Dual Panel1Nakanamo Batara ri Musa, "A’lampako mange andallekang ri karaenga. Le’ba’mi Kupa’jari kapala batu ngaseng siagang sikamma pagawena, sollanna akkulle Kugaukang gau’-gau’ malompoa ri tangnga-tangngana ke’nanga,
2siagang sollanna akkulle nucarita mae ri ana’ cucunnu antekamma batena Kupare’ karek-karenang bansa Mesir lanri sikamma anjo gau’ malompoa. Jari lanuasseng ngasemmi angkanaya iNakkemi Batara."
3Nampa a’lampami Musa siagang Harun mange andallekang ri karaenga na nakana ri ia, "Batara, Allata’alana bansa Ibrani, appasangi angkana, ‘Siapapi sallonu taeroka tundu’ mae ri Nakke? Lappassammi ummakKu a’lampa, sollanna akkulle ke’nanga nagaukang ibadana mae ri Nakke.
4Punna tena ija nuero’, ammuko lappabattuA’ katimbang ri pa’rasangannu.
5Sikontu buttaya lakatongkokang taba sikali ri katimbang sannaka jaina. Sikontu lamung-lamung niaka tassesa, ba’lalo poko’-poko’ kayu tenaya nipanraki ri bosi es, lanipaccappuki ri anjo katimbanga.
6Balla’ lomponu, sikamma balla’na pagawenu siagang balla’na ra’yaka larassi ngasengi katimbang. Anne balaya la’bi hebakkangngangi na sikamma bala le’baka nakasia’ boe-boenu.’" Nampa nagilimmo kalenna Musa na’lampa.
7Nakanamo sikamma pagawea ri karaenga, "Siapapi sallona anjo taua tuli assusaiki’? Lappassammi a’lampa ngaseng anjo tu Israelka untu’ anggaukangi ibadana mae ri Batara, Allata’alana ke’nanga. Ciniki anne pa’rasanganta ancuru’mi!"
8Jari nikio’mi ammotere’ Musa siagang Harun mange andallekang ri karaenga. Nakanamo karaenga ri ke’nanga, "Akkulle mako a’lampa untu’ anggaukangi ibadanu mae ri Karaeng Allata’alanu. Mingka inai-naika la’lampa?"
9Appialimi Musa angkana, "Yangasenna ikambe, baji’ tu rungkaya kammayatompa tau toaya. Lanaerang ngasengi kambe ana’na ikambe, sikontu sapia, gimbalaka, siagang sikontu bembena ikambe, nasaba’ musti appareki ikambe passua’-suarrang lompo untu’ ampakalompoi Batara."
10Nakanamo karaenga, "Assumpa’ mae ri Batara, angkana ma’nassa tena nakukellaiko angngerangi tubai’-bainea siagang ana’-ana’nu. Ma’nassa singara’mi mae ri nakke angkanaya kodi ateka’nu.
11Tena! Tu bura’neaji bawang akkulle a’lampa untu’ anggaukangi ibadaya mae ri Batara, punna ma’nassa poro ero’nuji bawang anggaukangi ibadanu!" Kammaminjo kana-kananna karaenga, nampa nibongkamo Musa siagang Harun battu ri balla’ karaenga.
12Nampa Nakanamo Batara ri Musa, "Angkaki limannu ri tompo’na butta Mesir. Labattui sikamma katimbanga angkanrei sikontu lamung-lamung niaka tassesa ri le’ba’na bosi es."
13Naangka’mi Musa takkanna nampa appa’nia’mo Batara anging battu raya ammiri’ ri anjo pa’rasanganga sila’busu’na alloa siagang sila’busu’na bangngia. Lanarapiki bari’basaka, angngerammi katimbang anjo anginga,
14teai sipato’ jaina, sa’genna rassimo sikontu pa’rasanganga napakamma. Tale’bakapi taua accini’ katimbang kammaya anjo jaina, baji’ riolo kammayatompa ribokoanganna.
15Sikontu tompo’na buttaya nitongko’ ngasengi ri katimbang sa’genna le’leng nicini’ buttaya. Sikontu apa niaka nikanre ngasemmi ri anjo katimbanga, iamintu niaka tassesa tenaya nipanraki ri bosi es, kammayami rappo-rappo kayua. Ri sikontu pa’rasanganga tenamo apa-apa moncongbulo ammantang tassesa ri poko’-pokoka siagang lamung-lamunga.
16Akkaro-karomi karaenga angkioki Musa siagang Harun nampa nakana, "Dorakama’ mae ri Karaeng Allata’alanu siagang mae ri kau sipa’rua.
17Kamma-kamma anne pammopporangi dosaku, siagang appala’ doang mako mae ri Karaeng Allata’alanu, sollanna Naalle battu ri nakke anne hukkungang ammunoa tau."
18A’lampami Musa ambokoi karaenga nampa appala’ doang mae ri Batara.
19Jari Napinrami Batara lampana anjo anginga a’jari anging battu lau’, ia sannaka kancanna. Niirikammi ri anging anjo sikontu katimbanga nampa nierang mange ri Tamparang Alara’. Manna sikayu tania’ ammantang ri sikontu pa’rasangang Mesir.
20Mingka nipa’jari kapala batui ri Batara anjo karaenga, sa’genna taerokai ampassareangi anjo bansa Israel a’lampa.
21Nakanamo Batara ri Musa, "Angkaki nai’ limannu, na nitongko’ butta Mesir ri sassang makkappu’."
22Naangka’mi limanna nai’ Musa, na nitongko’mo ri sassang makkappu’ sikontu pa’rasangang Mesir tallungallo sallona.
23Tena sikalimo nakkulle accini’ apa-apa tu Mesir anjo wattua, sa’genna tenamo manna sitau a’lampa-lampa. Mingka ri balla’na tu Israel tuli singara’naja.
24Jari nakio’mi Karaenga Musa na nakana, "Akkulle mako a’lampa mange anggaukangi ibadanu ri Bataranu. Sikamma bai’-bainea siagang ana’-anaka akkulle ngasengi a’lampa. Mingka sapinnu, gimbala’nu, siagang bembenu takkulleai nuerang."
25Appialimi Musa angkana, "Punna kamma musti kisarei ikambe olo’-olo’ piara untu’ nipassareang siagang untu’ a’jari koro’bang nitunu mae ri Batara, Allata’alana ikambe.
26Sikontu olo’-olo’ piarana ikambe musti naerangi ikambe; manna sikayu tania’ lanaboli’ ikambe. Iaminjo olo’-olo’ piaraya lanapilei ikambe untu’ napassareang ikambe mae ri Karaeng Allata’ala. Anjorempi nampa naasseng ikambe angkanaya olo’-olo’ kereanga lanapassareang ikambe."
27Nipa’jari kapala batui anjo karaenga ri Batara, sa’genna taerokai ampassareangi bansa Israel a’lampa.
28Nakana karaenga ri Musa, "Bellako ri dallekangku! Teama’ anciniki tanja’nu! Punna kuciniki pole tanja’nu, tena tamatenu!"
29Nakanamo Musa, "Kammatojengi kananta, ma’nassa tena tojemmo nakicini’ pole tanjakku."