Dual Panel1Tena nasallo ribokoanganna, ri wattunna pakkattoang ase gandung, a’lampami Simson angkunjungi bainenna. Angngerangi sikayu bembe rungka untu’ bainenna. Na nakanamo Simson ri matoang bura’nena, "Erokka’ antama ri kamaraka sicini’ bainengku." Mingka tanipa’biangai ri matoang bura’nena.
2Nakana ri Simson, "Kukanai birisi’ tojeng-tojeng mako mae ri ia. Jari kupassareammi mae ri agannu. Mingka akkullei nualle andi’na. La’bi ga’gangangi pole anjo andi’na."
3Nakanamo Simson, "Kamma-kamma anne teaimi nakke sala punna nia’ apa-apa kugaukang mae ri tu Filistin."
4Mangemi anjakkala’ tallum bilangngang serigala. Nampa napassisikkokang ingkonna ta’rua-rua anjo serigalaya. Na nasarei sulo ri pa’ruppang passikko’na.
5Le’baki anjo naparinrami anjo suloa nampa nalappassang ngaseng anjo serigalaya, na nabongka antama ri sikamma kokonna tu Filistin. Akkanre ngasemmi sikontu ase gandung le’baka nikatto anjoreng. Ba’lalo amminawang tommi akkanre sikamma koko anggoroka.
6Nasalidikimi tu Filistin angkana inai anjo ampanggaukang kamma. Na nipauammo ke’nanga angkana Simson ampanggaukang, lanri le’baki napassareang matoang bura’nena ri Timna anjo bainenna Simson mae ri aganna Simson. Jari nitunumi ri tu Filistin anjo bainea siagang sikontu bone balla’na manggena, sa’genna la’busu’.
7Nakanamo Simson mae ri anjo tu Filistin, "O, kammaminne batenu appanggaukang? Assumpa’ angkana tena kulammari punna tena nale’ba’ kubalasa’ mae ri kau ngaseng!"
8Nampa nabundukimo siagang nasessa-sessami ke’nanga. Jaimi tau ri ke’nanga nabuno. Le’baki anjo, a’lampami mange ammantang ilalang ri se’reang kali’bong batu, irate ri bulu’ batua ri Etam.
9Jari mangemi tu Filistin ri daera Yehuda nampa appare’ kema anjoreng. Nampa nabunduki kota Lehi.
10Akkuta’nammi tu Yehuda mae ri tu Filistin angkana, "Apa saba’na na nubunduki ikambe?" Appialimi ke’nanga angkana, "Battuki’ anne ero’ anjakkalaki Simson, sollanna akkulle nigau’ kamma batena appanggaukang mae ri kambe."
11Nalangngere’na anjo a’lampami tu Yehudaya nia’ 3.000 tau mange ri kali’bong batu niaka irate bulu’ batu, ri Etam. Nakanamo ke’nanga anjoreng, "Simson, tenaka nanuassengi angkanaya nakoasaiki’ tu Filistin? Apa anne nugaukang mae ri kambe?" Appialimi Simson angkana, "Musti kubalasaki apa le’baka nagaukang ke’nanga mae ri nakke."
12Nakanamo ke’nanga, "Battui anne ikambe untu’ ansikkokko nampa nipassareangko mae ri tu Filistin." Nakanamo Simson, "A’janji mako rolong, angkanaya ikau talanubunoaja’."
13Nakanamo ke’nanga, "Baji’mi. Nasaba’ lanisikko’ jako bawang nampa nipassareangko mae ri tu Filistin. Tena nalanibunoko." Nampa nisikko’mi Simson siagang rua otere’ beru, nampa nierang ri ke’nanga battu ri anjo kali’bong batua.
14Ri wattunna battu mae ri Lehi nierang Simson massing lari-larimi battu tu Filistin mange anggora-gorai. Ti’ring a’jari kassa’mi Simson lanri kakoasanNa Batara. Natappu’-tappu’mi anjo otere’ passikko’ limanna, sangkamma le’ba’ angkana otere’ ammutung anjo otereka garana.
15Nia’mo nabuntulu’ se’re buku gigi keledai, beru dudu iji. Narappummi anjo bukua, nampa napake a’jallo’, ampalu-palui taua. Sa’genna nia’ 1.000 tau mate nabuno.
16Nampa akkelong-kelommo Simson nakana: "Buku giginna keledaia, kupake ammuno 1.000 tau, buku giginna keledaia, kupake ampatambungi maya’na ke’nanga."
17Le’baki anjo napela’mi anjo buku gigia. Iaminjo saba’na na niaremmo anjo tampaka Ramat-Lehi (battuanna bulu’ buku gigi).
18Nampa turere dudumo nasa’ring Simson. Akkio’mi mae ri Batara, angkana, "Silalongku Kisare pammetang lompo. Maka lamate tangnginunga’ kamma-kamma anne sa’gengku najakkala’ tu Filistin tenaya nanaassengKi’?"
19NaNasungkemo Allata’ala se’re kali’bong ri anjo bulu’ batua ri Lehi, nampa assulu’mo je’neka battu anjoreng. Angnginummi Simson sa’genna baji’mi nasa’ring ammotere’. Iaminjo saba’na naniareng timbuseng je’neka "Timbuseng je’ne’ Hakor" Anjo timbuseng je’neka nia’ iji ri Lehi.
20Ruampulo taungi sallona Simson ampimpingi umma’ Israel ri wattunna nikoasai ke’nanga ri tu Filistin.