Alkitab Mobile SABDA
[VER] : [MAKASAR]     [PL]  [PB] 
 <<  Hosea 2 >> 

1Lanri kammana anjo akkanamako ri julu bansanu "Umma’Na Allata’ala" siagang "Nikamaseanga ri Batara".

2Nakana Batara, "He ana’-anakKu, anjo amma’nu teaimi bainengKu, siagang iNakke teaiMa’ bura’nenna. Lanri kammana anjo akkara-kara mako siagang ia, sollanna tenamo na’gau’ bawang siagang assundala’ pole.

3Punna tulusu’ assundala’na, laKusungkeangi pakeanna sollanna assolara’ sangkamma ri allo nilassukanna. LaKupa’jari sanrapang butta kalotoro’ na roso’, nalamate napakamma turere.

4Ikau ana’-ana’na, tena nalaKukamaseangko; ikau lassukko battu ri gau’ passundallang.

5Amma’nu pasundala’ tena siri’na. Angkanai, ‘Erokka’ a’lampa mange ri tanring-tanringku, assarea’ kanre-kanreang siagang inung-inungang, kaeng wol siagang kaeng lenang, minynya’ zaitun siagang anggoro’.’

6Lanri kammana anjo laKukurungi lalang ri rompo’ akkatintinga, siagang laKujempangi oloanna siagang kalli’ tembo’.

7Lanaondangi sikamma tanring-tanrinna, mingka tena nalata’rapi’ mae ri ke’nanga. Lanaboyai ke’nanga, mingka talanabuntulai ke’nanga. Nampa lanakanamo, ‘Erokka’ ammotere’ mange ri bura’ne rioloku; riolo la’bi bajikangngangi katallassangku nakamma-kammaya anne.’

8Amma’nu tenamo naania’ angkanaya iNakke assarei gandung, anggoro’, minynya’ zaitun, siagang sikontu bulaeng na pera’ niaka napake untu’ anynyomba ri anjo Rewata Baal.

9Lanri kammana anjo, ri wattu pakkattoanga sallang laKuallei ammotere’ passareKu, iamintu gandung, anggoro’, kaeng wol siagang kaeng lenang Kupassareanga mae ri ia untu’ pakeanna.

10LaKusolarri ri dallekanna sikontu tanrinna. Na tena manna sitau battu ri ke’nanga akkulle allappassangi battu ri kakoasangKu.

11Sikontu passua’-suarranna laKupammari, baji’ passua’-suarrang taung kammayatompa passua’-suarrang bulang-bulang siagang allo-allo Pammari-mariang; bodona kana, sikontu allo lompo agamana ke’nanga laKupammari.

12LaKuputtai poko’-poko’ anggoroka siagang poko’-poko’ ara nakanaya passawallang nagappaya battu ri palayananna mae ri sikamma tanrinna. LaKupinrai koko-koko anggoroka siagang koko-koko araya a’jari romang; labattui olo’-olo’ sekkeka ampanraki.

13LaKuhukkungi lanri napakei allo-alloa untu’ attunu dupa mae ri Rewata Baal, kammayatompa namodei kalenna siagang belo-belo untu’ angngondangi sikamma tanring-tanrinna, nampa nakaluppai taba sikaliMa’. INakke, Batara, anne akkana."

14Nakana Batara, "Lanri kammana anjo laKuerangi mange ri parang lompoa; laKunyonyoki anjoreng siagang kana-kana passingaiang.

15Koko-koko anggoro’na laKupoterangi mae ri ia, siagang Ka’bung Kasusaanga laKupinrai a’jari pakke’bu’ panrannuang. Anjoreng lanaruppaiA’ sangkamma ri wattu lolona, ri wattu beru assulu’na battu ri Mesir.

16Nampa iNakke lanakio’ bura’nenna, teaimi Rewata Baalka.

17Tenamo nalaKupa’biang antappui arenna Baal, sa’genna nakaluppaimo taua anjo arenga.

18Anjo wattua lapparekKa’ parjanjiang siagang sikontu rupanna olo’-oloka, sollanna tanaganggua ke’nanga ummakKu. LaKupammari sikontu pa’bundukanga siagang Kupabella ngasengi sikontu pakkakasa’ pa’bundukanga battu ri pa’rasanganna ummakKu, naKupakasannang siagang Kupakaamang tallasa’na ke’nanga.

19Israel, laKupa’jariko bainengKu, baine assaKu satunggu-tungguna. LaKukamaseangko siagang tuli Kukarimangngiko; laKulambusi pa’maikKu mae ri kau siagang lamajarreki pangngaingKu.

20LaKunikkaiko situru’ janjingKu. LanuaniA’ salaku Bataranu.

21Anjo wattua punna appala’ doangi Israel ummakKu, laKupilangngeri pappala’na ke’nanga. Kupaturungi bosia battu ri langika sa’genna angngerang pole buttaya gandung, anggoro’ siagang minynya’ zaitun.

22(2:21)

23LaKupa’jari salewangangi tallasa’na ummakKu siagang ammantang tuli ri pa’rasanganna ke’nanga. Ri ke’nanga nigallaraka ‘Tenaya Nikamaseangi’ laKupappicinikangi angkanaya Kukamaseangi ke’nanga, na ri ke’nanga nigallaraka ‘Teai UmmakKu’, laKukanai, ‘Ikau Ngaseng UmmakKuko’. Lappiali ke’nanga kamma anne, ‘IKatte Allata’alana ikambe.’"


  Share Facebook  |  Share Twitter

 <<  Hosea 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran