Dual Panel1Nibarakkakimi Sara ri Batara, situru’ apa le’baka Napa’janjiang.
2Situru’ ri wattu le’baka Napattantukang Allata’ala, ri wattu toanamo Abraham, attianammi Sara nampa ammana’ sitau ana’ bura’ne.
3Naaremmi Abraham anjo anaka Ishak;
4na ri wattunna narapi’ sagantuju allo umuru’na Ishak, nasunna’mi Abraham anjo anaka situru’ parentaNa Allata’ala.
5Anjo wattua umuru’na Abraham sibilangngang taung nampa lassu’ Ishak.
6Nakanamo Sara, "Napa’jarima’ ammakkala’, lanri rannuku. Sikontu tau allangngerekai anne passalaka larannu ngasengi ammakkala’ siagang inakke."
7Nampa nakana pole, "Inai le’ba’ angkana ri bura’nengku angkanaya lakkullea’ lappasusu ana’? Mingka kamma-kamma anne ammana’ma’, manna pole nasanna’mo toana bura’nengku."
8Pila’ a’bakka’mi anjo anaka. Na ri wattunna narapi’mo wattunna nisa’la susu anjo anaka, appare’mi Abraham passua’-suarrang.
9Ri se’reang allo, anjo Ismael iamintu ana’na Abraham battua ri Hagar, anjo baine battua ri Mesir, sitabangi akkarek-karena siagang Ishak, ana’na Sara.
10Nacini’na Sara anjo ke’nanga, nakanamo ri Abraham, "Bongkai a’lampa anjo ata bainea siagang ana’na. Takkulleai ana’na baine kammaya annarima bageang battu ri barang-barannu lanasossoranga anakku Ishak."
11Tena sikali nasannang pa’mai’na Abraham allangngereki pappala’na anjo Sara, lanri anjo Ismael ana’na tongi.
12Mingka Nakanamo Allata’ala ri Abraham, "Teako ranggaselai ri passala’na anjo atannu Hagar siagang ana’na. Turukimi ero’na Sara, nasaba’ battu ri Ishak sallang nalanugappa anjo turungang le’baka Kupa’janjiang.
13Kammayatompa mae ri ana’na Hagar laKusare tongi ana’ cucu sollanna a’jari bansa ke’nanga. Saba’ ia ana’nu tonji."
14Ammukona bari’basa’, nasaremi Abraham kanre Hagar siagang se’re pammoneang je’ne’ untu’ a’jari bokong ri lampana. Napadenge’mi anjo anaka ri dongko’na Hagar, nampa nasuro anjo bainea a’lampa. A’lampami Hagar mange ri parang lompona Bersyeba.
15Ri wattunna la’busu’mo je’ne’ nabokonga, napadongko’mi Hagar ana’na ri rawanganna rompo’-rompoka,
16nampa mange ammempo kira-kira nia’ sibilangngang metere’ bellana battu ri anjo tampaka. Nakanamo lalang ri pa’mai’na, "Tena nakuparrang anciniki anakku mate." Nampa angngarru’mo Hagar.
17Nalangngere’mi Allata’ala sa’ranna Ismael. Nampa a’bicaramo malaeka’Na Allata’ala battu rate ri langika mae ri Hagar, angkana, "Apa nukasusang Hagar? Teako mallakki. Nalangngere’mi Allata’ala sa’ranna ana’nu.
18A’lampamako mange ri ana’nu, angkaki nampa nupakasannang. LaKupa’jari turunganna se’re bansa lompo."
19Nanipakasingara’mo paccini’na Hagar ri Allata’ala, sa’genna accini’mo se’re bungung. Nampa a’lampamo mange ambonei je’ne’ anjo pammoneang je’ne’na, nampa nasare angnginung anjo ana’na.
20Nirurungammi Ismael ri Allata’ala. Pila’ a’bakka’mi lompona anjo anaka. Ammantangi ri parang lompona Paran, siagang a’jarimi pasoso’ sannaka cara’de’na.
21Nipa’buntimmi ri amma’na siagang sitau baine Mesir.
22Anjo wattua nia’mi battu Karaeng Abimelekh siagang Pikhol, panglima tantarana, nampa nakana ri Abraham, "Le’ba’ mako Natulung Allata’ala ilalang sikontu apa nugaukanga.
23Lanri kammana, assumpamako anrinni ri dallekanNa Allata’ala, angkanaya tena nulakodi ateka’ mae ri nakke, kammayatompa mae ri ana’-anakku, yareka ri turungangku. Sangkamma inakke bajiki pa’maikku mae ri kau, kamma tomminjo kupalaki nukamma todong anjo mae ri nakke siagang mae ri anne pa’rasangang nupammantangngia."
24Nakanamo Abraham, "Assumpama’."
25Mingka ribokoanganna nasassala’mi Abraham anjo Abimelekh passabakkang se’re bungung naalle passaya sikamma atanna anjo karaenga.
26Nakanamo Abimelekh, "Takuassengai angkana inai anggaukangi anjo kammaya. Tena le’bakai nupau mae ri nakke; nampami anne kulangngere’ anjo passalaka."
27Nampa napassareammo Abraham mae ri Abimelekh siapa are jaina gimbala’ siagang sapi, siagang appare’mi parjanjiang anjo tau ruaya.
28Nasa’la’mi Abraham tuju kayu ana’ gimbala’ battu ri pa’rappunganna gimbala’na.
29Akkuta’nammi Abimelekh ri ia angkana, "Angngapa nanugaukang anjo kammaya?"
30Appialimi Abraham angkana, "Kitarimami anne tujung kayua ana’ gimbala’ untu’ a’jari pammatei ri ma’nassa kimangakuina angkana inakke angkekei anne bungunga."
31Kammaminjo naniaremmo anjo tampaka Bersyeba, nasaba’ anjoremmi anjo tau ruaya massing assumpa.
32Le’baki ke’nanga appare’ parjanjiang ri Bersyeba, ammotere’mi Abimelekh siagang Pikhol mange ri pa’rasanganna tu Filistin.
33Nampa a’lamummo Abraham se’re poko’ kayu niarenga tamariska ri Bersyeba, siagang appakkaramula anjo wattua napakemi anjo tampaka untu’ anynyomba ri Batara, Allata’ala mannannunganga.
34Le’baki anjo ammantammi sallo-sallo sike’de’ Abraham ri pa’rasanganna tu Filistin.