Dual Panel1Nakana Batara mae ri Musa,
2"Suroi tu Israel assareko sampulo anrua takkang, tasse’rei takkang untu’ tasse’rei suku, ia mustia napassareang pamimping sukua. Tulisiki arenna tunggala’ pamimpinna sukua ri anjo takkanga,
3nampa arenna Harun ri takkanna suku Lewi. Untu’ tunggala’ pamimping sukua musti nia’ se’re takkang.
4Erangi anjo sikamma takkanga mange ri KemaKu siagang padongkoki ri dallekanna Patti Parjanjianga, ri tampa’ biasaya Kupassibuntuli siagang ikau.
5Anjo takkanna tau Kupilea laccu’laki. Kammaminjo caraKu lampamari kunrarenna sikamma tau tulusu’ a’moro-moroa mae ri kau."
6Anjo passalaka napabattumi Musa mae ri tu Israel. Nampa sikamma pamimpinga massing napassareammi takkanna mae ri Musa, tasse’re takkang untu’ tunggala’ pamimping sukua. Yangasenna nia’ sampulo anrua, na nia’ takkanna Harun ri alla’na anjo sikamma takkanga.
7Nampa naboli’ Musa anjo sikamma takkanga ilalang ri KemaNa Batara, ri dallekanna Patti Parjanjianga.
8Ammukona bari’basa’, ri wattunna antama’ Musa ri KemaNa Batara, nacini’ni angkanaya anjo takkanna Harun, iamintu takkanna tu Lewia, accu’la’mi. A’bungami anjo takkanga, siagang a’rappo toami!
9Naalle ngasemmi Musa anjo takkanga nampa napappicinikang mae ri tu Israel. Nacini’mi ke’nanga anjo apa kajarianga; nampa massing naallemo ammotere’ takkanna massing pamimpinga.
10Nampa Nakanamo Batara mae ri Musa, "Padongkoki ammotere’ takkanna Harun ri dallekanna Patti Parjanjianga. Anjo takkanga musti niboliki salaku pappiu’rangi mae ri tu Israel nangaia angngewa, sollanna mate ke’nanga punna tena nammari a’moro-moro."
11Nagaukammi Musa anjo apa Naparentakanga Batara.
12Nampa nakanamo tu Israel mae ri Musa, "Punna kamma, cilakami ikambe! Lapanraki ikambe!
13Punna a’reppese’ taua mange ri KemaNa Batara musti matei; jari tenamo panrannuang mae ri kambe!"