Dual Panel1"Nia’ pangngekeang kemae nibuntulu’ peraka; nia’ tampa’ kemae nipici’nongi bulaenga.
2Bassia nikekei battu ri buttaya; battu ri batua nipassolong tambagaya.
3Nitarrusuki sassang pakkaka, tampa’ kaminang lantanga nisalidiki. Anjoreng, lalang ri sassanga, a’boya taua batu-batuang.
4Bellai, ri tampa’ tenaya tau ammantang, tampa’ tenaya nale’ba’ nionjo’ siagang nilaloi, ta’gentungi taua ri otere’ anjama lalang ri kali’bong nikeke, sannaka sinona.
5Buttaya appaumba kanre mae ri rupataua, mingka rawanganna tommi anjo buttaya, yangasenna nibulingkara’ sa’genna tassimbung buttaya.
6Batu niaka lalang butta akkimbolongi batu paramata gau’ siagang limbu’bu’na nia’ bulaeng ti’no’na.
7Jangang-jangang balangkoaka tanaassengai oloanga mange anjoreng, siagang tarruka tale’bakapi anri’ba’ rateanna.
8Tale’bakapi singaya siagang olo’-olo’ sekke’ maraengannaya allalo ri agang sino mangea anjoreng.
9Angngekei taua batu sa’genna lantang manna pole antekammaya terasa’na, nabongkaraki monconga sa’genna aka’na.
10Ri wattunna appare’ oloang annarrusu’ ri moncong batua, nagappai paramata sannaka tinggina anggaranna.
11Sa’genna ri sikamma kabattuanna binangaya angngeke, nampa nagappa apa taccokkoa.
12Mingka kemae kacara’dekanga akkulle niboya? Kemaeki’ akkulle appilajara’ sollanna nikkulle pahang?
13Kacara’dekanga tenai ri tangnga-tangngana rupataua; tena angngassengi antekamma lompona anggarang sitojennaya.
14Nakana dapara’na tamparanga siagang tamparang lompoa angkanaya tenai kacara’dekanga ri ke’nanga.
15Kacara’dekanga takkulleai nipassambe siagang bulaeng ti’no’, yareka takkulleai niballi siagang pera’.
16Bulaeng siagang paramata kaminang ka’jalaka takkulleai napasangkammai anggaranna.
17Bulaenga siagang kaca alusu’ takkulleai sangkamma anggaranna, takkulleai nibayara’ siagang paramata bulaeng toa.
18Bella tinggina anggaranna kacara’dekanga na giwang, intang, siagang mutiara.
19Batu paramata siagang bulaeng ti’no, kurangi anggaranna ri akkala’ bajika.
20Kemae kabattuanna kacara’dekanga? Kemaeki’ akkulle anggappa pammahang?
21Tena apa-apa attallasa’ le’ba’ anciniki, ba’lalo jangang-jangang ri allaka tena todong naciniki.
22Manna kamateanga siagang kapanrakanga angkana todong, poro kabara’ji bawang nalangngere’ ke’nanga.
23Allata’alaji bawang angngassengi tampa’na kacara’dekanga, Iaji bawang angngassengi oloanga mange anjoreng,
24saba’ Ia naciniki cappa’-cappa’na linoa; yangasenna niaka rawanganna langika Najannangngi.
25Ri wattunna Nasare kagassingang anginga, siagang Napattantu pa’baeng-baenna tamparanga;
26ri wattunna Napattantu tampa’na bosia turung, siagang oloang naoloa kilaka siagang gunturuka;
27iaminjo wattua naNacini’ kacara’dekanga, Nauji anggaranna, nampa Nasare pangngellaiNa.
28Nakana Allata’ala ri rupataua, ‘Punna ero’ nugappa kacara’dekanga, musti nupakalompoi Allata’ala. Punna erokko ammahang, musti nupakabellai kaja’dallanga.’"