Alkitab Mobile SABDA
[VER] : [MAKASAR]     [PL]  [PB] 
 <<  Bilangan 31 >> 

1Nakana Batara mae ri Musa,

2"A’balasakko mae ri tu Midian lanri apa le’baka nagaukang ke’nanga mae ri bansa Israel. Punna le’baki anjo lamate mako."

3Jari nakanamo Musa mae ri bansa Israel, "Sadia ngasengko untu’ a’bundu’; musti nubunduki tu Midian untu’ anggaukangi hukkunganNa Batara mae ri ke’nanga.

4Battu ri massing suku bansa Israel, musti appasadiako sisa’bu tantara untu’ maju mange a’bundu’."

5Jari nipilemi tassisa’bu tau battu ri massing suku bansana Israel, yangasenna nia’ sampulo anrua sa’bu tau, sadia ngaseng ero’ a’bundu’.

6Nasuromi Musa ke’nanga siagang Pinehas ana’na Imang Eleazar mange a’bundu’. Naerangi Pinehas barang-barang matangkasaka siagang sikamma tarompeka untu’ assare pammatei.

7Situru’ parentaNa Batara mae ri Musa, a’lampami tu Israel ambunduki tu Midian. Na nabuno ngasemmo ke’nanga sikontu tu bura’nena,

8kammayatompa lima karaenna tu Midian, iamintu: Ewi, Rekem, Zur, Hur siagang Reba. Bileam ana’na Beor, nibuno tommi.

9Natahammi tu Israel sikamma tubai’-bainena siagang ana’-ana’na tu Midian, kammayatompa narampasa’ ngasemmi sikontu olo’-olo’ piarana ke’nanga, siagang sikontu kakalumanynyanganna ke’nanga.

10Natunu ngaseng tommi kota-kotana siagang kema-kemana ke’nanga.

11Le’baki anjo naallemi tu Israel anjo sikontu barang nirampasaka, kammayatompa sikamma tunitahanga siagang olo’-oloka,

12nampa naerang mae ri Musa siagang Imang Eleazar kammayatompa mae ri sikontu umma’ Israel. Anjo wattua sitabangi ke’nanga akkema ri lappara’ Moab, ri birinna Binanga Yordan, ri ampi’na kota Yerikho.

13Jari assulu’mi Musa, Imang Eleazar siagang sikontu pamimping maraengannaya battu ri kemaya untu’ anruppai tantara Israel.

14Nakalarroimi Musa sikamma komandang tantaraya, kapala pasukanga siagang komandang regua ia beru ammotereka battu a’bundu.

15Nakana mae ri ke’nanga, "Angngapa nanulappassang ngaseng anjo sikontu bainea attallasa’?

16Sai iaminjo sikamma tubai’-bainea anturuki pappaunju’na Bileam, sa’genna nanyonyo’ umma’ Israel ri Peor untu’ ambokoi Batara? Siagang iaminjo appabattu bala mae ri umma’Na Batara!

17Jari, kamma-kamma anne buno ngasengi sikamma ana’-ana’ bura’nea siagang sikamma tubaine tenayamo natulolo.

18Mingka sikamma baine tuloloa iji akkullei nualle untu’ kalennu.

19Nampa ikau sikamma le’baka ammuno tau yareka anseroi mayaka, musti ammantangko ri pantaranganna kemaya lalang tuju allo sallona. Ri allo makatallu siagang makatujua, ikau ngaseng siagang sikontu anjo baine nutahanga musti nugaukangi upacara pannangkasi kalea.

20Sikontu pakeanga siagang apa-apa mamo battu ri kukkuluka, bulu bembe, yareka kayu, musti nitangkasi ngaseng tongi."

21Nampa nakanamo Imang Eleazar mae ri anjo sikamma tau beru ammotereka a’bundu’, "Iaminne paratorang-paratorang Napassareanga Batara mae ri Musa.

22Sikontu apa-apa attahanga ri pepe’, kammayami bulaeng, pera’, tambaga, bassi, tima kebo’ siagang tima le’leng, musti nitangkasi ngasengi lalang ri pepeka. Nampa musti nitangkasi todong sikontu anjo barang-barang kammaya siagang je’ne’ upacara pannangkasi sollanna tenamo nara’masa’. Sikontu barang maraengannaya, ia tenaya nattahang ri pepe’, musti nitangkasi siagang je’ne’ upacara pannangkasi.

23(31:22)

24Ri allo makatujua musti nusassai pakeannu, nunampamo tena nura’masa’, siagang akkulle mako antama’ ri pakkemaanga."

25Nakana Batara mae ri Musa,

26"Ikau siagang Imang Eleazar, siagang ngaseng sikamma pamimping umma’ Israel maraengannaya, musti nurekengi sikontu anjo barang-barang le’baka nurampasa’, kammayatompa sikamma tunitahanga siagang olo’-oloka.

27Anjo wassele’ rampasanga musti nubage ruai sangkamma-kamma jaina; sipa’gang untu’ tantara a’lampaya a’bundu’, nampa sipa’gang pole untu’ umma’ maraengannaya.

28Untu’ passare nisa’la’ mae ri Nakke, Batara, musti nuallei battu ri anjo bageanna sikamma tantaraya tasse’re lalanna ta’limang bilangnganga, baji’ battu ri tau nitahanga, kammayatompa battu ri sapia, keledaia, gimbalaka, siagang bembea.

29Passareangi anjo mae ri Imang Eleazar a’jari passare nisa’la untu’ iNakke, Batara.

30Battu ri bageanna umma’ Israel, musti nuallei tasse’re battu ri ta’limampuloa, baji’ battu ri tau nitahanga, kammayatompa battu ri sapia, keledaia, gimbalaka siagang bembea. Passareangi anjo sikammaya mae ri tu Lewi angngurusukai KemaKu."

31Nagaukammi Musa siagang Imang Eleazar situru’ anjo apa Naparentakanga Batara.

32Pantaranganna le’baka naalle kalenna sikamma tantaraya, anjo wassele’ rampasanga jaina iamintu: 675.000 kayunna gimbala’ siagang bembe, 72.000 kayunna sapi, 61.000 kayunna keledai siagang 32.000 jaina tulolo.

33(31:32)

34(31:32)

35(31:32)

36Bageruanna anjo sikammaya jaina nisareangi sikamma tantaraya, niatoroka kamma anne: 337.500 kayunna gimbalaka siagang bembea, niallei 675 kayunna untu’ passare nisa’la’ mae ri Batara; 36.000 kayu sapi, niallei 72 kayu untu’ passare nisa’la’ mae ri Batara; 30.500 kayu keledai, niallei 61 kayu untu’ passare nisa’la’ mae ri Batara; 16.000 tulolo niallei 32 tau untu’ passare nisa’la’ mae ri Batara.

37(31:36)

38(31:36)

39(31:36)

40(31:36)

41Nampa napassareang Musa anjo passare nisa’laka mae ri Imang Eleazar untu’ nipassareang mae ri Batara, situru’ Naparentakanga Batara.

42Bageang untu’ ra’yaka sangkammai jaina siagang bageang untu’ tantaraya: 337.500 kayunna gimbala’ siagang bembe; 36.000 kayu sapi, 30.500 kayu keledai, siagang 16.000 jaina tulolo.

43(31:42)

44(31:42)

45(31:42)

46(31:42)

47Sangkamma Naparentakanga Batara, naallemi Musa tasse’re battu ri ta’limampuloa tunitahang siagang olo’-oloka, nampa napassareang mae ri tu Lewi tugasaka ri KemaNa Batara.

48Nampa mangemo andallekang ri Musa anjo sikamma komandang tantara le’baka ampimpingi tantara Israel a’bundu’,

49nampa a’laporo’ angkana, "Bapa’, le’baki narekeng ikambe sikamma tantara ana’ buana ikambe. Ma’nassami angkanaya angganna’ ngasenji jaina ke’nanga, tena manna sitau tappela’.

50Lanri kammana anjo angngerammi ikambe belo-belo bulaeng, kammayami: ponto lima, ponto bangkeng, cincing, anting-anting, siagang rante massing naallea ikambe. Yangasenna anne napassareang ngasengi ikambe mae ri Batara a’jari passarena ikambe, sollanna natuli Nala’langi ikambe."

51Nampa natarimamo Musa siagang Imang Eleazar anjo bulaenga, yangasenna a’rupa belo-belo kabusuki.

52Ia battala’na anjo passarena sikamma komandanga iamintu a’biringi ruambilangngang kilo.

53Mingka anjo tantaraya massing angngallemi battu ri anjo wassele’ rampasanga untu’ kalenna ke’nanga.

54Nampa naerammo Musa siagang Imang Eleazar anjo bulaenga mange ri KemaNa Batara sollanna Nala’langngi Batara bansa Israel.


  Share Facebook  |  Share Twitter

 <<  Bilangan 31 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran