Alkitab Mobile SABDA
[VER] : [MAKASAR]     [PL]  [PB] 
 <<  Kejadian 45 >> 

1Takkulleami naparrangngi pa’mai’na Yusuf ri dallekanna sikamma pagawena. Jari nasuromi ke’nanga a’lampa ambokoi anjo tampaka, sollanna akkulle napappiassengang kalenna mae ri sikamma sari’battanna.

2A’lampana ngasemmo pagawena ambokoi anjo tampaka, angngarru’ lompomi Yusuf, sa’genna nalangngere’ tu Mesir niaka pantaranganna anjo tampaka. Na ta’rapi’mo anjo kabaraka mange ri balla’na karaenga.

3Nakanamo Yusuf ri anjo sikamma sari’battanna, "Inakke minne Yusuf. Attallasa’ iji bapa’?" Nacini’na anjo kammaya, malla’ sikalimi anjo sikamma sari’battanna, sa’genna takkullea appiali.

4Nampa nakanamo Yusuf mae ri ke’nanga, "Mae ngaseng mako anrinni." A’reppese’mi ke’nanga, nampa nakanamo pole Yusuf, "Inakke minne Yusuf le’baka nubalukang mae ri Mesir.

5Teako mallakki siagang teako sassali kalennu ngaseng, lanri le’bakku nubalukang. Sikontutojenna KalenNa Allata’ala angngeranga’ mae anrinni, a’jappa riolo untu’ ampasalamaki tau jaia.

6Kamma-kamma anne nampami taung makarua wattu kacipuranga. Limang taumpi sallona takkullea taua anjama yareka akkatto.

7Naeramma’ Allata’ala a’jappa riolo untu’ ampasalama’ ngasengko tete ri anne kajariang appakalannasaka, siagang untu’ antanggongi kasalamakkannu ngaseng, kammayatompa untu’ kala’buanna turungannu.

8Jari, teai passabakkang ikau ngaseng nakunia’ anrinni, mingka passala’ Allata’ala. Iami ampa’jaria’ pagawe kaminang tinggi ri karaeng Mesir. Nisarema’ koasa mae ri sikontu bone balla’na siagang mae ri sikontu pa’rasangang Mesir.

9Kamma-kamma anne akkaro-karo ngaseng mako ammotere’ mange ri bapa’, nampa nupauang angkana inakke Yusuf, ana’na, akkana kamma anne, ‘Napa’jarima’ Allata’ala tukoasa ri sikontu Mesir. Battu maki’ mae linta’.

10Akkulleki’ ammantang ri Daera Gosyen, ri ampi’ pammantangangku. Battu maki bapa’, siagang ana’-cucunta, sikamma gimbalatta, bembeta, sapita, siagang sikamma pa’barang-baranganta.

11Punna niakki’ ri Gosyen, akkullema’ amparakaiki’. Sallo iji wattu kacipuranga, iamintu liman taumpi. Lakuusahakangi sollanta ikatte, kaluargata, siagang sikamma olo’-olotta tena nalakakurangang apa-apa.’"

12Nakanamo pole Yusuf, "Kamma-kamma anne nucini’ ngasemmi kalennu, ikau pole Benyamin, angkana inakke tojemmi anne Yusuf.

13Paumi ri bapatta antekamma lompona koasaku anrinni ri Mesir. Carita ngasemmi mae ri ia sikontu apa le’baka nucini’. Nampa linta’ mako angngerangi mae anrinni."

14Le’baki anjo naraka’mi Benyamin, anjo andi’na, nampa angngarru’. Angngarru’ tommi Benyamin nampa naraka’ todong Yusuf.

15Nampa lalang angngarru’na ija Yusuf, naraka’ ngasemmi sikamma sari’battanna nampa nabau ke’nanga. Le’baki anjo accaritami siagang ke’nanga.

16Ri wattunna kalangngerang ri balla’na karaenga angkanaya battui sikamma sari’battanna Yusuf, sannang tommi pa’mai’na karaenga siagang sikontu pagawena.

17Nampa nakanamo karaenga ri Yusuf, "Suromi anjo sikamma sari’battannu ampitekeki keledaina ke’nanga nampa ammotere’ mange ri Kanaan,

18untu’ mange angngallei manggena siagang kaluargana ke’nanga nampa a’lette’ mae anrinni. Lakusarei ke’nanga tampa’ kaminang bajika ri Mesir, sollanna akkulle ke’nanga attallasa’ siagang ganna’ battu ri wassele’na anjo buttaya.

19Suro tommi ke’nanga angngerang siapa are kareta battu anrinni, sollanna akkulle naerang bainenna siagang ana’-ana’ ca’dina ke’nanga, siagang naalle manggena ke’nanga.

20Tena naparallu napikkiri’ ke’nanga apa-apa tena sikalia nakkulle naerang, nasaba’ apa kaminang bajika ri Mesir akkullei napatang ke’nanga."

21Nagaukammai sikamma ana’na Yakub anjo parentana karaenga. Nasaremi Yusuf ke’nanga siapa are kareta, situru’ parentana karaenga, kammayatompa kanre bokong untu’ pa’jappanna ke’nanga.

22Massing nasare tommi ke’nanga tassipasanna pakeang beru. Mingka mae ri Benyamin nasarei tallum bilangngang doe’ pera’ siagang limam pasang pakeang beru.

23Napikatuimi manggena sampulo keledai attekeka barang-barang kaminang bajika ri Mesir, sampulo keledai attekeka gandung, roti siagang kanre-kanre maraeng untu’ lanakanre lalang pa’jappana mange ri Mesir.

24Nampa napalampamo sikamma sari’battanna, siagang nakana ri ke’nanga, "Teako a’beseri ri aganga."

25Nabokoimi ke’nanga Mesir nampa ammotere’ mange ri Yakub ri Kanaan, manggena ke’nanga.

26Nakanamo ke’nanga ri manggena, "Attallasa’ iji Yusuf! Ia a’jari tukoasa ri Mesir!" Nalangngere’na anjo kabaraka, takkajannammi Yakub, siagang tena napatappaki ke’nanga.

27Mingka le’ba’namo nacarita ngaseng ke’nanga apa napaua Yusuf mae ri ke’nanga, siagang nacini’namo kareta nakiringa Yusuf untu’ angngallei siagang angngerangi mange ri Mesir, angngu’rangimi ri takkajannanna.

28Nakanamo, "Tallasa’ iji anakku Yusuf! Iaji anjo bawang kukaeroki! Musti a’lampa’ mange anciniki ri tenanapa kumate."


  Share Facebook  |  Share Twitter

 <<  Kejadian 45 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel