa’ siagang rassi pa’risi’ tallasa’na.
2Ta’bakkaraki nampa kalumeng sanrapang bunga; lanynyaki sanrapang bayang-bayang, tulusu’ a’jari lanynya’.
3O, Allata’ala, masakang erokKi’ ancinikia’, nampa Kisuroa’ andallekang ri pangadelanTa;
4Maka akkullei tau dorakaya appa’nia’ apa sukku’ baji’na?
5Jaina umuru’na rupataua le’ba’mi Kipattantu; siapa jaina bulanna le’ba’mi Kipa’nassa. Kipattantu tongi pa’baeng-baeng tallasa’na; tena olona lakkulle nadakkai.
6Lappassammi ammari-mari poso, teaKi’ ganggui; sollanna akkulle nakasia’ tallasa’na sa’genna le’ba’ tugasa’na.
7Nia’ ija panrannuanna poko’ kayu nita’banga; laccu’la’ poleangi, nampa attangke.
8Manna a’jari jappo’ aka’na lalang butta, na mate tonasa’na lanri botto’mi,
9mingka punna nisero ri je’ne’, attimbo poleammi; sangkamma lamungang beru, ammumba poleammi cu’la’-cu’la’na.
10Mingka punna mate rupataua, la’busu’mi riwaya’na; nabokoimi linoa, nampa kemae lampana?
11Sanrapang je’ne’ a’rumbu battu lalang ri kollanga, sanrapang binanga naunga je’ne’na sa’genna la’busu’,
12kamma tomminjo tau mateamo; tenamo nakkulle ambangung poleang. Tenamo nalambangung lalang nia’na ija langika, tenamo nale’ba’ ambangung poleang battu ri tinrona.
13Cokkoma’ lalang ri linona tau matea; jagaia’ sa’genTa tenamo Kilarro. Mingka Kipattantu wattunna untu’ Kiu’rangia’.
14Saba’, punna mate taua, maka akkullei attallasa’ ammotere’? Allo pila’ allo attayanga’ sa’genna allalomo wattu pa’risikku.
15Nampa laKikioka’, kunampa lappiali todong; lamangngamaseangKi’ ri nakke, tallasa’ bate pa’jariTa.
16Nampa laKijannangngi sikontu dakka-dakkaku, mingka tenamo Kiparhatikangi dosaku.
17LaKipammopporangi dosaku siagang Kipakabellai; sala rioloku Kilu’luki.
18Sallang sikamma monconga laruntungi siagang tassimbung-simbung, na moncong batu kassaka la’lessoki battu ri tampa’na.
19Batu-batua lanikekkeseki ri je’ne’ a’lo’loro’ sarringa; buttaya lanilo’lorangi ri bosi sarroa. Kammaminjo Kiancuru’na panrannuanna rupataua.
20Kibetai sa’genna satunggu-tungguna; Kisuroi a’lampa siagang Kipinrai rupanna.
21Ana’-ana’na a’jari tau la’biri’, mingka tanaassengai. Na punna a’jari hina ke’nanga, tena tau ampauangi.
22Pa’risi’naji tubuna nakasia’ tilu ri pa’mai’naji bawang nakapa’risang."