Alkitab Mobile SABDA
[VER] : [MAKASAR]     [PL]  [PB] 
 <<  Imamat 27 >> 

1Napassareangi Batara mae ri Musa

2anne paratoranga untu’ bansa Israel. Punna nia’ tau nipassareang mae ri Batara untu’ anrupai tinja’na, anjo taua musti nipasuluki siagang siapa are jaina doe’

3situru’ anggaranna doe’ nipakea ri KemaNa Batara; — irateanna umuru’ 60 taung: bura’ne ~~ 15 doe’ pera’; baine ~~ 10 doe’ pera’; — 20 taung sa’genna 60 taung: bura’ne ~~ 50 doe’ pera’; baine ~~ 30 doe’ pera’; — 5 taung sa’genna 20 taung: bura’ne ~~ 20 doe’ pera’; baine ~~ 10 doe’ pera’; — rawangngang 5 taung: bura’ne ~~ 5 doe’ pera’; baine ~~ 3 doe’ pera’;

4(27:3)

5(27:3)

6(27:3)

7(27:3)

8Punna anjo tau attinjaka kasi-asi dudui untu’ ambayaraki anggarang le’baka nipattantu, musti naerangi anjo tau eroka napassareang ri Batara mae ri imanga. Imanga musti napanaungi anggaranna situru’ pakkullenna anjo taua.

9Punna anjo tinjaka iamintu ri passala’na olo’-olo’ hallalaka, tenaya nakkulle nitarima salaku passare mae ri Batara, anjo tau attinjaka takkulleai nasambei siagang olo’-olo’ maraeng, nasaba’ sikontu apa nipassareanga mae ri Batara a’jari Napatangi Batara. Punna kammaji nasambeina todong, anjo ruaya olo’-olo’ a’jari Napatang rua-ruai Batara.

10(27:9)

11Mingka punna anjo tinjaka iamintu ri passala’na olo’-olo’ haranga, tenaya nakkulle nitarima salaku passare mae ri Batara, anjo tau attinjaka musti naerangi anjo olo’-oloka mae ri imanga.

12Imanga musti napattantui angkana siapa anggaranna situru’ kaadaanna anjo olo’-oloka. Nampa anjo anggarang napattantua takkulleai nitawarri.

13Punna anjo taua eroki napasulu’ olo’-olo’na, musti nabayaraki ballinna nampa natambai ruampulo parseng.

14Punna nia’ tau ampassareangi balla’na mae ri Batara, imanga musti napattantui ballinna situru’ kaadaanna anjo ballaka. Anjo ballinna le’baka napattantu takkulleai nitawarri.

15Punna anjo taua eroki napasulu’ balla’na, musti nabayaraki anjo ballinna nampa natambai ruampulo parseng.

16Punna nia’ tau ampassareangi sipa’gang tampa’na mae ri Batara, ballinna musti nipattantu situru’ jaina lamungang niparalluanga untu’ allamungi anjo tampaka. Untu’ ta’ruampuloa kilo gandung, ballinna sampulo doe’ pera’.

17Punna anjo buttaya nipassareangi appakkaramula Taung Pammoteranga, ballinna nibayara’ ngasengi.

18Punna anjo buttaya nipassareangi ri le’ba’namo Taung Pammoteranga, imanga musti natassereki balli nibayara’ kontanna situru’ taung niaka ija ammantang sa’genna narapi’ Taung Pammoterang labattua, nampa napattantu ballinna la’bi lammoroka.

19Punna anjo tau assarea koko eroki napassulu’, musti nabayaraki ballinna nampa natambai ruampulo parseng.

20Punna nabalukangi anjo kokoa nampa tena napasuluki rolong battu ri Batara, tenamo ha’na ampasuluki anjo kokoa.

21Lalang ri Taung Pammoterang labattua, anjo kokoa a’jari Napatammi Batara sa’genna satunggu-tungguna, nampa nipassareang mae ri sikamma imanga.

22Punna nia’ tau assare koko le’ba’ naballi mae ri Batara,

23imanga musti natassereki ballinna situru’ siapa jaina taung niaka ija tassesa sa’genna narapi’ Taung Pammoterang labattua. Nampa anjo taua musti nabayara’ memangi ballinna anjo alloa. Anjo doeka a’jari Batara pata.

24Lalang ri Taung Pammoteranga, anjo kokoa musti nipoterangi mae ri uru patannaya yareka mae ri jari-jarina.

25Sikontu ballinna musti nipattantui situru’ anggarang niaka nipake ri KemaNa Batara.

26Olo’-olo’ bungasaka lassu’ Batara pata; jari takkulleai nipassareang untu’ koro’bang ero’ kalenna taua. Ana’ sapi, ana’ gimbala’ yareka ana’ bembe uru lassuka, Batara patanna.

27Mingka olo’-olo’ harang bungasaka lassu’ akkullei nipasulu’ situru’ anggarang niaka tappake ri KemaNa Batara, nampa nitambai ruampulo parseng. Punna tena nipasuluki, anjo olo’-oloka akkullei nibalukang mae ri tau maraenga situru’ anggarang niaka tappake ri KemaNa Batara.

28Tena manna sitau akkulle ambalukangi yareka ampasuluki apa le’baka nisa’la’ mae ri Batara, baji’ a’rupa taua kammayatompa a’rupa olo’-oloka yareka buttaya. Anjo kammaya a’jari Napatammi Batara sa’genna satunggu-tungguna.

29Ba’lalo tau le’bakamo nisa’la’ mae ri Batara sollanna nipanraki takkulleai nipasulu’; musti nibunoi anjo taua.

30Bage sampulona sikontu wassele’ buttaya, baji’ nagandung yareka rappo-rappoang, untu’ Batara.

31Punna nia’ tau ero’ ampasuluki sipa’gang anjo wasseleka, musti nabayaraki ballinna situru’ anggarang le’baka nipattantu nampa natambai ruampulo parseng.

32Tasse’re battu ri sampuloa kayunna olo’-olo’ iamintu Batara pata. Punna nirekengi anjo olo’-olo’ piaraya, tunggala’ tassikayu, iamintu makasampuloa battu ri anjo olo’-oloka, Batara pata.

33Anjo patannaya takkulleai napilei angkanaya kereanga baji’ siagang kereanga kodi. Takkullea tongi nasambei. Punna kamma tonji nasambeina, anjo ruang kayua olo’-olo’ a’jari Napatang rua-ruai Batara siagang takkulleai nipasulu’.

34Iaminjo parenta-parenta Napassareanga Batara irate ri Moncong Sinai mae ri Musa untu’ bansa Israel.


  Share Facebook  |  Share Twitter

 <<  Imamat 27 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran