Dual Panel1Korah ana’na Yizhar battu ri golongang bijanna Kehat, suku Lewi, angngewai mae ri Musa. Niagangngangi ri tallua tau battu ri suku Ruben, iamintu Datan siagang Abiram ana’-ana’na Eliab, siagang pole On ana’na Pelet, kammayatompa nia’ 250 pamimping masahoroka, ia nipilea ri ra’yaka.
2(16:1)
3A’lampa ngasemmi siagang ke’nanga mange andallekang ri Musa siagang Harun nampa angkana, "Angganna’mi anjo sikammaya Musa! Sikontu umma’ Israel nisa’laki untu’ Batara. Nampa niaki Batara ri tangnga-tangngata ngaseng. Mingka angngapa nanukana kalennu la’bi tinggiangangko na umma’Na Batara?"
4Nalangngere’na Musa anjo kana kammaya, su’ju’mi naung ri buttaya nampa appala’ doang mae ri Batara.
5Nampa nakana mae ri Korah siagang sikamma tumminawanna, "Ammuko bari’basa’ laNappicinikangi Batara mae ri katte angkana inai umma’Na, siagang inai nisa’la’ untu’ mae ri KalenNa. Tau Napilea lanipa’biangi a’reppese’ mae ri Ia.
6Ammuko bari’basa’ ikau siagang sikamma tumminawannu musti angngalleko tampa’-tampa’ pepe’, nubonei bara pepe’ siagang dupa, nampa nuerang mange ri tampa’ pakkoro’bangnganga. Baji’mi naniciniki sallang angkanaya inai ri katte le’ba’ nipile ri Batara. Angganna’mi anjo, he ikau sikamma tu Lewi!"
7(16:6)
8Nampa angkana Musa mae ri Korah, "Pilangngeri, he ikau tu Lewi!
9Nukanaka passala’ ca’di-ca’di angkanaya laNapileko Allata’ala battu ri tangnga-tangngana tu Israel sollannu akkulle a’reppese’ mae ri Ia, siagang anggaukangi tugasaka ri KemaNa, kammayatompa anjamaya untu’ bansa Israel siagang allayani ke’nanga?
10Ikau Korah, siagang sikontu tu Lewi, nipakalompo mako ri Batara — nampa kamma-kamma anne annuntu’ tommako sedeng ero’ a’jari imang!
11Punna ikau siagang sikamma tumminawannu a’moro-moro mae ri Harun, sikontutojenna angngewa mako mae ri Batara!"
12Nampa nasuro kio’ Musa anjo Datan siagang Abiram; mingka nakanamo ke’nanga, "Taerokai ikambe battu!
13Maka tagannakkapi nueranna ikambe assulu’ battu ri butta Mesir copponga untu’ ambunoi ikambe anrinni ri parang lompoa? Apaka musti ammarenta tongko mae ri kambe?
14Sikontutojenna tena nanuerangi ikambe mange ri butta copponga yareka tena nanusarei ikambe koko siagang koko anggoro’ untu’ pisaka mae ri kambe! Kamma-kamma anne erokko antipui ikambe! Tena! Tena naero’ ikambe battu mae ri kau!"
15Teaimi sipato’ larrona Musa siagang nakanamo mae ri Batara, "O Karaeng, tea’ laloKi’ tarimai passarena ke’nanga. Tena le’bakai nia’ ri ke’nanga kupakarugi, manna pole sitau tania’; ba’lalo manna pole sikayua keledai tale’ba’ nia’ kualle battu ri ke’nanga."
16Nampa nakana Musa mae ri Korah, "Battu mako ammuko mae ri KemaNa Batara siagang anjo 250 tumminawannu. Lania’ tongi Harun anjoreng. Musti nuerangi massing tampa’ pepe’nu. Bonei dupa, nampa nupassareang mae ri Batara."
17(16:16)
18Jari tunggala’ taua angngerammi tampa’ pepe’, nabonei bara pepe’ siagang dupa, nampa ammenteng ri pakke’bu’ KemaNa Batara siagang Musa na Harun.
19Nampa napasse’re Korah sikontu ummaka; nampa ammenteng ke’nanga assidallekang siagang Musa na Harun ri pakke’bu’ KemaNa Batara. Ti’ring nia’mo nacini’ sikontu umma’ caya sioro’Na Batara.
20Nampa Nakana Batara mae ri Musa siagang Harun,
21"Ammono’bokoko battu ri sikamma anjo taua; laKupossoki ke’nanga kamma-kamma memang anne."
22Mingka su’ju’mi Musa siagang Harun anynyomba siagang nakana, "O Allata’ala, iKattemi katallassang mae ri sikontu apa attallasaka. Punna sitauja bawang doraka, apaka larroKi’ mae ri sikontu ummaka?"
23Nakanamo Batara mae ri Musa,
24"Suroi tau jaia ampakabellai kalenna battu ri kemana Korah, Datan siagang Abiram."
25Nampa a’lampamo Musa nirurungang ri sikamma pamimping Israel mange ri tampa’na Datan siagang Abiram.
26Angkanami Musa mae ri tu Israel, "Pakabellai kalennu battu ri anne tau ja’dalaka siagang tea sikaliko seroi barang-baranna ke’nanga. Punna tena nuppilangngeri, lanipanrakiko siagang ke’nanga lanri dosa-dosana ke’nanga."
27Nampa a’lampami tu Israel ampakabellai kalenna battu ri kemana Korah, Datan siagang Abiram. Assulu’mi Datan siagang Abiram na sitabang ammenteng ke’nanga massing ri pakke’bu’ kemana, siagang massing bainenna siagang ana’-ana’na ke’nanga.
28Nampa angkanamo Musa, "Kamma-kamma anne lanuassemmi angkanaya Batara assuroa’ anggaukangi anne sikammaya, siagang anjo kammaya teai ero’ kalengku.
29Punna mate anjo sikamma taua sangkamma biasa, tena hukkungang apa-apa battu ri Allata’ala, iaminjo pammatei angkanaya tena naNasuroa’ Batara.
30Mingka punna nia’ apa-apa Nagaukang Batara, ia tenayapa nale’ba’ nulangngere’ kajarianna lalang siapaya anne sallona, siagang punna tassungke buttaya untu’ angnga’luki ke’nanga siagang sikontu barang-baranna ke’nanga, sa’genna antama’ attallasa’ ke’nanga antama’ ri linona tau matea, nuassemmi angkanaya anjo taua angngewai mae ri Batara."
31Tena sallo ri le’ba’na Musa a’bicara, ta’bage ruami butta niaka irawangang bangkenna ke’nanga,
32nampa naa’lu’ ke’nanga siagang kaluargana ke’nanga kammayatompa sikontu tumminawanna Korah, siagang sikontu barang-baranna ke’nanga.
33Jari ta’jaloposo’ attallasa’mi ke’nanga antama’ ri linona tau matea siagang sikontu apa-apanna ke’nanga. Anjo butta ta’bage ruaya assiallemi ammotere’ nampa lanynya’mo ke’nanga nia’lu’ ri buttaya.
34Sikontu tu Israel niaka anjoreng lari ngasemmi ri wattunna nalangngere’ ke’nanga ammarrang; nakana ke’nanga, "Lariko! Naa’lukki’ sallang buttaya!"
35Nampa appabattumo pepe’ Batara na nakanre sa’genna ammutung anjo 250 tau assarea dupa.
36Nampa angkanamo Batara mae ri Musa,
37"Suroi Eleazar ana’na Imang Harun angngangkaki tampa’-tampa’ pepe’ battua ri anjo sesa-sesa akkanrea siagang napasiara’ aunna mange ri tampa’ maraenga, nasaba’ anjo tampa’ pepeka matangkasaki. Anjo barang-baranga iamintu passarena tumate nihukkung matea lanri dosana. Anjo barang-baranga matangkasaki lanri le’ba’mi nipassareang ri dallekanNa Batara; lanri kammana anjo musti nide’deki a’jari a’leppa’-leppa’ nipisi’ untu’ nipatempele’ ri bageang pantara’na tampa’ pakkoro’bangnganga. Anjo kammaya a’jari pappiu’rangi mae ri bansa Israel."
38(16:37)
39Jari naallemi Imang Eleazar anjo tampa’-tampa’ pepeka nampa nasuro taua ande’deki a’jari a’leppa’-leppa’ nipisi’ untu’ a’jari lapisang bageang pantara’na tampa’ pakkoro’bangnganga.
40Iaminjo a’jari pappiu’rangi mae ri bansa Israel angkanaya pantaranganna jari-jarina Harun, tena manna sitau akkulle battu mae ri tampa’ pakkoro’bangnganga untu’ attunu dupa mae ri Batara. Inai tau andakkai anjo paratoranga lanipanraki sangkamma Korah siagang sikontu tumminawanna. Yangasenna anjo kammaya nigaukangi situru’ apa Naparentakanga Batara mae ri Eleazar tete ri Musa.
41Ammukona bari’basa’ a’larro-larromi sikontu bansa Israel mae ri Musa siagang Harun. Nakana ke’nanga, "Le’ba’mi nubuno umma’Na Batara."
42Lalang asse’rena ke’nanga angngewai Musa siagang Harun, assailemi ke’nanga mae ri KemaNa Batara; na nacini’mo ke’nanga rammanga anrangkaki anjo Kemaya, nampa kacinikammi caya kahaderanNa Batara.
43A’lampami Musa siagang Harun mange ri dallekang KemaNa Batara;
44nampa Nakanamo Batara mae ri Musa,
45"Ammono’bokoko battu ri sikamma anjo taua. LaKupanraki anjo ke’nanga ri anjo memang tampaka!" Su’ju’mi ke’nanga sipa’rua anynyomba,
46nampa nakana Musa mae ri Harun, "Allei tampa’ pepe’nu, bonei siagang bara pepe’ battu ri tampa’ pakkoro’bangnganga siagang bonei dupa irateanna. Erangi linta’ mae ri ummaka siagang gaukangi upacara pammopporang dosaya untu’ ke’nanga. Lintakko! A’rinrami larroNa Batara siagang appakkaramulami garringa."
47Nagaukammi Harun anjo apa nakananga Musa. Larimi mange ri tangnga-tangngana ummaka sitabanga asse’re siagang appakkaramulayamo nitaba ri garring. Jari napadongko’mi Harun anjo dupaya irate ri bara pepeka, siagang nagaukammi upacara pammopporang dosaya untu’ ummaka.
48Ammarimi anjo garringa; niaki Harun ri tangnga-tangngana tau attallasaka ija siagang tau mateamo.
49Ia matea anjo wattua nia’ 14.700 tau jaina, tenapa nanirekengi ke’nanga tau matea lalang angngewana Korah.
50Ri wattunna ammarimo anjo garringa, ammotere’mi Harun mange ri Musa ri pakke’bu’ KemaNa Batara.