Alkitab Mobile SABDA
[VER] : [MAKASAR]     [PL]  [PB] 
 <<  Keluaran 16 >> 

1Nampa a’lampa anjo sikontu umma’ Israel battu ri Elim. Na ri tanggala’ sampulona allima bulang makarua le’ba’namo nabokoi ke’nanga Mesir, battumi ke’nanga mange ri parang lompo niarenga Sin, niaka ri alla’na Elim siagang Moncong Sinai.

2Anjoreng ri parang lompoa anjo, a’moro-moro ngasemmi ke’nanga mae ri Musa siagang Harun.

3Nakana ke’nanga, "Bajikangngangi ebara’ angkana matemi ikambe nibuno ri Batara ri butta Mesir. Anjoreng kaminang sike’de’na akkullei ikambe ammempo angnganre dageng siagang roti sa’genna bassoro’ ikambe. Mingka ikau sipa’rua nuerangi ikambe mae anrinni sollanna mate cipuru’ ngaseng ikambe anrinni."

4Nakanamo Batara ri Musa, "Kamma-kamma anne lappaturungA’ kanre alla’bi-la’bi rapang bosi untu’ ikau ngaseng. Tunggala’ allo musti appasse’reko kanre untu’ siganna’na nukanre siallo. Kammaminjo bateKu ero’ anso’ri ummakKu, sollanna akkulle Kuasseng angkana apaka ma’nassa mannuruki tojenji ke’nanga ri sikamma parentaKu yareka tena.

5Ri maka annanna alloa musti appasse’rei ke’nanga kanre a’lappi rua jaina."

6Jari nakanamo Musa siagang Harun mae ri sikontu tu Israel, "Anne karuenga lanuassengi angkanaya KalenNa Batara angngerangko assulu’ battu ri Mesir.

7Ammuko lanucini’ ngasengi singara’ kahaderanNa Batara. Nalangngereki Batara angkanaya larro-larro ngasengko mae ri Ia; iyo, Batara nukalarroi, nasaba’ anne ikambe poro parentaNaji nagaukang ikambe.

8LaNasareko Batara dageng punna karueng, siagang roti punna bari’basa’ sa’gennu bassoro’, lanri Nalangngere’mi Batara angkana a’larro-larro ngasengko ri Ia. Sitojenna punna a’larro-larroko mae ri kambe, Batara nukalarroi."

9Nampa nakanamo Musa mae ri Harun, "Suro ngasengi ke’nanga battu andallekang ri Batara, nasaba’ Nalangngereki ke’nanga a’moro-moro."

10Lalang a’bicarana Harun mae ri yangasenna ke’nanga, accini’mi ke’nanga mae ri parang lompoa na ti’ring nacini’mi ke’nanga cayaNa Batara lalang ri rammanga.

11Nakanamo Batara ri Musa,

12"Kulangngereki pa’moro-morona ke’nanga tu Israel. Pauammi ke’nanga angkana punna karueng langgappami ke’nanga dageng, siagang punna bari’basa’ langnganrei ke’nanga roti sa’genna bassoro’. Jari lanaassemmi ke’nanga angkanaya iNakkemi Batara, Allata’alana ke’nanga."

13Ri wattunna karueng battumi jangang-jangang puroa sa’genna sanna’ jaina na natongko’ sikontu pakkemaanna ke’nanga, siagang punna bari’basa’ naummi saliuka ri tammulilina pakkemaanga.

14Ri wattunna nai’mo anjo saliuka, sikali nia’mo nicini’ ri tompo’na anjo parang lompoa apa-apa kamma sissi’ alusu’.

15Wattunna nacini’ tu Israel anjo kammaya, tanaassengai ke’nanga angkana apa anjo. Jari massing sikuta’nammi ke’nanga angkana, "Apa anjo?" Nakanamo Musa ri ke’nanga, "Iaminjo kanre Napassareanga Batara mae ri kau ngaseng.

16Naparentakangi Batara sollanna massing angngalle taua situru’ massing naparalluanga, iamintu ruang litere’ untu’ tasse’re anggota kaluarga."

17Kammaminjo nagaukang tu Israel; mingka nia’ appasse’re la’bi ri ruaya litere’ untu’ sitau na nia’ todong kurang.

18Ri wattunna nalitere’ ke’nanga, a’nassami angkanaya tau jaia napasse’re tena nakala’biang, siagang tau sike’deka napasse’re tena nakakurangang. Massing appasse’rei ke’nanga situru’ siapa jaina naparalluanga.

19Nakana Musa ri ke’nanga, "Manna inai takkulleai naboli’ anjo kanrea manna sike’de’ untu’ ammuko."

20Mingka nia’ siapa are tau ri ke’nanga tanajampangiai kananna Musa. Kamma tonji naboli’na sipa’gang anjo kanrea. Ammukona, olokammi siagang botto’mi anjo kanrea; jari larromi Musa mae ri ke’nanga.

21Tunggala’ bari’basa’ napasse’remi ke’nanga anjo kanrea naparallukanga ke’nanga; napunna appakkaramulamo bambang alloa, anjo kanre tassesaya ri anjo buttaya assolommi.

22Ri makaannanna alloa napasse’remi ke’nanga anjo kanrea a’lappi rua jaina, iamintu patang litere’ untu’ sitau. Sikontu pamimpinna ke’nanga battumi ampaui anjo passalaka mae ri Musa.

23Nakanamo Musa mae ri ke’nanga, "Iaminne parentaNa Batara: Ammuko iamintu allo le’ba’ nisa’la’ untu’ ammari-mari, allo Pammari-mariang, allo nisa’laka nanipassareang mae ri Batara. Apa eroka nulangga anne alloa, langga memammi, siagang apa eroka nupallu, pallu memammi. Apa la’bia untu’ kaparalluang anne alloa, sa’laki siagang boliki untu’ ammuko."

24Jari naboli’mi ke’nanga anjo kanre alla’bia untu’ ammuko situru’ Naparentakanga Musa; anjo kanrea tena na’jari bari siagang tena naolokang.

25Nakanamo Musa, "Iaminne kanrenu untu’ anne alloa, saba’ anne alloa iamintu Allo Pammari-mariang, allo pammari-mariang untu’ ampakalompoi Batara; siagang tena nukkulle anggappa kanre kammaya anjo pantaranganna kemanu, manna sike’de’.

26Annang allo sallona nupasse’re untu’ kanrenu, mingka allo makatujua iamintu allo pammari-mariang, siagang tena kanre lanaung ri anjo alloa."

27Ri makatujuna alloa nia’ siapa are tu Israel ero’ appasse’re kanre, mingka tena apa-apa nagappa ke’nanga.

28Nakanamo Batara mae ri Musa, "Siapapi sallonu taeroka mannuruki ri sikamma parentaKu?

29U’rangi angkanaya Kusareko wattu siallo untu’ ammari-mari. Iaminjo saba’na naKusareko kanre anggannaka untu’ ruangallo ri makaannanna alloa. Ri makatujuna alloa yangasenna taua musti ammantangi ri balla’, takkulleai assulu’."

30Lanri kammana minjo natanjamaya ke’nanga ri makatujuna alloa.

31Anjo kanrea naarengi tu Israel manna. Tanja’na kammai lisere’-lisere’ ca’di, keboki, nakasia’na kammai kanrejawa ammakea je’ne’ bani.

32Nakana Musa, "Nasuroki’ Batara angngalle kira-kira rua litere’ manna untu’ nibolikang jari-jarita, sollanna akkulle nacini’ ke’nanga anjo kanre Napassareanga Batara mae ri katte ri parang lompoa, ri wattunta Naerang assulu’ battu ri Mesir."

33Nakana Musa ri Harun, "Angngalleko se’re uring, appantamakko kira-kira rua litere’ manna nampa nupadongko’ ri dallekanNa Batara untu’ nibolikang jari-jarita."

34Jari napadongko’mi Harun anjo uringa ri dallekanna Patti Parjanjianga untu’ niboli’ situru’ parentaNa Batara mae ri Musa.

35Anjo mannaya a’jari kanrena tu Israel patampulo taung ribokoanganna, sa’genna battu ke’nanga mange ri Kanaan, tampa’ pammantangang situlina ke’nanga.

36(Ukkurang biasaya napake taua anjo jammanga, nia’ ruampulolitere’ bonena.)


  Share Facebook  |  Share Twitter

 <<  Keluaran 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel