Dual Panel1Napannarrusu’mi pa’jappanna Yakub. Nampa nia’mo siapa are malaeka’ battu mae ri ia.
2Nacini’na Yakub anjo ke’nanga, nakanamo, "Anne pakkemaanNa Allata’ala." Lanri kammana naaremmi anjo tampaka Mahanaim.
3Le’baki anjo nasuromi Yakub siapa are tau untu’ a’jappa riolo mange ri pa’rasangang Edom untu’ angngagangi sicini’ Esau, daenna.
4Nakana Yakub ri ke’nanga, "Pauangi daengku Esau angkana, ‘Inakke Yakub, atannu. Anne siapa sallona ammantangi ri Laban.
5Kamma-kamma anne nia’ sapiku, keledaiku, gimbalakku, bembeku, siagang tunisuroku. Akkiringa’ kabara’ mae ri karaengku, nakuminasai nalasannang pa’mai’na karaengku allangngereki.’"
6Ri wattunna ammotere’ sikamma anjo tunasuroa Yakub, nakanamo ke’nanga, "Battumi ikambe ri Esau, daenta, nakamma-kamma anne niaki lalang pa’jappang, ero’ battu mae ambuntuliki’. Battui mae sirurungang patambilangngang tau."
7Nalangngere’na Yakub anjo kabaraka, batami siagang sanna’mi malla’na. Nampa nabage ruamo anjo sikamma tau niaka naagang, kammayatompa gimbala’na, bembena, sapina siagang untana, nasa’la’ tommi a’jari ruang pammantangngang.
8Nakana nawa-nawana, "Punna battu Esau nampa nabunduki pammantangngang makase’rea, anjo pammantangngang makaruaya akkullei napasalama’ kalenna."
9Nampa appala’ doammo Yakub nakana, "O, Allata’ala, Ia napakalompoa toaku Abraham, siagang manggeku Ishak, poro Kipilangngeri laloa’! IKattemi Batara assuroa’ ammotere’ mange ri pa’rasangangku siagang bija pammanakangku. Nampa Kijanjima’ angkanaya iKatte langngatoroki sikontu-kontuna a’jari baji’, untu’ inakke.
10Tena kusiratang langgappai pangngamaseanTa siagang tamamminraTa ri pa’mai’ ia le’baka Kipa’butti mae ri nakke. Ri wattungku a’lampa allimbangi Binanga Yordan, tena apa-apa kuerang pantaranganna takkang. Kamma-kamma anne battuma’ ammotere’ lalang anne ruaya pammantangngang.
11Kupala’ dudui ri Katte, pasalamaka’ battu ri daengku Esau. Mallaka’ gassingka battui mae untu’ ambundukia’ siagang angngancurukka’ sipa’gangngang, kammayatompa bai’-bainea siagang ana’-anaka.
12Kiu’rangi angkanaya le’ba’ maKi’ a’janji Batara, angkanaya laKiatoro’ baji’ ngasengi sikontu-kontuna untu’ inakke siagang Kisarea’ majai turungang. Tena manna sitau lakkulle anrekengi lanri sanrapangi kassika ri biring tamparang jaina."
13Le’baki a’bangngi anjoreng, naallemi sipa’gang olo’-olo’na Yakub, untu’ lanahadiakang mae ri Esau. Anjo hadiaya iamintu: ruambilangngang bembe gana, ruampulo bembe laki, ruambilangngang gimbala’ gana, ruampulo gimbala’ laki, tallumpulo unta appasusua siagang ana’na, patampulo sapi gana, sampulo sapi laki, ruampulo keledai gana, siagang sampulo keledai laki.
14(32:13)
15(32:13)
16Nasa’la’-sa’la’mi anjo olo’-oloka a’jari siapa are pa’rappungang nampa napassareang mae ri tasse’re-se’re surona. Nakanamo ri ke’nanga, "A’jappa riolo mako ri dallekangku, siagang katutui sikabellainnu tasse’re-se’rea pa’rappungang siagang pa’rappungang ri bokoanga."
17Naparentakammi mae ri surona makase’rea, nakana, "Punna sibuntulukko daengku Esau nampa akkuta’nang angkana, ‘Inai karaennu? La’lampa kemaeko? Inai pata antu olo’-olo’ nuembaya?’
18Appiali mako angkana, ‘Atanta Yakub pata. Nakiringi anne untu’ napanynyombang mae ri Esau, karaenna. Atanta Yakub niaki amminawang ri bokona ikambe.’"
19Nampa ri surona makaruaya, makatallua siagang sikontu tau nasuroa angngurusuki anjo massing pa’rappunganna olo’-oloka, naparentakang kamma ngasemmi anjo. Nasaba’ napikkiriki Yakub angkana akkullei nanyonyo’ Esau siagang anjo apa napassareanga. Sollanna punna sibuntuluki sallang, akkullei nipammopporang ri Esau.
20(32:19)
21Jari nakiring a’lampa riolomi anjo apa eroka napassareang, nampa ia kalenna a’bangngi ri pakkemaanna.
22Ia todong anjo bangngia ambangummi Yakub nampa naerang anjo ruaya bainenna, ruaya baine piarana siagang sampulo asse’re ana’na, a’limbang ri Binanga Yabok.
23Le’baki napa’limbang ke’nanga, ammotere’mi nampa nakiring sikamma barang-baranna anta’leang.
24Mingka ia ammantangi kale-kalenna. Nania’mo sitau bura’ne battu nampa a’laga siagang Yakub sa’genna la’biring singaraka.
25Ri wattunna naasseng kalenna anjo taua angkana talammetayai ri anjo pa’laganga, nalappassangngimi pungku’na Yakub, sa’genna tassalamo poko’ bongganna Yakub.
26Nampa nakana anjo taua, "Lappassanga’, kala’birimmi ammumba alloa." Appialimi Yakub angkana, "Tena nakulappassangki’ karaeng, punna tena kibarakkakia’."
27Akkuta’nammi anjo taua, angkana, "Inai arennu?" Appialimi Yakub angkana, "Yakub."
28Nakanamo anjo taua, "Teaimi Yakub arennu. Le’ba’ mako a’laga siagang Allata’ala, kammayatompa siagang rupataua, nampa ikau ammeta. Lanri kammana, kamma-kamma anne a’jari arennu Israel."
29Nakanamo Yakub, "Kipaumi inai arenTa Karaeng." Mingka appialimi anjo taua angkana, "Tena naparallu nupakkuta’nangngang angkana inai arengku!" Nampa nabarakkaki Yakub.
30Le’baki anjo nakanamo Yakub, "Le’ba’ma’ assibuntulu’ rupa siagang Allata’ala kunampa attallasa’ ija." Lanri kammana naaremmi anjo tampaka Pniel.
31Ri wattunna ammumbamo alloa, nabokoimi Yakub Pniel, siagang akkeppammi lanri tassalai poko’ bongganna.
32Sa’genna kamma-kamma anne tanakanreai turunganna Israel dageng antongkokiai poko’ bongganna olo’-oloka, lanri le’ba’na nilappassangngi poko’ bongganna Yakub.