Dual Panel1(12-2) Sikontu apa-apa nagaukanga bansa Israel battu ri bari’basa’ sa’genna bangngi tena ngaseng matu-matunna siagang poro angngerangi kapanrakang, sanrapang anging battu iraya. Kajekkonganna siagang kapallakkanna ke’nanga pila’ katambangi. Appareki ke’nanga parjanjiang-parjanjiang siagang Asyur, kammayatompa angngerangi minynya’ mange ri Mesir salaku tanra passari’battangang."
2(12-3) Nia’ parkaraNa Batara siagang bansa Yehuda; kammayatompa laNahukkung tongi tu Israel lanri gau’-gau’na ke’nanga. LaNabalasaki panggaukanna ke’nanga.
3(12-4) Baku’ lalanna ija ri battanna amma’na anjo Yakub, iamintu boe-boena ke’nanga, nanalacci’ memammo sari’battang kambara’na iamintu Esau; na ri wattunna lompomo, a’lagami Yakub siagang Allata’ala.
4(12-5) A’lagai siagang sitau malaeka’, nammeta. Nampa angngarru’ appala’ nibarakkaki. Nampa ri Betel, battui Allata’ala mae ri Yakub, iamintu boe-boeta anjo, a’bicara siagang ia.
5(12-6) Anjo Allata’ala iamintu Batara Kaminang Makoasaya. ArenNa iamintu Batara. Lalang iaminjo arenNa naNakellai taua anynyomba mae ri Ia.
6(12-7) Lanri kammana anjo, he ikau ngaseng jari-jarina Yakub, tappa’ lalo mako mae ri Allata’alanu siagang ammotere’ mako mae ri Ia. Attallasa’ mako lalang pangngamaseang siagang kalambusang, siagang attayang mako siagang sa’bara’ sa’genna angngalle tindakang Allata’alanu.
7(12-8) Nakana Batara ri bansa Israel, "Jekkong ngasengko sangkamma tu Kanaan; sikamma padanggannu nangai natipu sambalu’na ammake timbangang tenaya nannaba.
8(12-9) Nakana ke’nanga, ‘Kamma-kamma anne kalumanynyang maki’. Assawala’ maki’. Tena manna sitau akkulle antuduki’ angkanaya lanri kajekkonganta nakiakkalumanynyang.’
9(12-10) Mingka iNakke, Karaeng Allata’alanu, le’baka angngerang ngasengko assulu’ battu ri Mesir, laKupammantangko pole ri kema-kemaya sangkamma riolo, ri wattungKu battu mae ri kau ri parang lompoa.
10(12-11) Le’ba’Ma’ a’bicara mae ri na’bi-na’bia, siagang jaimi pappiso’na le’ba’ Kupicinikiangi ke’nanga. Tete ri ke’nanga Kupaumi sikamma rancanaKu untu’ ikau ngaseng, ummakKu,
11(12-12) mingka manna nakamma tuli nia’na ija anynyomba barhala ri Gilead, kammayatompa assare koro’bang sapi irate ri tampa’ pakkoro’bangnganga ri Gilgal. Mingka anjo ke’nanga anynyombaya ri anjo barhalaya lamatei, siagang anjo tampa’-tampa’ pakkoro’bangnganga ri Gilgal la’jari tambungang batui ri koko-kokoa."
12(12-13) Nampa lari Yakub, iamintu boe-boeta, mange ri Mesopotamia; siagang napa’jari atami kalenna a’jari pakalawaki gimbala’ untu’ anggappa baine battu ri ana’na anjo patannaya gimbala’.
13(12-14) Appabattui Batara sitau na’bi untu’ angngerangi tu Israel assulu’ battu ri tampa’ nipare’ atana ke’nanga, iamintu butta Mesir, kammayatompa untu’ anjagai ke’nanga.
14(12-15) Tu Israel napakanassumi Batara; siratangi ke’nanga nihukkung lanri kaja’dallanna ke’nanga. LaNihukkungi ke’nanga ri Batara lanri passabakkang ke’nanga nanihina Batara.