Dual Panel1Kabara’na angkanaya anjo tu le’baka nipela’ nabangungi Balla’Na Batara, Allata’alana Israel, nalangngereki musunna tu Yehuda siagang Benyamin.
2Lanri kammana mangemi ke’nanga assicini’ siagang Zerubabel siagang sikamma imanga, nampa napala’ ke’nanga angkana, "Kipa’biang tommi ikambe amminawang todong ambangungi anjo Balla’Na Batara, nasaba’ ikambe anne tau anynyomba tongki’ ri Allata’alata, sangkamma ikatte ngaseng. Ikambe tuli assare tongki’ koro’bang mae ri Ia, appakkaramula ri nieranna ikambe mae anrinni ri Esar-Hadon, karaeng Asyur."
3Mingka appialimi Zerubabel, Yesua, siagang sikamma anjo kapala golonganga angkana, "Tenaja naparallu ikambe ri bantuannu untu’ ambangungi Balla’Na Batarana ikambe. Kalenna tonji ikambe lambangungi situru’ parentana Kores, karaeng Persia, mae ri kambe."
4Nampa appakkaramulamo anjo pandudu’ salloamo ammantang ri anjo pa’rasanganga ampakalammai sumanga’na tu Yahudia, siagang nagaratta’mi ke’nanga sollanna napammari ke’nanga anjo pambangunanga.
5Nasogo’mi ke’nanga siapa area tunna’galaka jama-jamang ri pamarenta Persia, sollanna nahalangi ke’nanga anjo rancanana tu Yahudia. Tuli kammaminjo kajariang lalang pamarentahanna Karaeng Kores sa’genna ri pamarentahanna Darius.
6Ri pakaramula pamarentahanna Karaeng Ahasweros, annulisiki sura’ musu-musunna pandudu’ Yerusalem siagang Yehuda. Anjo suraka, sura’ kabaratang.
7Kammayatompa ri jammang pamarentahanna Artahsasta, karaeng Persia, a’mole-molei anjo kajariang kammaya. Bislam, Mitredat, Tabeel siagang agang-aganna ngaseng ke’nanga, annulisiki sura’ mae ri karaenga. Anjo suraka nitulisiki lalang bicara Aram, nampa musti nipalembai ri wattunna nibaca.
8Annarima tongi sura’ Artahsasta ri passala’na Yerusalem. Anjo suraka nikiringi ri Guburnur Rehum siagang Simsai, jurutulisi’ propinsi siagang nibantui ri sikamma agang-aganna ke’nanga, iamintu sikamma hakinga siagang sikamma tu ammarenta maraengannaya, ia battua ri Erekh, Babel, Susan ri Pa’rasangang Elam,
9(4:8)
10kammayatompa bansa-bansa maraengannaya, ia nieranga ri tumalompoa Asnapar mange anjoreng nampa nisuro ammantang ri kota Samaria siagang kota-kota maraengannaya ri propinsi Efrat bageang ilau’.
11Kammaminne bonena anjo suraka, "Mae ri dallekang tumala’birika Karaeng Artahsasta, sura’ battu ri sikamma atanna karaenga, niaka ammantang ri Efrat bageang ilau’. Salama’.
12Poro kiassengi karaeng, angkanaya, anjo sikamma tu Yahudi le’baka ambokoi daera-daera maraenga lalang ri pamarentahanta, kamma-kamma anne nia’mi ammantang ri Yerusalem, nampa kamma-kamma anne nabangummi ammotere’ anjo kota ja’dalaka siagang nangaia apparicu. Appakkaramulami ke’nanga ambangungi ammotere’ tembo’-tembo’na siagang tasalloami nanapa’le’ba’ anjo jamanga.
13Punna akkulle nabangung ammotere’ anjo kotaya siagang le’ba’ nabangung tembo’-tembo’ kalli’na, talaerokami pandudu’na a’bayara’ paja’, sa’genna kurammo panggappanna kakaraenganga.
14Kainrangngang pa’mai’ baji’mi ikambe ri karaenga, nataeroka ikambe anciniki karaenga nipa’rugi. Lanri kammana, napalaki ikambe,
15sollanna kisuro paressa sura’-sura’ riwaya’na boe-boeta karaeng. Battu ri bonena anjo sura’ riwayaka akkullei kiasseng angkanaya anjo kota Yerusalem memang nangai apparicua siagang riolo iji natuli napa’rugi sikamma karaenga siagang pamarenta propinsia. Pandudu’na tuli susai nipimping. Lanri kammana minjo naniancuru’mo anjo kotaya.
16Jari, napattantuna ikambe, angkanaya punna nibangungi anjo kotaya ammotere’ siagang nipaenteng ammotere’ tembo’-tembo’ kalli’na, talakkullea maki’ karaeng langkoasai propinsi Efrat bageang ilau’ anne."
17Nabalasa’mi karaenga anjo suraka angkana, "Mae ri Guburnur Rehum siagang Simsai jurutulisi’na propinsia, kammayatompa sikontu agang-aganna ke’nanga, niaka ammantang ri Samaria siagang kota-kota maraengannaya ri propinsi Efrat bageang ilau’. Salama’.
18Anjo sura’ le’baka nukiring mae ri nakke, le’ba’mi nipalemba siagang nibacakang mae ri nakke.
19Nampa le’ba’mi kuparentakang sollanna niparessa sura’-sura’ riwaya’ allaloa, na memang a’butti angkanaya ri jammang riolo iji natuli nangai tu Yerusalem angngewai kakoasanna sikamma karaenga, siagang jai pandudu’na nangai angngewaya siagang apparicua.
20Le’baki nia’ siapa are karaeng barani ammarenta anjoreng siagang nakoasai sikontu daera propinsi bageang ilau’, nampa appajappa paja’ siagang passare mae ri karaenga.
21Lanri kammana, appasulu’ mako sura’ parenta sollanna napammari jama-jamanna sikamma anjo taua, sollanna tena nabangungi ammotere’ anjo kotaya sa’genna nia’ parenta maraeng battu ri nakke.
22Gaukammi linta’ anjo parentaku sollanna tena napila’ lompo karugiangku!"
23Tasalloai ri le’ba’na nibacakang mae ri Rehum anjo sura’na Artahsasta, kammayatompa mae ri Simsai siagang agang-aganna ke’nanga, a’lampami ke’nanga mange ri Yerusalem. Nampa napassa tu Yahudia ampamari jama-jamanna ke’nanga ambangungi anjo kotaya.
24Nipammarimi nijama pambangunanna Balla’Na Batara ri Yerusalem siagang tenamo nanipannarrusuki sa’genna ri makaruang taunna ammarenta Darius, karaeng Persia.